រាជធានីភ្នំពេញ ៖ ឯកឧត្តម អ៊ាង សុផល្លែត រដ្ឋមន្ត្រីក្រសួងបរិស្ថាន ក្នុងឱកាសអញ្ជើញជាអធិបតីបិទយុទ្ធនាការប្រចាំឆ្នាំផ្ទៃមេឃពណ៌ខៀវ និងការបញ្ចេញឧស្ម័នស្មើសូន្យឆ្នាំ២០៥០ កាលពីថ្ងៃទី១៦ ខែតុលា…
រាជធានីភ្នំពេញ ៖ ឯកឧត្តម អ៊ាង សុផល្លែត រដ្ឋមន្ត្រីក្រសួងបរិស្ថាន ក្នុងឱកាសអញ្ជើញជាអធិបតីបិទយុទ្ធនាការប្រចាំឆ្នាំផ្ទៃមេឃពណ៌ខៀវ និងការបញ្ចេញឧស្ម័នស្មើសូន្យឆ្នាំ២០៥០ កាលពីថ្ងៃទី១៦ ខែតុលា ឆ្នាំ២០២៥ កន្លងទៅ នៅវិទ្យាស្ថានបច្ចេកវិទ្យាកម្ពុជា បានមានប្រសាសន៍ថា នៅឆ្នាំ២០២៦ រោងចក្រទាំងអស់ត្រូវតែបំពាក់ឧបករណ៍ស្វ័យត្រួតពិនិត្យតាមដានគុណភាពខ្យល់ ។
ក្រសួងបរិស្ថាននឹងសហការជាមួយក្រសួងពាណិជ្ជកម្ម ចាត់វិធានការច្បាប់ ប្រសិនបើក្រុមហ៊ុនណាល្មើសគុណភាពខ្យល់ ឬធ្វើឱ្យខ្យល់របស់យើងមិនស្អាត ។ ឯកឧត្តមរដ្ឋមន្ត្រីថ្លែងទៀតថា អង្គការសហប្រជាជាតិបានរកឃើញមូលហេតុចម្បងៗនៃវិស័យចំនួន៦ រួមមានវិស័យថាមពល វិស័យឧស្សាហកម្ម វិស័យកសិកម្ម វិស័យព្រៃឈើ វិស័យគីមី និងវិស័យសំរាម ដែលធ្វើឱ្យមានការប្រែប្រួលអាកាសធាតុ និងមានការកើនឡើងកម្តៅផែនដី ។
ឯកឧត្តមបានថ្លែងបន្ថែមថា កម្ពុជាបានចូលរួមឆ្លើយតបនឹងបញ្ហាប្រែប្រួលអាកាសធាតុ ស្របតាមគោលនយោបាយយុទ្ធសាស្ត្ររបស់រាជរដ្ឋាភិបាល ក្នុងនោះ សម្តេចបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជាបានចង្អុលបង្ហាញដល់ក្រសួងបរិស្ថានឲ្យដាក់ចេញយុទ្ធសាស្ត្រចក្រាវិស័យបរិស្ថានឆ្នាំ២០២៣-២០២៨ ដែលមានសសរស្តម្ភចំនួន៣ គឺភាពស្អាត ភាពបៃតង និងចីរភាព ។
ភាពស្អាតនៃយុទ្ធសាស្ត្រចក្រាវិស័យបរិស្ថាន បានគ្របដណ្តប់លើវិស័យចំនួន៥ខាងលើ ដែលបង្កឱ្យមានឧស្ម័នផ្ទះកញ្ចក់ លើកលែងតែវិស័យព្រៃឈើ ។ឯកឧត្តមរដ្ឋមន្ត្រី អ៊ាង សុផល្លែត បានសង្កត់ធ្ងន់ថា ក្រសួងបរិស្ថានប្តេជ្ញាដោះស្រាយបញ្ហានៃការប្រែប្រួលអាកាសធាតុលើវិស័យទាំងអស់នេះ ដើម្បីកម្ពុជាឈានឆ្ពោះទៅជាប្រទេសអព្យាក្រឹតកាបូននៅឆ្នាំ២០៥០ ។
ជាមួយគ្នានេះ ក្រសួងបរិស្ថានកំពុងរៀបចំកោះស្រឡៅ នៅក្នុងខេត្តតកោះកុង ជាកោះអព្យាក្រឹតកាបូន ។ ក្រសួងបរិស្ថាន នឹងផ្តល់ជូនប្រជាពលរដ្ឋនៅទីនោះ ប្រើប្រាស់អំពូលអគ្គិសនីដើរដោយពន្លឺព្រះអាទិត្យ និងរៀបចំដាក់ឧបករណ៍ត្រួតពិនិត្យគុណភាពខ្យល់ ការរៀបចំហេដ្ឋារចនាសម្ព័នគ្រប់គ្រងសំរាម សំណល់ប្លាស្ទិក និងជំរុញការគ្រប់គ្រងធនធានធម្មជាតិ ដាំស្តារព្រៃកោងកាងជាពិសេស ។
ក្នុងឱកាសនោះដែរ ឯកឧត្តមរដ្ឋមន្ត្រី បានថ្លែងអំពាវនាវឱ្យមានការចូលរួមក្នុងយុទ្ធនាការរបស់ក្រសួងបរិស្ថាន ដែលបានអនុវត្តកន្លងមកនិងរួមគ្នា«យកជំហានឆ្លាតវៃរួបរួមគ្នា»(take smart, united steps) ឆ្ពោះទៅរកខ្យល់ស្អាតនិងការគ្រប់គ្រងសំរាម និងសំណល់រឹង ប្រកបដោយចីរភាព ៕
ចែករំលែកព័តមាននេះ