រាជធានីភ្នំពេញ ៖ បុរសម្នាក់ជាអតីតប្តីនៅតែមិនដាច់អាល័យពីប្រពន្ធ លុះពេលឃើញប្រពន្ធមានសង្សារថ្មីក៏បានយកកាំបិតបុ័ងតោអង្គុយចាំលើជណ្តើរមុខបន្ទប់ជួលជាន់ទី២ បង្កឱ្យមានការភ្ញាក់ផ្អើលដល់សមត្ថកិច្ច កងរាជអាវុធហត្ថខណ្ឌកំបូល បានចុះទៅឃាត់និងនាំខ្លួនទាំង៣នាក់យកទៅសួរនាំកាលពីវេលាម៉ោង៩និង៣០នាទីយប់ថ្ងៃទី៧ ខែធ្នូ ឆ្នាំ២០២៤ ស្ថិតនៅបន្ទប់ជួលជាន់ទី២…
រាជធានីភ្នំពេញ ៖ បុរសម្នាក់ជាអតីតប្តីនៅតែមិនដាច់អាល័យពីប្រពន្ធ លុះពេលឃើញប្រពន្ធមានសង្សារថ្មីក៏បានយកកាំបិតបុ័ងតោអង្គុយចាំលើជណ្តើរមុខបន្ទប់ជួលជាន់ទី២ បង្កឱ្យមានការភ្ញាក់ផ្អើលដល់សមត្ថកិច្ច កងរាជអាវុធហត្ថខណ្ឌកំបូល បានចុះទៅឃាត់និងនាំខ្លួនទាំង៣នាក់យកទៅសួរនាំកាលពីវេលាម៉ោង៩និង៣០នាទីយប់ថ្ងៃទី៧ ខែធ្នូ ឆ្នាំ២០២៤ ស្ថិតនៅបន្ទប់ជួលជាន់ទី២ ក្នុងបុរីសែនមនោរម្យ ភូមិកន្ទោកខាងជើង សង្កាត់កន្ទោក ខណ្ឌកំបូល រាជធានីភ្នំពេញ ។
តាមប្រភពពីស្ត្រីជាប្រពន្ធបាននិយាយឱ្យដឹងថា រូបនាងនិងប្តីបានចែកផ្លូវគ្នាអស់រយៈពេលជាងមួយឆ្នាំមកហើយ ក៏ប៉ុន្តែមិនទាន់បានផ្តិតមេដៃលែងលះគ្នាដាច់ស្រេចនៅឡើយទេ ។ ដោយឡែកបុរសដែលជាសង្សារនោះ បាននិយាយថា រូបគេបានមានទំនាក់ទំនងស្នេហាជាមួយស្ត្រីរូបនេះ រយៈពេលជាងមួយខែហើយ ដោយមិនបានដឹងថារូបនាងមានប្តី និងកូននោះទេ ។
បើតាមប្រភពពីស្ត្រីជាប្រពន្ធបានបន្តឱ្យដឹងថា នាងនិងបុរសអតីតជាប្តីបានសែនព្រេនត្រឹមត្រូវចាស់ទុំដឹងឮ គ្រាន់តែមិនបានរៀបការប៉ុណ្ណោះ ហើយបានរស់នៅជាមួយគ្នារហូតដល់បានកូនប្រុសម្នាក់មានអាយុជាង៣ឆ្នាំ ។
រយៈពេលមួយឆ្នាំចុងក្រោយនេះ បុរសជាអតីតប្តីបានលួចលាក់មានស្រីថ្មី ហើយបានទៅរស់នៅជាមួយអ្នកថ្មីរយៈពេលជាងមួយឆ្នាំមកហើយដែរ ។ បន្ទាប់មករូបនាងបានមានទំនាក់ទំនងស្នេហាជាមួយបុរសដែលជាសង្សារក្រោយនេះទើបតែបានជាងមួយខែទេ ។
នៅម៉ោងកើតហេតុខាងលើបុរសជាសង្សារបានយកម្ហូបមកឱ្យរូបនាងដល់បន្ទប់ជួល ខណៈនោះបុរសជាអតីតប្តីបានឃើញរូបនាងនិងបុរសជាសង្សារនោះកំពុងនៅជាមួយគ្នាក្នុងបន្ទប់តែពីរនាក់ក៏កើតរោគប្រចណ្ឌ ហើយភ្លាមៗនោះបុរសជាប្តីបានស្ទុះទៅយកកាំបិតប៉័ងតោមកអង្គុយនៅលើកាំជណ្តើរមុខបន្ទប់ជាន់ទី២ រង់ចាំកាប់បុរសជាសង្សារស្រាយកំហឹង ។ ទើបបង្កឱ្យមានការភ្ញាក់ផ្អើលដល់បងប្អូនប្រជាពលរដ្ឋបានរាយការណ៍ទៅមូលដ្ឋានកងរាជអាវុធហត្ថខណ្ឌកំបូលចុះដល់កន្លែងកើតហេតុធ្វើការឃាត់ខ្លួន និងនាំខ្លួនទាំង៣នាក់ ព្រមទាំងដកហូតបានកាំបិតប៉ុងតោ១ដើមយកទៅជាមួយផងដែរ ។
គេមិនដឹងថា ចំណាត់ការរបស់សមត្ថកិច្ចជុំវិញរឿងជម្លោះស្នេហារវាងអតីតប្តី និងបុរសជាសង្សារអតីតប្រពន្ធ តើឈានដល់ដំណោះស្រាយបែបណាឡើយ ៕
ចែករំលែកព័តមាននេះ