ទីក្រុងវ៉ាស៊ីនតោន៖ លោកត្រាំ និងលោកពូទីនឯកភាពគ្នាថានឹងជួបគ្នាជាថ្មីដើម្បីដោះស្រាយបញ្ហាអ៊ុយក្រែន លើកនេះជួបគ្នានៅប្រទេសហុងគ្រី។ នេះជាព្រឹត្តិការណ៍វិវត្តដ៏សំខាន់មួយចំពេលដែលទីក្រុងម៉ូស្គូកំពុងខ្វាយខ្វល់អំពីគម្រោងផ្ដល់ជំនួយយោធាថ្មីទៅឱ្យអ៊ុយក្រែន។ លោកទាំង២អាចនឹងជួបគ្នារយៈពេល២សប្ដាហ៍ខាងមុខនេះនៅទីក្រុងប៊ូដាប៉ែស (Budabpest) ប្រទេសហុងគ្រី។ នេះបើយោងតាមការបញ្ជាក់របស់លោកត្រាំក្រោយការសន្ទនាគ្នាតាមទូរស័ព្ទរយៈពេលជាង២ម៉ោង។
លោកត្រាំចាត់ទុកការសន្ទនាគ្នានោះប្រកបដោយសាច់ការ។ វិមានក្រឹមឡាំងបញ្ជាក់ថាពិតជាមានគម្រោងជួបគ្នាមែន។ ប៉ុន្តែភាគីទាំង២មិនទាន់កំណត់ពេលវេលាច្បាស់លាស់នៅឡើយទេ។ គម្រោងនេះកើតឡើងចំពេលលោកហ្សេឡិនស្គីកំពុងស្ថិតនៅវ៉ាស៊ីនតោនដើម្បីបញ្ចុះបញ្ចូលឱ្យអាមេរិកផ្ដល់ជំនួយយោធាបន្ថែមទៀត។ ជាពិសេស អ៊ុយក្រែនចង់បានមីស៊ីលថូម៉ាកហក (Tomahawk)។
គម្រោងផ្ដល់ជំនួយសម្រាប់អ៊ុយក្រែនគ្មានភាពប្រាកដប្រជា
ប៉ុន្មានថ្ងៃចុងក្រោយនេះ សេតវិមានហាក់ដូចជាចង់ផ្ដល់ជំនួយបន្ថែមទៀតទៅឱ្យអ៊ុយក្រែន ហើយហាក់ដូចជាមានអារម្មណ៍ខឹងសម្បារចំពោះលោកពូទីនពិតមែនហើយ។ ក៏ប៉ុន្តែបន្ទាប់ពីសន្ទនាគ្នាជាមួយលោកពូទីន លោកត្រាំហាក់ដូចជាកែប្រែជំហរជាថ្មី និងប្រើសម្ដីបែបទន់ភ្លន់ដាក់រុស្ស៊ីវិញម្ដង។ ហេតុនេះហើយធ្វើឱ្យគេមានចម្ងល់ថាតើអាមេរិកអាចនឹងផ្ដល់ជំនួយសម្រាប់អ៊ុយក្រែនឱ្យបានពេញទំហឹងដែរឬទេ។
ពូទីនប្រាប់ត្រាំថាគួរកុំផ្ដល់មីស៊ីលថូម៉ាហកទៅឱ្យអ៊ុយក្រែន
នៅក្នុងការសន្ទនាគ្នាកាលពីយប់មិញនោះ លោកពូទីនប្រាប់លោកត្រាំថាបើសិនអាមេរិកផ្ដល់មីស៊ីលរយៈចម្ងាយឆ្ងាយទៅឱ្យអ៊ុយក្រែននឹងធ្វើឱ្យប៉ះពាល់កិច្ចខិតខំប្រឹងប្រែងរកសន្តិភាព ហើយនឹងប៉ះពាល់ទំនាក់ទំនងម៉ូស្គូ និងវ៉ាស៊ីនតោនជាមិនខាន។ នេះបើយោងតាមលោកយូរី អ៊ូសាកូស (Yuri Ushakov) ជាជំនួយការរបស់លោកពូទីន។ ក្រោយមក លោកត្រាំក៏បាននិយាយអំពីរឿងនេះប្រាប់អ្នកសារព័ត៌មានផងដែរ។ លោកនិយាយបែបលេងសើចថា «តើអ្នកគិតថាគាត់នឹងនិយាយអ្វី? តើគាត់និយាយថាសូមលោកលក់មីស៊ីលថូម៉ាហកឱ្យអ៊ុយក្រែនចុះមែនទេ? អត់ទេ គាត់មិនចង់ឃើញមីស៊ីលថូម៉ាហកធ្លាក់ទៅក្នុងដៃអ៊ុយក្រែនទេ»។
លោកត្រាំចាត់ទុកថាមីស៊ីលនេះជាអាវុធដ៏សាហាវណាស់ កុំលេងជាមួយវាឱ្យសោះ។ លោកហ្សេឡិនស្គីដែលកំពុងស្ថិតនៅវ៉ាស៊ីនតោនបានឆ្លៀតបង្ហោះសារនៅលើបណ្ដាញអ៊ិច។ លោកសរសេររៀបរាប់ថាលោកពូទីនចាប់ផ្ដើមស្ទុះស្ទាររកការចរចាគ្នាហើយ។ នេះជាការបង្ហាញថាគាត់ស្ថិតនៅក្នុងជំហរត្រៀមទប់ទល់។ នៅពេលនិយាយអំពីមីស៊ីលថូម៉ាហក រុស្ស៊ីប្រញាប់ស្ទុះស្ទាររកការសន្ទនាគ្នាយ៉ាងលឿន។
គួរកត់សម្គាល់ថាការសម្រេចជ្រើសរើសយកប្រទេសហុងគ្រីធ្វើជាកន្លែងជួបគ្នាកម្រិតកំពូលរវាងលោកត្រាំ និងលោកពូទីននោះជាព្រឹត្តិការណ៍ដ៏គួរឱ្យចាប់អារម្មណ៍។ លោកពូទីនសព្វថ្ងៃនេះកំពុងស្ថិតនៅក្នុងនិវេទន៍ក្រហមរបស់តុលាការព្រហ្មទណ្ឌអន្តរជាតិដែលត្រូវចាប់ខ្លួន។ ហេតុនេះ ការធ្វើដំណើររបស់លោកមានដែនកំណត់។ លោកធ្វើដំណើរទៅប្រទេសណាដែលគួរឱ្យជឿទុកចិត្តតែប៉ុណ្ណោះ។
នាយករដ្ឋមន្ត្រីហុងគ្រី លោកអ័របេន (Orban) បង្ហោះសារនៅលើបណ្ដាញអ៊ិចបញ្ជាក់ពីការត្រៀមខ្លួនធ្វើជាម្ចាស់ផ្ទះរៀបចំគម្រោងជួបគ្នាកម្រិតកំពូល។ លោកអ័របេនចាត់ទុកថានេះជាដំណឹងដ៏ធំមួយសម្រាប់អ្នកស្រឡាញ់សន្តិភាពនៅទូទាំងសាកល។ យើងត្រៀមខ្លួនរួចហើយ។ លោកអ័របេនថ្លែងថាលោកបានសន្ទនាគ្នាតាមទូរស័ព្ទជាមួយលោកត្រាំ។ ប្រទេសរបស់លោកចាប់ផ្ដើមរៀបចំជាបណ្ដើរៗហើយ។ នេះបើតាមការផ្សាយរបស់រ៉យទ័រ និងប្រភពដទៃទៀត៕
ចែករំលែកព័តមាននេះ