សម្តេចតេជោ សង្ឃឹមថា លោក ជេម សុខ គួរឈប់ធ្វើជាអ្នកចេះគ្រប់រឿងទៀតទៅ
រាជធានីភ្នំពេញ ៖ សម្តេចតេជោ ហ៊ុន សែន ប្រធានព្រឹទ្ធសភា បានសម្តែងក្តីសង្ឃឹមថា លោក ជេម សុខ…
រាជធានីភ្នំពេញ ៖ សម្តេចតេជោ ហ៊ុន សែន ប្រធានព្រឹទ្ធសភា បានសម្តែងក្តីសង្ឃឹមថា លោក ជេម សុខ ដែលកំពុងរស់សហរដ្ឋអាមេរិក គួរឈប់ធ្វើជាអ្នកចេះគ្រប់រឿងទៀតទៅ ។
ការលើកឡើងរបស់សម្តេចតេជោ ហ៊ុន សែន បន្ទាប់ពីលោក ជេម សុខ បានលើកឡើងថា ទស្សនកិច្ចរបស់សម្តេចតេជោ ទៅប្រទេសចិន មានការប្រញ៉ាប់ប្រញ៉ាល់ ។
យ៉ាងណាក្តីនៅយប់ថ្ងៃទី២ ធ្នូ ២០២៤ តាមប្រព័ន្ធតេឡេក្រាម សម្តេចតេជោ បានសរសេរ តបទៅលោក ជេម សុខ យ៉ាងដូច្នេះថា ៖«ជូនប្អូន ជេម សុខ បងមើលតិចតុក ឃើញប្អូននិយាយថា លោក ហ៊ុន សែន ទៅប្រទេសចិន យ៉ាងប្រញាប់ប្រញាល់ ។ បងសូមបញ្ជាក់យ៉ាងខ្លីថា គំរោងទស្សនកិច្ចនៅចិនរបស់បង គឺបានរៀបចំតាំងពីជិត២ខែមុនម្លេះ ដែលជាការអញ្ជើញរបស់ប្រធានាធិបតីចិន ស៊ី ជិនភីង។ នេះមិនមែនជាទស្សនកិច្ច ដ៏ប្រញាប់ប្រញាល់ ឬតក់ក្រហល់នោះទេ ។ បងសង្ឃឹមថា ប្អូនគួរឈប់ធ្វើជាអ្នកចេះគ្រប់រឿងទៀតទៅ» ។
ជាមួយគ្នានោះដែរ សម្តេចតេជោ បានចំអកទៅលោក ជេម សុខ ថា ៖ «ដោយប្អូនខ្លាចសម្បថបង មិនបបួលប្អូនស្បថទៀតទេព្រោះខ្លាចងាប់ឆ្កែរបស់ប្អូន ។ ជូនពរឱ្យលោក ជេម សុខ ឆាប់ជាសះស្បើយពីជំងឺពុលទឹកមាត់ ពីជំងឺច្រណែនស្ទើរគ្រប់មនុស្ស ពិសេសជូនពរឱ្យប្អូនចេះគ្រប់រឿងថែមទៀត ប្រសិនប្អូនចង់។ ពីផ្កាយព្រឹក ដែលប្អូនដាក់ឈ្មោះ និងហៅបងយ៉ាងពិរោះ» ៕
ចែករំលែកព័តមាននេះ