មានពាក្យចចាមអារ៉ាមល្បីថា ខ្សែបម្រើក្រុមជម្រើសជាតិថៃ Ben Davis អាចនឹងត្រូវប៉ូលីសសិង្ហបុរីចាប់ខ្លួន ព្រោះតែកីឡាករសញ្ញាតិ៣ ថៃ-អង់គ្លេស-សិង្ហបុរី រូបនេះ ត្រូវបានចោទប្រកាន់ពីបទរំលោភលើការការតព្វកិច្ចបម្រើជាតិរបស់ខ្លួន ។…
មានពាក្យចចាមអារ៉ាមល្បីថា ខ្សែបម្រើក្រុមជម្រើសជាតិថៃ Ben Davis អាចនឹងត្រូវប៉ូលីសសិង្ហ
បុរីចាប់ខ្លួន ព្រោះតែកីឡាករសញ្ញាតិ៣ ថៃ-អង់គ្លេស-សិង្ហបុរី រូបនេះ ត្រូវបានចោទប្រកាន់ពីបទរំលោភលើការការតព្វកិច្ចបម្រើជាតិរបស់ខ្លួន ។
ក្រុមបាល់ទាត់ជម្រើសជាតិសិង្ហបុរីនឹងធ្វើជាម្ចាស់ផ្ទះការប្រកួត ASEAN Mitsubishi Electric Cup ចំនួនពីរប្រកួតនៅខែធ្នូ ឆ្នាំ២០២៤នេះ នៅពហុកីឡដ្ឋានជាតិរបស់ខ្លួន ដោយយប់ថ្ងៃទី១១ ខែធ្នូ ឆ្នាំ២០២៤ ជាមួយនឹងក្រុមជម្រើសជាតិកម្ពុជា និងនៅរាត្រីថ្ងៃទី១៧ ខែធ្នូ ជាមួយក្រុមការពារតំណែងជើងឯកថៃ ។
ក្នុងជំនួបរវាង ថៃ-សិង្ហបុរី ខ្សែបម្រើ Ben Davis ជាកីឡាករជម្រើសជាតិថៃ ដែលថៃដណ្តើមបានមកពីសិង្ហបូរី ក៏មានឈ្មោះនៅក្នុងបញ្ជីកីឡាករទាំង ២៦នាក់ ហើយនឹងគ្រោងដំណើរទៅប្រកួតក្រៅដីនៅប្រទេសសិង្ហបុរី ។ ទោះជាយ៉ាងណាក៏ដោយ យោងតាមកាសែត The Straits Times ខ្សែបម្រើរូបនេះប្រឈមនឹងការចាប់ខ្លួនដោយសារតែរូបគេមិនបាននិងមិនទាន់បានបញ្ចប់កាតព្វកិច្ចបម្រើជាតិរបស់គាត់ក្រោមច្បាប់សិង្ហបុរី ។
កាសែត The Straits Times បានបន្តថា សមាគមបាល់ទាត់ថៃ និងកីឡាករ Ben Davis បានបដិសេធមិនធ្វើអត្ថាធិប្បាយលើបញ្ហានេះទេ នៅពេលដែលបានទាក់ទងសូមការបកស្រាយចំពោះពាក្យចចាមអារាមមួយនេះ។
គេនៅចាំបានថា BEN DAVIS ត្រូវអវត្តមានម្តងរួចមកហើយក្នុងការប្រកួតពាន់រង្វាន់ AFF Suzuki Cup កាលពីឆ្នាំ២០២១នៅសិហ្ហបុរី បើទោះបីជារូបគេស្ថិតនៅក្នុងបញ្ជីបឋមក៏ដោយ ចុងក្រោយគ្រូបង្វឹករបស់ប្រទេសថៃមិនដាក់រូបគេចូលឡើយ។
កីឡាករ៣សញ្ជាតិ វ័យ២៤ឆ្នាំ BEN DAVIS មានឈ្មោះពេញថា Benjamin James Davis កើតនៅថ្ងៃទី២៤ ខែវិច្ឆិកា ឆ្នាំ២០០០ នៅខេត្តភូកេត ប្រទេសថៃ ដោយម្តាយជាជនជាតិថៃ និងមានឪពុកជាកូនកាត់វែល-អង់គ្លេស។ នៅអាយុ៥ ឆ្នាំពោលគឺឆ្នាំ២០០៥គ្រួសាររបស់បេន បានចាកចេញពីប្រទេសថៃ ទៅរស់នៅប្រទេសសិង្ហបុរី ហើយនៅអាយុ៩ឆ្នាំ បេន បានទទួលសញ្ជាតិសិង្ហបុរី ជាទឹកដីដែលគេធំធាត់ រៀនសូត្រ និងលេងបាល់នៅទីនោះ។
ខ្សែបម្រើរូបនេះ លេងធ្លាប់ឱ្យក្រុមជម្រើសជាតិ U16 និង U19 សិង្ហបុរី ។ ពេលអាយុ ១៨ឆ្នាំ Ben គាត់ត្រូវបានកោះហៅឱ្យចូលជម្រើសជាតិក្នុងឆ្នាំ ២០១៨ ប៉ុន្តែមិនបានចូលលេងទេ។ មួយឆ្នាំក្រោយមក Ben បានក្លាយជាកីឡាករសិង្ហបុរីដំបូងគេដែលបានចុះកុងត្រា ជាមួយក្លឹប Fulham ។ បេន បានដាក់ពាក្យសុំទៅក្រសួងការពារជាតិរបស់ Singapre សម្រាប់ការពន្យាពេលក្នុងការចូលបំពេញកាតព្វកិច្ចយោធា ប៉ុន្តែត្រូវបានច្រានចោល ។ នៅពេលនោះ សំណុំរឿងរបស់ បេន ត្រូវបាននាំយកទៅជជែកដល់សភាសិង្ហបុរី ។ រដ្ឋមន្ត្រីក្រសួងការពារជាតិសិង្ហបុរី បានផ្តល់ហេតុផលចំនួនបីសម្រាប់ការបដិសេធសំណើពន្យារចូលបំពេញកាតព្វកិច្ចយោធា៖
