ប្រទេសឡាវ ៖ ក្រុមបាល់ទាត់ជម្រើសជាតិនារីកម្ពុជា នឹងជួបតតាំងជាមួយនឹងក្រុមនារីឥណ្ឌូណេស៊ី វគ្គផ្តាច់ព្រ័ត្រពានរង្វាន់ AFF Women’s Cup 2024 ដែលប្រទេសឡាវទទួលធ្វើជាម្ចាស់ផ្ទះ នៅឯកីឡដ្ឋាន New Laos National ស្ថិតនៅក្នុងទីក្រុងវៀងច័ន្ទ នៅថ្ងៃទី៥ ខែធ្នូ ឆ្នាំ២០២៤ វេលាម៉ោង ០៧:៣០នាទីយប់នេះ។

មុនពេលប៉ះគ្នានៅវគ្គផ្តាច់ព្រ័ត្រយប់នេះ ក្រុមទាំងពីរបានប៉ះគ្នាម្តងរួចមកហើយ នៅក្នុងជំនួបពូល B ដោយបញ្ចប់ទៅនៅក្នុងលទ្ធផលស្មើគ្នា ០ទល់នឹង០ កាលពីថ្ងៃទី២៣ ខែធ្នូ កន្លងទៅ។ ប៉ុន្តែក្រឡេកទៅមកមើលស្ថិតិកាលពីវគ្គចែកពូល កម្ពុជាហាក់ធ្វើបានល្អជាងឥណ្ឌូណេស៊ី ជាមួយការគ្រប់គ្រង និងដាក់គំនាបច្រើនជាង ហើយមានឱកាសល្អបំផុតស៊ុតចំគោលដៅចំនួន៣លើក ខណៈឥណ្ឌូណេស៊ីមានតែ១លើកគត់។

ក្រុមនារីកម្ពុជា ក្រោមការដឹកនាំរបស់គ្រូបង្គោល លោក ឃួន ឡាបូរ៉ាវី បានបង្កើតប្រវត្តិសាស្ត្រថ្មី ឈានដល់វគ្គផ្តាច់ព្រ័ត្រជាលើកដំបូងក្នុងពានរង្វាន់ AFF Women’s Cup 2024 បន្ទាប់ពីបញ្ចប់នៅកំពូលតារាងពូល B ក្រោយស្មើឥណ្ឌូណេស៊ី ០ទល់នឹង០ និងឈ្នះម៉ាឡេស៊ី ២ទល់នឹង០ មុនបន្តឈ្នះទីម័រខាងកើត ក្រុមលេខ២ ពូល A លទ្ធផល ៣ទល់នឹង០ នៅវគ្គពាក់កណ្តាលផ្តាច់ព្រ័ត្រ។ សម្រាប់កម្ពុជាវិញ ធ្លាប់ចូលរួមពានរង្វាន់នេះចំនួន៣លើកកន្លងមកហើយ នៅឆ្នាំ២០១៨ ២០១៩ និង២០២២ ប៉ុន្តែឆ្លងមិនផុតវគ្គចែកពូលឡើយ។

ដោយឡែក ក្រុមនារីឥណ្ឌូណេស៊ី ក្រោមការដឹកនាំរបស់គ្រូបង្វឹកជនជាតិជប៉ុន លោក Satoru Mochizuki បញ្ចប់នៅលេខ២ពូល B ដោយស្មើកម្ពុជា ០ទល់នឹង០ ហើយបន្តយកឈ្នះម៉ាឡេស៊ី ១ទល់នឹង០ មុនយកឈ្នះសិង្ហបុរី ក្រុមកំពូលតារាងពូល A លទ្ធផល ៣ទល់នឹង០ នៅវគ្គពាក់កណ្តាលផ្តាច់ព្រ័ត្រ។ ឥណ្ឌូណេស៊ី ធ្លាប់ចូលរួមពានរង្វាន់នេះ៩លើករួចមកហើយ (២០០៤ ២០០៧ ២០០៨ ២០១១ ២០១៣ ២០១៥ ២០១៨ ២០១៩ និង ២០២២) ហើយលទ្ធផលល្អបំផុត គឺបញ្ចប់នៅចំណាត់ថ្នាក់លេខ៤ កាលពីឆ្នាំ ២០០៤។

