ខេត្តព្រះសីហនុ ៖ ប្រជាពលរដ្ឋរាយការណ៍មកសមត្ថកិច្ចថា មានករណីហិ.ង្សាដោយចេតនាមួយកើតឡើងកាលពីវេលាម៉ោងប្រហែល២១និង០០នាទីយប់ថ្ងៃទី០៥ ខែធ្នូ ឆ្នាំ២០២៤ បង្កដោយភាគី២ ក្រុមភាគីទី១ ក្រុមដឹកជញ្ជូន WowNow…
ខេត្តព្រះសីហនុ ៖ ប្រជាពលរដ្ឋរាយការណ៍មកសមត្ថកិច្ចថា មានករណីហិ.ង្សាដោយចេតនាមួយកើតឡើងកាលពីវេលាម៉ោងប្រហែល២១និង០០នាទីយប់ថ្ងៃទី០៥ ខែធ្នូ ឆ្នាំ២០២៤ បង្កដោយភាគី២ ក្រុមភាគីទី១ ក្រុមដឹកជញ្ជូន WowNow និងភាគីទី២ ក្រុមម៉ូតូកង់បី បានប្រើដៃវាយគ្នា និងប្រើកាំបិតកាប់ចាក់គ្នាទៅវិញទៅមក នៅចំណុចម្តុំសាខាពន្ធដាខេត្តព្រះសីហនុ ស្ថិតក្នុងភូមិ១ សង្កាត់លេខ៣ ក្រុង-ខេត្តព្រះសីហនុ ។
បន្ទាប់ពីទទួលបានព័ត៌មានភ្លាម លោកឧត្តមសេនីយ៍ឯក ស រដ្ឋា អគ្គស្នងការរង និងជាស្នងការនគរបាលខេត្តព្រះសីហនុ បានចាត់ឱ្យកម្លាំងជំនាញ នៃស្នងការដ្ឋាននគរបាលខេត្តព្រះសីហនុ បានចុះទៅដល់ទីតាំងកើតហេតុ តែក្រុមជនសង្ស័យទាំង ០២ក្រុម បានរត់គេចខ្លួនបាត់អស់ ។
ក្រោយមក កម្លាំងជំនាញបានធ្វើការស្រាវជ្រាវយ៉ាងយកចិត្តទុក រហូតដល់វេលាម៉ោង២១និង៣០នាទីយប់ថ្ងៃខែឆ្នាំដដែល កម្លាំងសមត្ថកិច្ចបានធ្វើការឃាត់ខ្លួនក្រុមជនសង្ស័យភាគីម៉ូតូកង់បី ចំនួន០៩នាក់ ព្រមទាំងដកហូតបានម៉ូតូកង់បីចំនួន ៨គ្រឿង នៅចំណុចមុខការិយាល័យចរាចរណ៍ផ្លូវគោក ស្ថិតក្នុងភូមិ៣ សង្កាត់លេខ៣ ក្រុង-ខេត្តព្រះសីហនុ និងបានបន្តឃាត់ខ្លួនបានបក្ខពួកក្រុមម៉ូតូកង់បី ចំនួន៩នាក់ផ្សេងទៀត ដោយដកហូតបានម៉ូតូកង់បីចំនួន ០៩គ្រឿង បន្ថែមទៀត នៅចំណុចម្តុំព្រៃស្វា ស្ថិតក្នុងភូមិ១ សង្កាត់លេខ៣ ក្រុង-ខេត្តព្រះសីហនុ យកមកស្នងការដ្ឋាននគរបាលខេត្តព្រះសីហនុ ដើម្បីសួរនាំ និងស្រាវជ្រាវបន្ត ។
បន្ទាប់ពីកម្លាំងសមត្ថកិច្ច បន្តធ្វើការស្រាវជ្រាវរហូតឈានចូលយប់ថ្ងៃទី០៦ ខែធ្នូ ឆ្នាំ២០២៤ សមត្ថកិច្ច បានបន្តឃាត់ខ្លួនក្រុមដឹកជញ្ជូន WowNow ជាបន្តបន្ទាប់សរុប ចំនួន ១១នាក់បន្ថែមទៀត ជនជាតិខ្មែរ ដែលសង្ស័យពាក់ព័ន្ធនឹងករណីខាងលើ យកមកសួរនាំនៅការិយាល័យនគរបាលព្រហ្មទណ្ឌកម្រិតស្រាល នៃស្នងការដ្ឋាននគរបាលខេត្តព្រះសីហនុ ។
ក្នុងកិច្ចប្រតិបត្តិការនេះ កម្លាំងជំនាញឃាត់ខ្លួនបានមនុស្សចំនួន ២៩នាក់ (ក្រុមម៉ូតូកង់បី១៨នាក់ និងក្រុមដឹកជញ្ជូន WowNow ១១នាក់) ។
វត្ថុតាងចាប់យកបានជាក់ស្តែង មានម៉ូតូកង់បី ចំនួន ១៧គ្រឿង ម៉ូតូចំនួន ០៧គ្រឿង និងទូរសព្ទមួយចំនួន ។ ក្នុងចំណោមជនសង្ស័យចំនួន ២៩នាក់ ក្នុងនោះ រកឃើញម្នាក់ មានសារធាតុញៀនក្នុងទឹកនោម ។
បច្ចុប្បន្ន ជនសង្ស័យទាំង ២៩នាក់ រួមនឹងវត្ថុតាងខាងលើ កំពុងឃាត់ខ្លួន និងរក្សាទុកនៅការិយាល័យនគរបាលព្រហ្មទណ្ឌកម្រិតស្រាល នៃស្នងការដ្ឋាននគរបាលខេត្តព្រះសីហនុ ដើម្បីសាកសួរបន្តនីតិវិធីបន្ត ៕
ចែករំលែកព័តមាននេះ