ខេត្តស្ទឹងត្រែង ៖ ផ្លូវបេតុងគម្រោងលទ្ធកម្មឃុំដែលទើបនឹងសាងសង់រយៈពេលប្រមាណជា ២ខែត្រូវគេប្រទះឃើញមានស្នាមប្រេះជាច្រើនកន្លែងជាមួយនឹងសាច់បេតុងផុយដែលគេសង្ស័យថា ការលាយល្បាយបញ្ចូលគ្នាទៅជាបេតុង មិនសមទៅតាមស្តង់ដារ ។ ពលរដ្ឋនៅភូមិកណ្ដាល ឃុំព្រះរំកិលស្រុកបុរីអូស្វាយសែនជ័យ ដែលអ្នករស់នៅប្របនឹងបណ្ដោយផ្លូវបេតុងនោះបានរៀបរាប់ថា…
ខេត្តស្ទឹងត្រែង ៖ ផ្លូវបេតុងគម្រោងលទ្ធកម្មឃុំដែលទើបនឹងសាងសង់រយៈពេលប្រមាណជា ២ខែត្រូវគេប្រទះឃើញមានស្នាមប្រេះជាច្រើនកន្លែងជាមួយនឹងសាច់បេតុងផុយដែលគេសង្ស័យថា ការលាយល្បាយបញ្ចូលគ្នាទៅជាបេតុង មិនសមទៅតាមស្តង់ដារ ។ ពលរដ្ឋនៅភូមិកណ្ដាល ឃុំព្រះរំកិលស្រុកបុរីអូស្វាយសែនជ័យ ដែលអ្នករស់នៅប្របនឹងបណ្ដោយផ្លូវបេតុងនោះបានរៀបរាប់ថា ៖ ចាប់តាំងពីផ្លូវបេតុងនេះសាងសង់ឡើង និងរួចរាល់ជាស្ថាពរមិនបានប៉ុន្មានផងក៏ស្រាប់តែមានស្នាមប្រេះបេតុងជាច្រើនកន្លែង និងបណ្ដោយចំកណ្តាលសាច់បេតុងផងដែរ ជាពិសេសចំណុចខ្លះសាច់បេតុងផុយដែលមើលទៅហាក់ដូចមានតែខ្សាច់ និងថ្ម ចំណែកស៊ីម៉ង់ត៌តិចតួចបំផុត ។
បេតុងនោះសូម្បីតែយកដៃទៅកេះក៏របើកដុំថ្មចេញមកដែរ ។ ពួកគាត់បន្តថា សូម្បីប្រឡាយអូរដាក់លូក៏កសាងមិនត្រឹមត្រូវដែរ ពោលគឺប្រឡាយអូរនោះកាយមុខទឹកបន្តិចបន្តួចដាក់តម្របលូមូលមុខ ១ម៉ែត្ររួចចាក់បេតុងពីលើភ្ជាប់ទៅនឹងផ្លូវថ្នល់តែម្ដង ។
ក្រោយការផ្ដល់ព័ត៌មានពីប្រជាពលរដ្ឋ សារព័ត៌មានបានចុះទៅពិនិត្យ និងផ្ទៀងផ្ទាត់លើកំណត់ផ្លូវបេតុងនោះក៏ឃើញជាក់ស្ដែងដូចការរៀបរាប់របស់ប្រជាពលរដ្ឋពិតប្រាកដមែន ។ មន្ត្រីនគរបាលប៉ុស្តិ៍រដ្ឋបាលឃុំព្រះរំកិលបានទទួលស្គាល់ថា ផ្លូវមួយខ្សែនេះទើបនឹងសាងសង់ ហើយក៏ពុំមានរថយន្តធុនធ្ងន់បើកបរឆ្លងកាត់នោះដែរ មិនគួររលេះរលួយដូច្នេះសោះ ។
ទាក់ទិនករណីខាងលើ កោះសន្តិភាព មិនអាចទំនាក់ទំនងទៅលោក ភិវមឿងឃុន មេឃុំព្រះរំកិល និងជាម្ចាស់គម្រោងបាននោះទេដោយសារទូរស័ព្ទចូលជាច្រើនថ្ងៃពុំមានអ្នកទទួល ។ ពាក់ព័ន្ធទៅនឹងការសាងសង់ផ្លូវបេតុងក្នុងខេត្តស្ទឹងត្រែងក្នុងគម្រោងលទ្ធកម្មឃុំសង្កាត់ ២០២៥ ក្រុមហ៊ុនដែលមានឈ្មោះលេចធ្លោ គឺក្រុមហ៊ុន វេង លាប ដែលឆ្នើមក្នុងការដេញថ្លៃទាបជាងគេបំផុតស្ទើរគ្រប់គម្រោង ។
