ប្រជាពលរដ្ឋ ៥៦គ្រួសារ ដែលស្ម័គ្រចិត្តចេញពីមាត់ស្ទឹង ទទួលបានដីម្នាក់មួយឡូតិ៍ ពីអភិបាលខេត្តពោធិ៍សាត់
ខេត្តពោធិ៍សាត់ ៖ ប្រជាពលរដ្ឋ ចំនួន ៥៦គ្រួសារ ក្នុងភូមិក្បាលហុង ភូមិវាល ភូមិពោធិ៍កំបោ និងភូមិពោធិ៍ដំណាក់ ឃុំវាល…
ខេត្តពោធិ៍សាត់ ៖ ប្រជាពលរដ្ឋ ចំនួន ៥៦គ្រួសារ ក្នុងភូមិក្បាលហុង ភូមិវាល ភូមិពោធិ៍កំបោ និងភូមិពោធិ៍ដំណាក់ ឃុំវាល ស្រុកកណ្ដៀង ខេត្តពោធិ៍សាត់ ដែលរស់នៅលើដីចំណីមាត់ស្ទឹង ចាប់ពីចំណុចផ្សារក្បាលហុង រហូតដល់ស្ពានអាកាសផ្លូវវាងក្រុង ដែលស្ម័គ្រចិត្តប្រគល់ជូនខេត្ត ដើម្បីធ្វើការអភិវឌ្ឍ រៀបចំសោភ័ណភាពក្រុង បានត្រូវលោកអភិបាលខេត្ត ប្រគល់ដីជូនម្នាក់ៗមួយឡូតិ៍ ដើម្បីរស់នៅស្របច្បាប់ ។
ដីឡូតិ៍ ដែលខេត្តដោះស្រាយជូននេះ ស្ថិតនៅភូមិបឹងយា ឃុំវាល ស្រុកកណ្ដៀង មានចម្ងាយប្រមាណ ០៣គីឡូម៉ែត្រ ពីទីរួមខេត្ត ។
នៅថ្ងៃទី៤-៥ ខែធ្នូ ឆ្នាំ២០២៤ ខេត្តបានឲ្យប្រជាពលរដ្ឋទាំងអស់ មកជួបជុំគ្នា ដើម្បីធ្វើពិធីចាប់ឆ្នោត ទទួលយកដីឡូតិ៍រៀងៗខ្លួន ក្រោមអធិបតីភាពលោក ខូយ រីដា អភិបាល នៃអភិបាលខេត្តពោធិ៍សាត់ និងមានការចូលរួមពីអភិបាលរងខេត្ត មន្ទីរអង្គភាពនានា និងអាជ្ញាធរមូលដ្ឋានគ្រប់លំដាប់ថ្នាក់។ ដីឡូតិ៍ ទាំងនេះ បានចាក់ដីបំពេញ រៀបចំប្រព័ន្ធទឹកភ្លើង ផ្លូវគ្រួសក្រហម ប្រព័ន្ធលូបង្ហូរទឹក ហើយបានចែកចេញជាពីរប្រភេទ គឺប្រភេទ(ក) និងប្រភេទ(ខ) ដែលមានប័ណ្ណកម្មសិទ្ធស្របច្បាប់ ។ ដីឡូតិ៍ ប្រភេទ(ក) ទំហំ១០ម៉ែត្រ គុណនឹង២០ម៉ែត្រ មានចំនួន៣០គ្រួសារ សំដៅលើពលរដ្ឋ ដែលមានលំនៅដ្ឋាន និងរស់នៅអចិន្ត្រៃយ៍។ រីឯប្រភេទ(ខ) ទំហំ០៥ម៉ែត្រ គុណនឹង២០ម៉ែត្រ មានចំនួន២៦គ្រួសារ សំដៅលើពលរដ្ឋ ដែលមានដីទំនេរ ដាំដំណាំ ធ្វើរោងចោល ដែលមិនមែនជាលំនៅដ្ឋានរស់នៅអចិន្ត្រៃយ៍ ។
លោក ខូយ រីដា អភិបាលខេត្តពោធិ៍សាត់ បានអរគុណដល់បងប្អូនទាំងអស់ ដែលមានការយោគយល់ ព្រមប្រគល់ដីច្រាំងស្ទឹង ឲ្យខេត្ត ធ្វើការអភិវឌ្ឍ ពោលគឺឈ្នះឈ្នះទាំងអស់គ្នា។
