រាជធានីភ្នំពេញ ៖ បុរសម្នាក់បាននិយាយថា ខ្លួនចាញ់បោកការលួងលោមរបស់ស្ត្រីវ័យក្មេងម្នាក់ ដោយបានយកទូរស័ព្ទនិងអាយផេតរបស់ខ្លួន រួចប្លុកហ្វេសប៊ុកគេចខ្លួនបាត់ ធ្វើឱ្យក្លាយជាការបន្ទោសខ្លួនឯង ដែលមិនគួរទុកចិត្តស្រីក្មេងរូបស្រស់ រហូតបាត់អស់ទ្រព្យរបស់ខ្លួន ។…
រាជធានីភ្នំពេញ ៖ បុរសម្នាក់បាននិយាយថា ខ្លួនចាញ់បោកការលួងលោមរបស់ស្ត្រីវ័យក្មេងម្នាក់ ដោយបានយកទូរស័ព្ទនិងអាយផេតរបស់ខ្លួន រួចប្លុកហ្វេសប៊ុកគេចខ្លួនបាត់ ធ្វើឱ្យក្លាយជាការបន្ទោសខ្លួនឯង ដែលមិនគួរទុកចិត្តស្រីក្មេងរូបស្រស់ រហូតបាត់អស់ទ្រព្យរបស់ខ្លួន ។
ជាមួយនេះ ខ្លួនស្បថថា ឈប់លង់នឹងសម្រស់ខាងក្រៅរបស់ស្រីក្មេងទៀតហើយ តែសំណាងល្អក៏បានជួបស្រីស្រស់ចិត្តឆើតវិញ និងប្តឹងសមត្ថកិច្ចឲ្យជួយអន្តរាគមន៍ភ្លាមៗ ។ ហេតុការណ៍នេះ បង្កឲ្យមានការភ្ញាក់ផ្អើលឡើង កាលពីវេលាម៉ោងប្រមាណ១២និង២០នាទីរំលងអធ្រាត្រ ឈានចូលថ្ងៃទី៩ ខែធ្នូ ឆ្នាំ២០២៤ នៅហាងមួយក្នុងតំបន់អភិវឌ្ឍន៍បឹងកក់ សង្កាត់ស្រះចក ខណ្ឌដូនពេញ ។
បុរសរូបនេះដែលសុំមិនប្រាប់ឈ្មោះនិយាយថា ខ្លួននិងស្រីស្រស់នេះត្រូវជាសង្សារនឹងគ្នានិងទើបស្គាល់គ្នាបានជិត២ខែប៉ុណ្ណោះ ដោយនាងបានឆាតមកទាក់ទងខ្លួនមុន ហើយក៏ត្រូវដងត្រូវផ្លែគ្នាក្នុងទំនាក់ទំនងជាគូស្នេហ៍ ។
ដំបូងឡើយ នាងបានខ្ចីអាយផេត ហើយក៏បានយកមកឱ្យវិញ ។ លុះបន្ទាប់មក បានខ្ចីអាយផេតនិងខ្ចីទូរស័ព្ទ សរុបគិតជាទឹកប្រាក់ប្រមាណ១២០០ដុល្លារ ។ ប្រភពដដែលបន្តថា លុះលើកក្រោយនេះ បន្ទាប់ពីខ្ចីបានហើយ ស្រាប់តែស្រីស្រស់តែសម្បកក្រៅរូបនេះ បានប្លុក(BLOCK)ឆាតនិងហ្វេសបុ៊កមិនអាចទាក់ទងបានទៀត ។
បុរសរងគ្រោះព្រោះសម្រស់ស្រីស្អាតរូបនេះបញ្ជាក់ថា ចំពោះទំនាក់ទំនងជាមួយស្ត្រីខាងលើធ្វើជាសង្សារនេះ គឺមិនទាន់បានស៊ីជម្រៅនៅឡើយទេ មានន័យថា បានត្រឹមក្លិនមិនបានខ្លួនទេ ។ ក្រោយពីត្រូវឃាត់ខ្លួន ស្រីស្រស់ខាងលើ ក៏បានទាក់ទងទៅឪពុកម្ដាយរបស់នាង ដើម្បីឲ្យជួយសម្របសម្រួល តែនៅពេលម្តាយនាងមកដល់បែរជានិយាយថា ពួកគេស្នេហាគ្នាដូច្នេះការខ្ចីគ្នាទៅវិញទៅមកគឺជារឿងធម្មតាទេ ។
បន្ទាប់មក នគរបាលប៉ុស្តិ៍បាននាំស្រីស្រស់ និងបុរសខាងលើទៅសួរនាំ ដើម្បីចាត់ការបន្តតាមនីតិវិធី ។ មិនទាន់ដឹងថា វាសនាស្រីស្អាតយ៉ាងណានៅឡើយទេ ជាមួយច្បាប់ ៕
ចែករំលែកព័តមាននេះ