គេសង្កេតឃើញក្រោយការដេញថ្លៃប្រកួតប្រជែងដណ្ដើមគម្រោងសាងសង់ផ្លូវបេតុងបានជោគជ័យ ហើយក្រុមហ៊ុនបានអនុវត្តន៍នីតិវិធីចុះកិច្ចសន្យាជាមួយម្ចាស់គម្រោងឈានទៅអនុវត្តន៍ការសាងសង់ ស្ទើររាល់ផ្លូវបេតុងសាងសង់ដោយក្រុមហ៊ុន វេង លាប ពុំទទួលបានលទ្ធផលល្អនោះទេ ពោលគឺស្ទើរគ្រប់ផ្លូវមានស្នាមប្រេះជាច្រើនកន្លែង ទាំងទទឹង និងបណ្តោយទ្រូងផ្លូវ ។ ដូចជាផ្លូវបេតុងសង្កាត់ស្ទឹងត្រែង ត្រូវម្ចាស់គម្រោងចាប់អោយសាងសង់ផ្លូវសង ជំនួសអោយការគាស់កាយសាងសង់ថ្មី បន្ទាប់ពីរកឃើញមានកំហុសលើគុណភាព ។ ផ្លូវបេតុងក្នុងឃុំតាឡាត ស្រុកសេសានក៏បានទទួលនូវសកម្មភាពដូចគ្នានេះដែរ ។
លោក មូន ខឹប មេឃុំតាឡាត ស្រុកសេសាន បានប្រាប់កោះសន្តិភាព ថា គោលជំហររបស់គណៈកម្មការលទ្ធកម្ម គឺអោយក្រុមហ៊ុនជួសជុលឡើងវិញ ហើយក្រុមហ៊ុនក៏បានឯកភាពផងដែរតែរហូតមកទល់ពេលនេះបាត់ស្ងាត់ឈឹងមិនទាន់ឃើញមកធ្វើ ។ ប្រជាពលរដ្ឋបានលើកឡើងថា ផ្លូវបេតុងធ្វើមិនបានប៉ុន្មានងាកប្រេះខូចៗ មិនដឹងថា ធ្វើយ៉ាងម៉េចទេ ដឹងថាលោកមេឃុំគាត់មិនសូវយល់ អ្នកសាងសង់ និងដេញថ្លៃបានហើយម៉េចមិនធ្វើអោយជាប់ល្អ ។
លោក វេង លាប ក្រុមហ៊ុន វេង លាប បាននិយាយថា ផ្លូវបេតុងណាធ្វើមិនប្រេះ ។ ឆ្លើយតបទៅនឹងការលើកឡើងរបស់ក្រុមហ៊ុនមួយនេះ ជាក់ស្តែងផ្លូវបេតុងសរុបប្រវែង ១៦០ម៉ែត្រត្រូវបានធ្វើសងទៅម្ចាស់គម្រោងសង្កាត់ស្ទឹងត្រែង ដោយមិនមានស្នាមប្រេះនោះឡើយ ។
នាយករងទីចាត់ការផែនការវិនិយោគរដ្ឋបាលខេត្តស្ទឹងត្រែងលោក មី សោភា មិនអាចទំនាក់ទំនងតាមទូរស័ព្ទបានទេដោយសារបេសកកម្មចុះទៅមូលដ្ឋានពុំមានសេវា ។
ពាក់ព័ន្ធទៅនិងមន្ត្រីបច្ចេកទេសគួររំលឹកថា ក្រុមហ៊ុន វេង លាប ត្រូវបានដាក់ចូលបញ្ជីខ្មៅជារៀងរហូតនៅខេត្តព្រះវិហារ ដោយក្រុមហ៊ុនបានអនុវត្តខុសពីនីតិវិធីលទ្ធកម្មគម្រោងមូលនិធិឃុំ សង្កាត់ ដោយបង្ខំគណៈកម្មការលទ្ធកម្មឃុំឱ្យអនុវត្តខុសពីនីតិវិធី តែគណៈកម្មការលទ្ធកម្មមិនព្រម ហើយសុំថតសំណុំឯកសារដេញថ្លៃក្រុមហ៊ុនដែលបានដាក់សំណើដេញថ្លៃ និងបង្កការអុកឡុកយ៉ាងអនាធិបតេយ្យ មិនគោរពតាមនីតិវិធីគោលការណ៍ណែនាំ ដូចមានចែងក្នុងសៀវភៅណែនាំស្តីពីការអនុវត្តគម្រោងមូលនិធិឃុំ សង្កាត់ និងលិខិតបទដ្ឋានគតិយុត្តជាធរមាន ។
ក្រុមហ៊ុននេះក៏បានបដិសេធពីគណៈកម្មការលទ្ធកម្មឃុំ សង្កាត់ចំពោះការចូលរួមដាក់សំណើរដេញថ្លៃគម្រោងមួយចំនួននៅតាមបណ្តាខេត្តផងដែរ ។
ព័ត៌មានបន្ថែមនឹងមានផ្សាយជូននៅលើទំព័រកាសែតកោះសន្តិភាព ៕
ចែករំលែកព័តមាននេះ