លោកបានប្តេជ្ញាចិត្តរួមគ្នាជាមួយឯកឧត្តម កែវ រតនៈ រដ្ឋមន្ត្រីក្រសួងរ៉ែ និងថាមពល និងជាប្រធានក្រុមការងាររាជរដ្ឋាភិបាល ចុះជួយមូលដ្ឋានខេត្តពោធិ៍សាត់ ថា នឹងធ្វើឲ្យខេត្តពោធិ៍សាត់ ក្លាយជាទីក្រុងដ៍មនោរម្យ ដ៍មានតម្លៃសម្រាប់ប្រជាជនខេត្តពោធិ៍សាត់ ដោយត្រូវរៀបចំអោយមានសោភ័ណភាព អនាម័យ បរិស្ថាន ការរស់នៅប្រកបដោយផាសុខភាព និងមានសណ្តាប់ធ្នាប់ល្អ ។
លោកបន្តទៀតថា ក្នុងអាណត្តិដឹកនាំរបស់លោក បានចាប់ផ្តើមមុនគេ គឺការរៀបចំច្រាំងស្ទឹង ត្រើយខាងកើត ពីស្ពានថ្មថ្មី ដល់ក្បាលហុង។ ជំហ៊ានទី២ ចាប់ពីចំណុចផ្សារក្បាលហុង រហូតដល់ស្ពានអាកាស និងបន្តរៀបចំជាបន្តបន្ទាប់ទៀត ក្នុងគោលបំណងរួម គឺដើម្បីធ្វើអោយខេត្តពោធិ៍សាត់ ស្រស់បំព្រង ស្របតាមស្ដង់ដាទីក្រុងស្អាត។ ថ្មីៗនេះ ផ្លូវវាងក្រុងស្ពានអាកាស យើងបានរៀបចំភ្លើងបំភ្លឺ និងអនាម័យបរិស្ថានជាប្រចាំ សំដៅទាក់ទាញភ្ញៀវទេសចរជាតិ អន្តរជាតិ និងក្រុមហ៊ុនផ្សេងៗ មកធ្វើវិនិយោគនៅខេត្តពោធិ៍សាត់ ។
លោកអភិបាលខេត្ត បានលើកឡើងពីគុណបំណាច់របស់ឯកឧត្តម ស៊ុយ សែម អតីតប្រធានក្រុមការងាររាជរដ្ឋាភិបាលចុះជួយខេត្តពោធិ៍សាត់ ដែលលោកបានលះបង់គ្រប់បែបយ៉ាង ដើម្បីខេត្តពោធិ៍សាត់ ទាំងគោលនយោបាយ ទាំងការអភិវឌ្ឍ រហូតមានថ្ងៃនេះសម្រាប់រូបឯកឧត្តម និងឯកឧត្តម កែវ រតនៈ ជាអ្នកបន្តវេណ ។
លោក ខូយ រីដា បញ្ជាក់ថា ចំពោះដីឡូតិ៍ ដែលចែកជូនបងប្អូននៅទីនេះ មិនត្រឹមតែចាក់ដី ធ្វើផ្លូវគ្រួសក្រហម តប្រព័ន្ធទឹកភ្លើង ប្រព័ន្ធលូបង្ហូរទឹកប៉ុណ្ណោះទេ នឹងរៀបចំភ្លើងពន្លឺព្រះអាទិត្យ ដាំដើមឈើ និងត្រៀមមូលនិធិធ្វើផ្លូវបេតុងចូលទៀតផង។ ដូច្នេះសូមបងប្អូនរស់នៅឲ្យមានរបៀបរៀបរយ មានអនាម័យបរិស្ថានល្អ គោរពច្បាប់ ចេះយោគយល់គ្នាទៅវិញទៅមក ដើម្បីជាពលរដ្ឋល្អរបស់ខេត្តពោធិ៍សាត់ ៕
ចែករំលែកព័តមាននេះ