រាជធានីភ្នំពេញ ៖ សហព័ន្ធកីឡាបាល់ទាត់កម្ពុជា នៅរសៀលថ្ងៃទី៤ ខែធ្នូ បានប្រកាសថា កីឡាករ អូសិ តាកាកិ, នេតូ រ៉ុនដុន និង ឃូលីបាលី អាបឌែល មានលក្ខខណ្ឌគ្រប់គ្រាន់លេងតំណាងឱ្យក្រុមជម្រើសជាតិកម្ពុជា និងត្រូវចូលរួមប្រកួតក្នុងពានរង្វាន់តំបន់អាស៊ីអាគ្នេយ៍ ASEAN Mitsubishi Electric Cup 2024 នាពេលខាងមុខនេះ។

នៅក្នុងសំណេរបង្ហោះលើបណ្តាញសង្គមហ្វេសប៊ុកផ្លូវការ សហកីឡាបាល់ទាត់កម្ពុជា បានប្រកាសថា «តបតាមសំណើររបស់សហព័ន្ធកីឡាបាល់ទាត់កម្ពុជា ជាមួយឯកសារដែលបានផ្ញើទៅ ចំពោះកីឡាករ ឃូលីបាលី អាបឌែល តាមរយៈសហព័ន្ធកីឡាបាល់ទាត់ពិភពលោក (FIFA) និងចំពោះកីឡាករ អូសិ តាកាកិ និង នេតូ រ៉ុនដុន តាមរយៈសហព័ន្ធកីឡាបាល់ទាត់អាស៊ាន (AFF) ត្រូវបានពិនិត្យឃើញថា មានលក្ខណៈបុគ្គលិកគ្រប់គ្រាន់ និងត្រូវបានអនុញ្ញាតឱ្យលេងតំណាងក្រុមជម្រើសជាតិកម្ពុជា។ ដូច្នេះចាប់ពីពេលនេះតទៅ កីឡាករចំណូលថ្មី ទាំង៣នាក់នេះ អាចលេងតំណាងឱ្យក្រុមជម្រើសជាតិកម្ពុជាបានជាផ្លូវការ ហើយនឹងត្រូវចូលរួមលេងក្នុងពានរង្វាន់ ASEAN Mitsubishi Electric Cup 2024 ខាងមុខនេះ»។

ក្រុមបាល់ទាត់ជម្រើសជាតិកម្ពុជា ក្រោមការដឹកនាំរបស់គ្រូបង្វឹកជនជាតិជប៉ុន លោក Koji Gyotoku កាលពីយប់ថ្ងៃទី១ ខែធ្នូ ឆ្នាំ២០២៤ បានកោះហៅកីឡាករ២៦រូប ដើម្បីចូលរួមប្រកួតពានរង្វាន់ ASEAN Mitsubishi Electric Cup 2024 ដែលនឹងចាប់ផ្តើមនៅថ្ងៃទី៨ ខែធ្នូ ឆ្នាំ២០២៤ ដល់ថ្ងៃទី៥ ខែមករា ឆ្នាំ២០២៥។

លោក Koji Gyotoku បានបន្ថែមសមាសភាពកីឡាករចូលសញ្ជាតិ៣រូប រួមមាន ខ្សែការពារជប៉ុន អូសិ តាកាកិ (Takaki Ose) រួមជាមួយខ្សែប្រយុទ្ធកូឡុំប៊ី នេតូ រ៉ុនដុន (Andrés Nieto) របស់ក្រុមភ្នំពេញក្រោន និងខ្សែប្រយុទ្ធកូដឌីវ័រ ឃូលីបាលី អាបឌែល (Abdel Kader Coulibaly) របស់ក្រុមអាយអេសអាយដង្កោសែនជ័យ។ ដូច្នេះសមាសភាពកីឡាករចូលសញ្ជាតិរបស់ក្រុមគោព្រៃកម្ពុជា បានកើនដល់៦រូបហើយ រួមទាំង ខ្សែការពារជប៉ុន មីហ្ស៊ូណូ ហ៊ីការ៉ុ របស់ក្រុមព្រះខ័នរាជស្វាយរៀង ខ្សែការពារអាហ្វ្រិកខាងត្បូង កាន់ ម៉ូ របស់ក្រុមវិសាខា និងខ្សែបម្រើជប៉ុន យូឌៃ អូកាវ៉ា (ជប៉ុន) របស់ក្រុមភ្នំពេញក្រោន ដែលជាកីឡាករមានស្រាប់។

គួរបញ្ជាក់ថា ពានរង្វាន់ ASEAN Mitsubishi Electric Cup 2024 មាន១០ប្រទេសចូលរួម ដោយចែកចេញជា២ពូល នៅក្នុងពូល A រួមមាន កម្ពុជា ថៃ ម៉ាឡេស៊ី សិង្ហបុរី និង ទីម័រខាងកើត។ ចំណែកនៅក្នុងពូល B រួមមាន វៀតណាម ឥណ្ឌូណេស៊ី ហ្វីលីពីន មីយ៉ាន់ម៉ា និង ឡាវ។ ខាងក្រោមនេះ គឺជាកាលវិភាគប្រកួតរបស់ក្រុមគោព្រៃកម្ពុជា នៅក្នុងពូល A ៖

-ថ្ងៃទី០៨ ខែធ្នូ ឆ្នាំ២០២៤ កម្ពុជា ប៉ះ ម៉ាឡេស៊ី នៅពហុកីឡដ្ឋានជាតិអូឡាំពិក រាជធានីភ្នំពេញ
-ថ្ងៃទី១១ ខែធ្នូ ឆ្នាំ២០២៤ សិង្ហបុរី ប៉ះ កម្ពុជា នៅកីឡដ្ឋានជាតិសិង្ហបុរី (National Stadium) តំបន់កាឡាំង

-ថ្ងៃទី១៧ ខែធ្នូ ឆ្នាំ២០២៤ កម្ពុជា ប៉ះ ទីម័រខាងកើត នៅពហុកីឡដ្ឋានជាតិអូឡាំពិក រាជធានីភ្នំពេញ
-ថ្ងៃទី២០ ខែធ្នូ ឆ្នាំ២០២៤ ថៃ ប៉ះ កម្ពុជា នៅឯកីឡដ្ឋានជាតិ Rajamangala ទីក្រុងបាងកក៕ រូបភាព ៖ សហព័ន្ធកីឡាបាល់ទាត់កម្ពុជា