រាជធានីភ្នំពេញ ៖ ក្រុមកីឡាបាល់ទាត់ជម្រើសជាតិកម្ពុជាក្នុងនាមម្ចាស់ផ្ទះ បានត្រឹមចែកគ្នាម្នាក់១​ពិន្ទុជាមួយនឹងម៉ាឡេស៊ី នៅក្នុងជំនួបបើកឆាកពូល A នៃពានរង្វាន់ ASEAN Championship ឆ្នាំ ២០២៤ ក្រោយចប់ការប្រកួតដ៏ស្វិតស្វាញ នៅឯកីឡដ្ឋានជាតិពហុអូឡាំពិករាជធានីភ្នំពេញ (ស្តាត​អូឡាំពិក) ដោយលទ្ធផល ២ទល់នឹង២ កាលពីថ្ងៃទី៨ ខែធ្នូ កន្លងទៅ។

នៅក្នុងពូលជាមួយគ្នានេះ ក្រុមការពារតំណែងជើងឯកថៃ បានបំបាក់ទីម័រខាងកើត នៅកីឡដ្ឋានហាងដាយ (Hang Day) មានមូលដ្ឋាននៅទីក្រុងហាណូយ ប្រទេសវៀតណាម ដោយលទ្ធផល ១០ទល់នឹង០។ ការប្រកួតនេះ ទីម័រខាងកើតលេងក្នុងនាមជាម្ចាស់ផ្ទះ ប៉ុន្តែដោយសារតែពុំមានកីឡដ្ឋានសមស្របតាមស្តង់ដាររបស់សហព័ន្ធកីឡាបាល់ទាត់អាស៊ីអាគ្នេយ៍ AFF ទើបសហព័ន្ធបាល់ទាត់ទីម័រខាងកើត សម្រេចប្រើប្រាស់កីឡដ្ឋានហាងដាយរបស់វៀតណាម ដើម្បីប្រកួតក្នុងផ្ទះខ្លួនឯងចំនួនពីរប្រកួត ក្នុងវគ្គចែកពូល ដោយត្រូវប៉ះថៃ និងសិង្ហបុរី។

តាមរយៈលទ្ធផលខាងលើ ថៃឡើងកាន់កាប់កំពូលតារាងពូល A បណ្តោះអាសន្ន កម្ពុជាឈរនៅលេខ២ ម៉ាឡេស៊ីឈរនៅលេខ៣ សង្ហបុរីមិនទាន់មានការប្រកួតឈរនៅលេខ៤ និងទីម័រខាងកើត នៅបាតតារាង។ ការប្រកួតបន្ទាប់ក្នុងពូល A ធ្វើឡើងនៅថ្ងៃទី១១ ខែធ្នូ ដោយសិង្ហបុរីបើកទ្វារកីឡដ្ឋានជាតិរបស់ខ្លួនស្ថិតក្នុងតំបន់កាឡាំង ទទួលស្វាគមន៍ក្រុមគោព្រៃកម្ពុជា នៅវេលាម៉ោង ០៦:០០នាទីល្ងាច។ ស្របពេលម៉ាឡេស៊ី បើកទ្វារកីឡដ្ឋានជាតិ Bukit Jalil ស្ថិតនៅទីក្រុងកូឡាឡាំពួររបស់ខ្លួន ទទួលស្វាគមន៍ទីម័រខាងកើត នៅវេលាម៉ោង ០៨:០០នាទីយប់។

ក្រោយបញ្ចប់ការប្រកួតកាលពីយប់មិញ ក្រុមបាល់ទាត់ជម្រើសជាតិកម្ពុជា នៅព្រឹកថ្ងៃទី៩ ខែធ្នូ ឆ្នាំ២០២៤នេះ បានចេញដំណើរទៅប្រទេសសិង្ហបុរី ដើម្បីត្រៀមសម្រាប់ប្រកួតទី២ វគ្គសន្សំពិន្ទុពូល A ពានរង្វាន់ ASEAN Championship ឆ្នាំ២០២៤។

ដោយឡែក នៅក្នុងពូល B ដែលរួមមាន វៀតណាម ឥណ្ឌូណេស៊ី ហ្វីលីពីន មីយ៉ាន់ម៉ា និងឡាវ នឹងចាប់ផ្តើមការប្រកួតនៅយប់នេះ។ មីយ៉ាន់ម៉ា បើកទ្វារកីឡដ្ឋាន Thuwunna របស់ខ្លួនទទួលឥណ្ឌូណេស៊ី ខណៈឡាវបើកទ្វារកីឡដ្ឋានជាតិថ្មីរបស់ខ្លួន (New Laos National) ស្វាគមន៍វៀតណាម។

គួរបញ្ជាក់ថា ពានរង្វាន់ ASEAN Championship 2024 ចាប់ផ្តើមពីថ្ងៃទី៨ ខែធ្នូ ឆ្នាំ២០២៤ ដល់ថ្ងៃទី៥ ខែមករា ឆ្នាំ២០២៥ មាន១០ប្រទេសចូលរួម ដោយចែក ជា២ពូល ពូល A រួមមាន កម្ពុជា ថៃ ម៉ាឡេស៊ី សិង្ហបុរី និង ទីម័រខាងកើត។ ចំណែកពូល B រួមមាន វៀតណាម ឥណ្ឌូណេស៊ី ហ្វីលីពីន មីយ៉ាន់ម៉ា និង ឡាវ។ ក្រុមលេខ១ និងលេខ២ នៃពូកទាំងពីរឡើងបន្តទៅវគ្គពាក់កណ្តាលផ្តាច់ព្រ័ត្រ៕ (រូបភាព ៖ សហព័ន្ធកីឡាបាល់ទាត់កម្ពុជា, Changsuek និង ASEAN United FC)