ខេត្តបន្ទាយមានជ័យ ៖ កងរាជឣាវុធហត្ថខេត្តបន្ទាយមានជ័យ នៅថ្ងៃទី០៣ ខែធ្នូ ឆ្នាំ២០២៤នេះ បានបញ្ជូនជនសង្ស័យម្នាក់ ទៅសាលាដំបូងខេត្ត ពាក់ព័ន្ធករណីលួចម៉ូតូ ។…
ខេត្តបន្ទាយមានជ័យ ៖ កងរាជឣាវុធហត្ថខេត្តបន្ទាយមានជ័យ នៅថ្ងៃទី០៣ ខែធ្នូ ឆ្នាំ២០២៤នេះ បានបញ្ជូនជនសង្ស័យម្នាក់ ទៅសាលាដំបូងខេត្ត ពាក់ព័ន្ធករណីលួចម៉ូតូ ។
យោងតាមកងរាជឣាវុធហត្ថខេត្តបន្ទាយមានជ័យ បានអោយដឹងថា កាលពីវេលាម៉ោង១១និង០០នាទីថ្ងៃទី៣០ ខែវិច្ឆិកា ឆ្នាំ២០២៤ នៅមូលដ្ឋានកងរាជអាវុធហត្ថក្រុងប៉ោយប៉ែត បានទទួលបណ្តឹងពីជនរងគ្រោះឈ្មោះ វណ្ណា សុជាតា ស្តីពីករណីលួចម៉ូតូ ម៉ូតូម៉ាកហុងដាឌ្រីម ពណ៌ខ្មៅ ផលិតឆ្នាំ២០២៤ ផ្លាកលេខ បាត់ដំបង 1AV-4351 ចំនួន០១គ្រឿង និងទូរសព្ទដៃម៉ាក OPPO ចំនួន០១ គ្រឿង កាលពីវេលាម៉ោង១២ និង០០នាទី ថ្ងៃទី២២ ខែវិច្ឆិកា ឆ្នាំ២០២៤ នៅចំណុចភូមិក្បាលស្ពាន១ សង្កាត់អូរជ្រៅ ក្រុងប៉ោយប៉ែត ខេត្តបន្ទាយមានជ័យ ។
ក្រោយមក នៅវេលាម៉ោង១៤ និង៤៥នាទី ថ្ងៃទី០១ ខែធ្នូ ឆ្នាំ២០២៤ ជនរងគ្រោះបាននាំជនសង្ស័យចំនួន០១នាក់ ឈ្មោះ សត ស៊ីម ភេទស្រី អាយុ២៧ឆ្នាំ ដែលបានលួចម៉ូតូខាងលើ មកកាន់មូលដ្ឋានកងរាជអាវុធហត្ថក្រុងប៉ោយប៉ែត ដើម្បីសួរនាំតាមនីតិវិធី ។
លោកវរសេនីយ៍ត្រី នួន នីណារ៉ូ មេបញ្ជាការមូលដ្ឋានកងរាជអាវុធហត្ថក្រុង បានឱ្យដឹងថា ក្រោយសួរនាំរួចជនសង្ស័យត្រូវបានកម្លាំងជំនាញឃាត់ខ្លួន ក្រោយជនសង្ស័យឆ្លើយសារភាពថា ខ្លួនពិតជាបានធ្វើសកម្មភាពលួចយកម៉ូតូ និងទូរសព្ទដៃរបស់ជនរងគ្រោះ ពិតប្រាកដមែន ព្រោះម្ចាស់ម៉ូតូ ត្រូវជាសង្សាររបស់ខ្លួន (ស្រីស្រលាញ់ស្រី) ។
ដោយផ្អែកលើចម្លើយសារភាព កម្លាំងមូលដ្ឋានកងរាជអាវុធហត្ថក្រុង កសាងសំណុំរឿងបញ្ជូនមកកាន់បញ្ជាការដ្ឋានកងរាជអាវុធហត្ថខេត្ត ចាត់ការបន្តតាមនីតិវិធី ។
លោកវរសេនីយ៍ឯក ម៉ែន ភិរម្យ មេបញ្ជាការរង កងរាជអាវុធហត្ថខេត្ត ទទួលការងារស្រាវជ្រាវ និងបង្ក្រាបបទល្មើសបានឱ្យដឹងថា ការបង្ក្រាបករណីខាងលើនេះ ក៏ទទួលបានការអនុញ្ញាតពីលោកឧត្តមសេនីយ៍ត្រី បោន ប៊ិន មេបញ្ជាការកងរាជអាវុធហត្ថខេត្ត និងមានការសម្របសម្រួលនីតិវិធីពីលោក កើត វណ្ណារ៉េត ព្រះរាជអាជ្ញា អមសាលាដំបូងខេត្ត ផងដែរ ។
បច្ចុប្បន្ន ជនសង្ស័យត្រូវបានកម្លាំងការិយាល័យព្រហ្មទណ្ឌ កងរាជអាវុធហត្ថខេត្ត បញ្ជូនទៅសាលាដំបូងខេត្តហើយ នៅព្រឹកថ្ងៃអង្គារ៍ ទី០៣ ខែធ្នូ ឆ្នាំ២០២៤នេះ ដើម្បីអនុវត្តតាមនីតិវិធី ៕
ចែករំលែកព័តមាននេះ