១- បេន បានចុះឈ្មោះលេងឱ្យ Fulham ក្នុងនាមកីឡាករសញ្ជាតិអង់គ្លេស។
២-ឪពុករបស់ បេន បានបដិសេធដោយឥតឈប់ឈរ ក្នុងការផ្តល់កាលបរិច្ឆេទពិតប្រាកដនៅពេលដែលកូនប្រុសរបស់គាត់នឹងត្រលប់មកបម្រើជាតិវិញ ប្រសិនបើសំណើរពន្យាពេលត្រូវបានអនុម័ត។
៣-ឪពុករបស់ បេន បានអះអាងថា បើទោះជាក្រសួងការពារជាតិសិង្ហបុរី មិនយល់ព្រមនឹងសំណើរសុំពន្យាពេល ក៏ Ben នឹងនៅតែចុះកុងត្រាជាមួយក្លឹប Fulham ហើយកំពុងពិចារណាឱ្យកូនប្រុសរបស់គាត់បោះបង់សញ្ជាតិសិង្ហបុរីដើម្បីបន្តអាជីពបាល់ទាត់។
នៅខែកញ្ញា ឆ្នាំ២០១៩ បេន ត្រូវបានកោះហៅឲ្យចូលរួមក្រុមជម្រើសជាតិថៃសម្រាប់ការប្រកួតស៊ីហ្គេមលើកទី៣០ នៅប្រទេសហ្វីលីពីន ហើយបេនក៏យល់ព្រម។ ការសម្រេចចិត្តនេះស្តែងឱ្យឃើញថា Ben ជ្រើសរើសលេងឱ្យក្រុមជម្រើសជាតិម្តាយរបស់គាត់នៅប្រទេសថៃជំនួសឱ្យប្រទេសសិង្ហបុរី។បេន ធ្លាប់បានប្រាប់ទូរទស្សន៍ថៃ True4U ថា «នេះគឺជាជម្រើសដ៏ល្អបំផុតសម្រាប់ខ្ញុំ» ។ បាល់ទាត់ថៃមានអនាគតភ្លឺស្វាង និងមានឱកាសជោគជ័យ។ ឪពុកម្តាយរបស់ខ្ញុំក៏គាំទ្រការសម្រេចចិត្តរបស់ខ្ញុំឱ្យបានពេញលេញផងដែរ ។
កាលពីខែកុម្ភៈ ឆ្នាំ២០១៩ ក្រសួងការពារជាតិសិង្ហបុរីបាននិយាយថា Ben Davis បានបរាជ័យក្នុងការបំពេញកាតព្វកិច្ចបម្រើជាតិ និងបានបំពានលើការប្តេជ្ញាចិត្តរបស់គាត់។ រូបគេ ក៏កំពុងស្នាក់នៅក្រៅប្រទេសដោយមិនមានលិខិតអនុញ្ញាតចេញចូលត្រឹមត្រូវ។ អ្នកបំពានច្បាប់ របស់សិង្ហបុរីអាចប្រឈមមុខនឹងការជាប់ពន្ធនាគាររហូតដល់ ៣ឆ្នាំ និងពិន័យជាប្រាក់រហូតដល់ ១ម៉ឺនដុល្លារ។
ក្រោយម Ben Davis បន្តលេងឱ្យថៃនៅ U23 សម្រាប់ពានរង្វាន់ Asian Cup ឆ្នាំ ២០២០ និង ២០២២ បន្ទាប់មកស៊ីហ្គេមឆ្នាំ ២០២២ ដោយស៊ុតបញ្ចូលទីបានមួយគ្រាប់ក្នុងជ័យជម្នះ ៥-០ លើប្រទេសសិង្ហបុរី។
នៅកម្រិតក្លឹបព្រីមឺលីកវិញ Ben Davis បានចាកចេញពី Fulham ទៅលេងឱ្យ Oxford City ពីឆ្នាំ ២០២១ឲ ដល់ឆ្នាំ ២០២៣ ។ បន្ទាប់ពីបានតែមួយរដូវកាល គាត់បានត្រលប់ទៅប្រទេសថៃវិញដើម្បីលេងឱ្យក្លិប Port FC ក្នុងលក្ខខ័ណ្ឌខ្ចីជើង បន្ទាប់មក ក្លិប Chonburi FC និងបច្ចុប្បន្ន ក្លិប Uthai Thani ។
សូមបញ្ជាក់ថា ថៃបានកោះហៅកីឡាករគ្រប់គ្រាន់តាមបទប្បញ្ញត្តិ AFF Cup 2024 ទោះជាយ៉ាងណាក៏ដោយ ក្រុមត្រូវបានអនុញ្ញាតឱ្យចុះឈ្មោះកីឡាករតែ ២៣នាក់ប៉ុណ្ណោះមុនពេលការប្រកួតនីមួយៗ។ ដូច្នេះហើយ Ben Davis ទំនងជាងមិនទៅប្រកួតនៅប្រទេសសិង្ហបុរី ជាមួយក្រុមជម្រើសជាតិថៃទេ ដើម្បីគេចពីហានិភ័យផ្លូវច្បាប់ ៕
ចែករំលែកព័តមាននេះ