មុនតទល់គ្នានៅវគ្គផ្តាច់ព្រ័ត្រ កម្ពុជា និងឥណ្ឌូណេស៊ី សុទ្ធតែធានាបានកៅអីទៅកាន់ព្រឹត្តិការណ៍ ASEAN Women’s Championship ឆ្នាំ ២០២៥ ដែលមាន ថៃ ហ្វីលីពីន មីយ៉ាន់ម៉ា និងវៀតណាម រង់ចាំរួចជាស្រេច។ ចំណែកជំនួបដណ្តើមចំណាត់ថ្នាក់លេខ៣ រវាងទីម័រខាងកើត និងសិង្ហបុរី នឹងធ្វើឡើងនៅឯកីឡដ្ឋាន New Laos National វេលាម៉ោង ០៣:០០នាទីរសៀលនេះ ហើយក្រុមឈ្នះនឹងទទួលបានកៅអីទៅកាន់ព្រឹត្តិការណ៍នៅឆ្នាំ ២០២៥។

បច្ចុប្បន្ន ពឿន គន្ធា កំពុងឈរជាកីឡាការិនីរកគ្រាប់បាល់ច្រើនជាងគេ ឬ Top Scorer បណ្តោះអាសន្ន នៃពានរង្វាន់ AFF Women’s Cup 2024 ក្រោយកីឡាការិនីពាក់អាវលេខ១៩រូបនេះ រកបាន៣គ្រាប់ តាមពីក្រោយដោយកីឡាការិនីឥណ្ឌូណេស៊ី Claudia Scheunemann ដែលរកបាន២គ្រាប់។ ក្រៅពី ពឿន គន្ធា កីឡាការិនីកម្ពុជាពីររូបទៀតរួមមាន ឈិត សាភឿន និង សឿន វីផា ក៏រកបានម្នាក់មួយគ្រាប់ផងដែរ។

បើតាមការបញ្ជាក់របស់សហព័ន្ធកីឡាបាល់ទាត់កម្ពុជា កាលពីថ្ងៃទី៤ ខែធ្នូ ឆ្នាំ២០២៤ បានឱ្យដឹងថា សម្រាប់ការប្រកួតវគ្គផ្ដាច់ព្រ័ត្ររវាងកម្ពុជា និងឥណ្ឌូណេស៊ី នៃពានរង្វាន់ AFF Women’s Cup 2024 នឹងមានការផ្សាយផ្ទាល់នៅលើគេហទំព័រហ្វេសប៊ុកផេកផ្លូវការរបស់សហព័ន្ធបាល់ទាត់កម្ពុជាផងដែរ។

គួរបញ្ជាក់ថា ការប្រកួតពានរង្វាន់ AFF Women’s Cup 2024 ដែលចាប់ផ្តើមនៅថ្ងៃទី២៣ ខែវិច្ឆិកា រហូតដល់ថ្ងៃទី៥ ខែធ្នូ មាន៦ក្រុមចូលរួម ចែកចេញជា២ពូល ដោយពូល A មាន ម្ចាស់ផ្ទះឡាវ ទីម័រខាងកើត និងសិង្ហបុរី។ ពូល B មាន កម្ពុជា ឥណ្ឌូណេស៊ី និងម៉ាឡេស៊ី។ ជាលទ្ធផល ម្ចាស់ផ្ទះឡាវ និងម៉ាឡេស៊ី ហាលអាវត្រឹមវគ្គចែកពូល៕ (រូបភាព ៖ សហព័ន្ធកីឡាបាល់ទាត់កម្ពុជា)