លោក ត្រាំ ថា សហរដ្ឋអាមេរិកកំពុងស្ថិតក្នុងសង្គ្រា.មពាណិជ្ជកម្មជាមួយប្រទេសចិន
សហរដ្ឋអាមេរិក ៖ ពីរសប្តាហ៍មុនកិច្ចប្រជុំទល់មុខគ្នារវាងប្រធានាធិបតីអាមេរិក លោក ដូណាល់ ត្រាំ (Donald Trump) និងប្រធានាធិបតីចិន លោក…
សហរដ្ឋអាមេរិក ៖ ពីរសប្តាហ៍មុនកិច្ចប្រជុំទល់មុខគ្នារវាងប្រធានាធិបតីអាមេរិក លោក ដូណាល់ ត្រាំ (Donald Trump) និងប្រធានាធិបតីចិន លោក ស៊ី ជិនភីង (Xi Jinping) កើតឡើង លោក ត្រាំ បាននិយាយថា ជម្លោះពាណិជ្ជកម្មរវាងសហរដ្ឋអាមេរិក និងចិនបានផ្ទុះឡើងទៅជាសង្គ្រាមពាណិជ្ជកម្មពេញលេញ។ នេះបើតាមសារព័ត៌មាន USA Today ចេញផ្សាយកាលពីថ្ងៃទី១៥ ខែតុលា ឆ្នាំ២០២៥។
លោក ត្រាំ ត្រូវបានសួរដោយអ្នកសារព័ត៌មានថា តើសហរដ្ឋអាមេរិកនឹងធ្លាក់ចូលទៅក្នុង សង្គ្រាមពាណិជ្ជកម្មអូសបន្លាយជាមួយប្រទេសចិនដែរឬទេ បើគ្មានកិច្ចព្រមព្រៀងណាមួយត្រូវបានសម្រេចជាមួយប្រធានាធិបតី ស៊ី ជិនភីង ក្នុងកិច្ចប្រជុំនៅប្រទេសកូរ៉េខាងត្បូង នៅចុងខែនេះ? លោក ត្រាំ បានប្រកាសថា «យើងស្ថិតក្នុងសង្គ្រាមនោះហើយ»។ សហរដ្ឋអាមេរិកកំពុងដាក់ពន្ធ ១០០% លើទំនិញចិន។ បើគ្មានការយកពន្ធទេ យើងនឹងគ្មានទទួលបានអ្វីសោះ»។
កាលពីថ្ងៃទី១៤ ខែតុលា កន្លងទៅ លោក ត្រាំ បានប្រកាសថា អាមេរិកនឹងឈប់ទិញប្រេងឆាពីចិន ដើម្បីឆ្លើយតបទៅនឹងការផ្អាករបស់ចិន ចំពោះការនាំចូលសណ្តែកសៀងរបស់អាមេរិក។ យោងតាមសមាគមសណ្តែកសៀងអាមេរិក ប្រទេសចិនឥឡូវនេះគឺជាអ្នកទិញធំបំផុតរបស់អាមេរិក សម្រាប់ផលិតផលកសិកម្មមួយនេះ។
ការសម្រេចចិត្តរបស់ចិនបញ្ឈប់ការទិញសណ្តែកសៀងពីអាមេរិក ត្រូវបានមើលឃើញថាជាការសងសឹកចំពោះពន្ធគយដែលលោក ត្រាំ បានដាក់កាលពីខែមេសា។ ផ្ទុយទៅវិញ ប្រទេសដែលមានប្រជាជនជាង ១,៤ពាន់លាននាក់មួយនេះ បានបង្វែរទិសទៅនាំចូលសណ្តែកសៀងពីប្រទេសអាហ្សង់ទីន និងប្រេស៊ីលជំនួសវិញ។
នៅក្នុងខែសីហាកន្លងទៅ សហរដ្ឋអាមេរិក និងចិនបានឈានដល់កិច្ចព្រមព្រៀងមួយ ដើម្បីផ្អាកពន្ធសម្រាប់រយៈពេល៩០ថ្ងៃ ប៉ុន្តែការរឹតបន្តឹងរបស់ចិនលើការនាំចេញធនធានរ៉ែកម្ររបស់ខ្លួន កាលពីថ្ងៃទី១០ ខែតុលា បានធ្វើឱ្យសង្គ្រាមពាណិជ្ជកម្មកម្រើកឡើងសាជាថ្មីម្តងទៀត។ ជាការឆ្លើយតបទៅនឹងវិធានការនោះ លោក ត្រាំ បានប្រកាសថា សហរដ្ឋអាមេរិកនឹងដាក់ពន្ធ ១០០% លើទំនិញរបស់ចិន ចាប់ពីថ្ងៃទី១ ខែវិច្ឆិកា តទៅ ដោយបន្ថែមពីលើអត្រា ៣០% លើទំនិញចិនដែលមានស្រាប់។
យោងតាមគម្រោង លោក ត្រាំ និងប្រធានាធិបតីចិន ត្រូវបានរំពឹងថា នឹងជួបក្រៅកិច្ចប្រជុំកំពូលនៃកិច្ចសហប្រតិបត្តិការសេដ្ឋកិច្ចអាស៊ីប៉ាស៊ីហ្វិក (APEC) នៅទីក្រុងសេអ៊ូល ប្រទេសកូរ៉េខាងត្បូង នៅថ្ងៃទី៣១ ខែតុលា។
គួរកត់សម្គាល់ផងដែរថា កាលពីថ្មីៗនេះ រដ្ឋមន្ត្រីក្រសួងរតនាគារអាមេរិក លោក Scott Bessent និងក្រសួងពាណិជ្ជកម្មរបស់ចិន បានព្យាយាមធានាដល់បណ្តាអ្នកវិនិយោគ និងទីផ្សារ ដោយងសង្កត់ធ្ងន់ថា ក្រុមចរចារបស់ប្រទេសទាំងពីរ នៅតែសម្របសម្រួលយ៉ាងជិតស្និទ្ធ និងឱកាសឆ្ពោះទៅមុខពីកិច្ចព្រមព្រៀងផ្អាកពន្ធគយនាពេលបច្ចុប្បន្ន៕
ចែករំលែកព័តមាននេះ