ទីក្រុង​ហាណូយ ៖ អាជ្ញាធរ​របស់​ប្រទេស​វៀតណាម បាន​រក​ឃើញ​ប្រតិបត្តិការ​ផលិត​ប្រេងឆា​ក្លែងក្លាយ​ដ៏​ធំ​មួយ ដែល​ជា​ផលិតផល​ក្លែងក្លាយ​របស់​ក្រុមហ៊ុន GF Vietnam Food Co., Ltd ទាំងនោះ ត្រូវ​បាន​ចែកចាយ​ទូ​ទាំង​ប្រទេស​។ នេះ​បើ​យោង​តាម​ប្រភព​ពី​សារព័ត៌មាន Vietnam Express បាន​ចេញផ្សាយ​កាលពី​ថ្ងៃ​ទី​១៦ ខែតុលា ឆ្នាំ​២០២៥​។

អាជ្ញាធរ​សុវត្ថិភាព​ចំណីអាហារ​ប្រទេស​វៀតណាម កាលពី​ថ្ងៃ​ទី​១៥ ខែតុលា ឆ្នាំ​២០២៥ បាន​ចេញ​ការ​ព្រមាន​ថ្នាក់​ជាតិ បន្ទាប់​ពី​ប៉ូលិស​ខេត្ត ហឹ​ង អៀន (Hung Yen) បាន​បើក​សំណុំរឿង​ព្រហ្មទណ្ឌ​ប្រឆាំង​នឹង​ក្រុមហ៊ុន​មួយ​នេះ​។ ក្រុម​អ្នកស៊ើប​អង្កេត​បាន​អះអាង​ថា ប្រេងឆា​ដែល​ផលិត​នៅ​រោងចក្រ​របស់​ក្រុមហ៊ុន GF Vietnam នៅ​ទីក្រុង​ហឹ​ង អៀន មិន​បាន​បំពេញ​តាម​ស្តង់ដារ​សុវត្ថិភាព ហើយ​ត្រូវ​បាន​បញ្ជាក់​ថា​ជា​ផលិតផល​ក្លែងក្លាយ តាម​រយៈ​ការ​ធ្វើតេស្ត​ពី​មន្ត្រី​ជំនាញ​។

ប្រេងឆា​ក្លែងក្លាយ​របស់​ក្រុមហ៊ុន​នេះ ត្រូវ​បាន​រាយការណ៍​ថា​បាន​ចែកចាយ​ទៅ​ដល់​ខេត្ត និង​ទីក្រុង​នានា​នៅ​ទូ​ទាំង​ប្រទេស​វៀតណាម មុន​ពេល​ការ​រក​ឃើញ ក្រោម​ឈ្មោះ​ម៉ាក​ជា​ច្រើន​រួម​មាន Chica, Tamin Gold, Goldmax, Tot និង Megafood ។ ពេល​នេះ​អាជ្ញាធរ​បាន​អំពាវនាវ​ដល់​ប្រជាជន​កុំ​ទិញ ឬ​ប្រើប្រាស់​ផលិតផល​មាន​ម៉ាក​ដូច​បាន​រៀបរាប់​ទាំងនោះ ហើយ​ត្រូវ​រាយការណ៍​រាល់​ទំនិញ​ដែល​សង្ស័យ​ដល់​មន្ត្រី​មូលដ្ឋាន​។

ទន្ទឹម​ជាមួយ​គ្នា​នោះ មន្ត្រី​ក៏​បាន​បញ្ជា​ឱ្យ​ត្រួតពិនិត្យ​កាន់តែ​តឹងរ៉ឹង ដើម្បី​តាមដាន​ស្តុក​ក្លែងក្លាយ​ដែល​នៅ​សេសសល់ និង​ទប់ស្កាត់​មិន​ឱ្យ​ផលិតផល​ទាំងនោះ​ទៅ​ដល់​ដៃ​អ្នក​ប្រើប្រាស់​។

នៅ​ក្នុង​រយៈពេល​ប៉ុន្មាន​ខែ​ថ្មី​ៗ​នេះ ប៉ូលិស​វៀតណាម​បាន​រក​ឃើញ​ករណី​ក្លែងបន្លំ​អាហារ​ទ្រង់ទ្រាយ​ធំ​ជា​ច្រើន រួម​ទាំង​ការ​រឹបអូស​ប្រេងឆា​ក្លែងក្លាយ​ចំនួន ៧១ ០០០​លី​ត្រ ព្រមទាំង​ប៊ី​ចេ​ង (MSG) ក្លែងក្លាយ​ចំនួន ៤០ តោន នៅ​ក្នុង​ខេត្ត ហ្វ៊ូ ថោះ Phu Tho កាលពី​ខែមេសា​កន្លង​ទៅ​៕