ទីក្រុងវ៉ាស៊ីនតោន៖ លោកត្រាំព្រមានក្រុមហាម៉ាស់កាលពីយប់មិញថាបើសិនពួកគេនៅតែបន្តកាប់សម្លាប់ក្រុមដែលប្រឆាំងនឹងខ្លួនតទៅទៀត លោកគ្មានជម្រើសអ្វីក្រៅពីចូលធ្វើអន្តរាគមន៍ ហើយសម្លាប់ក្រុមហាម៉ាស់វិញទេ។ ការព្រមាននេះបន្ទាប់ពីគេទទួលដំណឹងថាក្រុមហាម៉ាស់ចាប់ផ្ដើមពង្រឹងកម្លាំងរបស់ខ្លួនឡើងវិញ។ គេឃើញក្រុមយុទ្ធជនរបស់ហាម៉ាស់បង្ហាញវត្តមាននៅតាមដងផ្លូវ និងចាប់ក្រុមដែលកាច់កុងគ្នា និងដែលធ្លាប់ឡើងចាងកាលពីពេលអ៊ីស្រាអែលនៅគ្រប់គ្រងតំបន់ហ្កាហ្សា។ ក្រុមដែលមានអ៊ីស្រាអែលនៅពីក្រោយខ្នងនោះត្រូវហាម៉ាស់ចាប់យកទៅបាញ់ចោល និងថតបង្ហោះតាមបណ្ដាញសង្គម។
កាលពីមុននេះ លោកត្រាំថ្លែងថាក្រុមហាម៉ាស់ត្រូវតែកាត់រំសាយអាវុធឱ្យអស់ទោះបីដោយសន្តិវិធី ឬដោយការប្រើប្រាស់កម្លាំង។ ប៉ុន្តែចុងក្រោយនេះលោកសូមបញ្ជាក់ឱ្យច្បាស់ថាអាមេរិកនឹងមិនបញ្ជូនកងទ័ពទៅតំបន់ហ្កាហ្សាទេ។ លោកថ្លែងថាយើងគ្មានការចាំបាច់ដើម្បីធ្វើរឿងនេះទេ។ មានមនុស្សដែលនៅក្បែរៗនោះរង់ចាំចាត់ការបញ្ហានេះហើយ ហើយយើងរង់ចាំគាំទ្រពីក្រោយខ្នង។ លោកត្រាំមិនបានបញ្ជាក់ថាអ្នកដែលលោកនិយាយនោះចង់សំដៅលើអ៊ីស្រាអែលទេ។ ប៉ុន្តែបើអ៊ីស្រាអែលធ្វើរឿងនេះមែនអាចជាការរំលោភបទឈប់បាញ់។
លោកត្រាំថ្លែងកាលពីយប់ថ្ងៃអង្គារថាហាម៉ាស់បានចាប់ក្រុមបងធំនៅហ្កាហ្សា និងសម្លាប់ចោល។ លោកថាលោកមិនសូវខ្វល់អំពីបញ្ហានេះប៉ុន្មានទេបើនិយាយឱ្យស្មោះត្រង់ទៅ។ ប៉ុន្តែលោកថាការអត់ធ្មត់របស់លោកមានកំណត់។ បើហាម៉ាស់សម្លាប់មនុស្សច្រើនពេក លោកអាចនឹងកែប្រែចិត្ត។ ពួកគេត្រូវតែទម្លាក់អាវុធចុះ ត្រូវតែទម្លាក់អាវុធចុះឱ្យបានឆាប់ ហើយទម្លាក់ដោយការបង្ខំថែមទៀតផង។
ក្រុមហាម៉ាស់ថ្លែងថាខ្លួនចង់ឃើញតំបន់ហ្កាហ្សាមានស្ថិរភាព និងសណ្ដាប់ធ្នាប់ល្អឡើងវិញ។ កាលពីមុននេះមានសេចក្ដីរាយការណ៍ថាក្រុមបងធំដែលប្រឆាំងនឹងក្រុមហាម៉ាស់បានឆ្លៀតឱកាសដែលហាម៉ាស់ជាប់ដៃនៅក្នុងសង្គ្រាមពួកគេអុកឡុកតំបន់ហ្កាហ្សាសម្បើមណាស់។ ជួនកាលពួកគេឆក់ប្លន់ជំនួយមនុស្សធម៌ដើម្បីទុកលក់នៅក្នុងតម្លៃថ្លៃៗ។ ហេតុនេះហើយជនស៊ីវិលប៉ាឡេស្ទីនខ្លះត្រូវដាច់ពោះស្លាប់ក៏ដោយសារក្រុមទាំងនេះដែរ។
កាលពីសប្ដាហ៍មុន អាមេរិកប្រកាសថាខ្លួនត្រៀមបញ្ជូនទាហាន២រយនាក់ទៅអ៊ីស្រាអែលដើម្បីជួយផ្ដល់ការគាំទ្រ និងឃ្លាំមើលការអនុវត្តបទឈប់បាញ់នៅតំបន់ហ្កាហ្សា។ ប៉ុន្តែមន្ត្រីរដ្ឋាភិបាលអាមេរិកបញ្ជាក់ថាទាហានរបស់ខ្លួននឹងមិនមានវត្តមាននៅតំបន់ហ្កាហ្សាទេ។ អ៊ីស្រាអែលឥឡូវនេះហាក់ដូចជាតឹងចិត្តណាស់នៅពេលសាកសពរបស់ចំណាប់ខ្មាំងបញ្ជូនទៅឱ្យពួកគេមានភាពយឺតយ៉ាវ។ នេះបើយោងតាមការផ្សាយរបស់អេភី (AP) និងប្រភពដទៃទៀត៕
ចែករំលែកព័តមាននេះ