ទីក្រុងរ៉ង់ហ្គូន៖ ទូកនេសាទថៃរួមជាមួយកម្មករ៣១នាក់នៅលើនោះត្រូវសមត្ថកិច្ចភូមាចាប់ខ្លួន និងបង្ខាំងទុកមួយកន្លែងនៅលើដែនសមុទ្រនៃប្រទេសភូមានៅថ្ងៃសៅរ៍បន្ទាប់ពីមានការប្រទាំងប្រទើសគ្នាមួយប្រាវរវាងកងកម្លាំងប្រដាប់អាវុធភូមាទល់នឹងទូកនេសាទថៃ បណ្ដាលឱ្យស្លាប់មនុស្សម្នាក់។ ខាងលើនេះជាការប្រកាសឱ្យដឹងពីមេបញ្ជាការកងទ័ពជើងទឹកថៃ។
លោកសុវ៉ាត ដនសាគុល (Suwat Donsakul) ជាមេបញ្ជាការកងទ័ពជើងទឹកខេត្តរ៉ាក់យ៉ងប្រាប់ថាអ្នកនេសាទថៃម្នាក់លង់ទឹកស្លាប់ ខណៈដែល៣១នាក់ទៀតត្រូវបានពួកភូមាចាប់ខ្លួនព្រឹបៗយកទៅបង្ខាំទុក។ លោកនិយាយដោយសង្ខេបៗតែត្រឹមនេះដោយមិនពន្យល់ថានរណាជាអ្នកចាប់អ្នកទាំង៣១នាក់នោះយកទៅឃុំឃាំង។ លោកសុវ៉ាតទទួលស្គាល់ថានៅពេលមានការប្រទាំងប្រទើស និងការចាប់ខ្លួននោះ ទូកនេសាទថៃជាច្រើនគ្រឿងបានបើកចូលទៅក្នុងដែនសមុទ្រភូមាពិតមែន។
ជនរងគ្រោះដែលបានស្លាប់នោះព្រោះតែគាត់មិនចង់ឱ្យគេចាប់ខ្លួន។ ហេតុនេះគាត់ក៏ប្រថុយលោតទឹកដើម្បីរត់គេចខ្លួន។ ប៉ុន្តែផ្ទៃសមុទ្រដ៏ធំល្វឹងល្វើយដល់ថ្នាក់នេះ ទោះបីចេះហែលទឹកស្ទាត់ជំនាញក៏ដោយ ក៏មិនប្រាកដជាអាចរួចផុតពីសេចក្ដីស្លាប់បានឡើយ។ លោកសុវ៉ាតថ្លែងថាលោកបានស្នើសុំទៅអាជ្ញាធរថ្នាក់មូលដ្ឋានចរចាជាមួយសមភាគីភូមាដើម្បីដោះលែងអ្នកនេសាទទាំង៣១នាក់នោះត្រឡប់មកវិញ។
អ្នកនាំពាក្យក្រសួងការបរទេសថៃថ្លែងថាភាគីថៃនឹងចូលរួមនៅក្នុងដំណើរការចរចាជាមួយភាគីភូមាដើម្បីដោះលែងអ្នកទាំងនោះត្រឡប់មកវិញដោយសុវត្ថិភាព។ អ្នកសារព័ត៌មានព្យាយាមទាក់ទងទៅរបបយោធាភូមាដើម្បីស្នើសុំការឆ្លើយបំភ្លឺ។ ប៉ុន្តែគ្មានការឆ្លើយតប។ ក្រោយកើតមានឧបទ្ទវហេតុនេះ ការិយាល័យជលផលខេត្តរ៉ាក់យ៉ងបានចេញសេចក្ដីអំពាវនាវទៅបងប្អូនប្រជានេសាទ និងអ្នកម្ចាស់ទូកនេសាទតូច-ធំគ្រប់ប្រភេទសូមកុំបើកទូកទៅកៀកខ្លាំងពេកនឹងតំបន់ព្រំដែនថៃ-ភូមា។
ការិយាល័យជលផលដដែលនេះថ្លែងនៅក្នុងសេចក្ដីប្រកាសថា «ទូកនេសាទរបស់ភូមាដែលមានបំពាក់អាវុធនៅលើទូកបានវាយប្រហារទៅលើទូកនេសាទថៃនៅក្នុងរយៈចម្ងាយ២០គីឡូម៉ែត្រភាគខាងលិចកោះផាយ៉ាម (Phayam)។ ប៉ុន្តែការិយាល័យនេះមិនបានបរិយាយលម្អិតថាតើក្រុមអ្នកវាយប្រហារទាំងនោះជាក្រុមណាទេ។ ការិយាល័យសូមអំពាវនាវឱ្យទូកនេសាទាំងអស់ និងម្ចាស់ទូកគ្រប់ប្រភេទបើត្រូវចេញទូកទៅកៀកនឹងព្រំដែន ពួកគេគួរណាស់ប្រយ័ត្នប្រយែងឱ្យបានខ្លាំង។
ថៃ និងភូមាមានព្រំប្រល់ជាប់គ្នា២៤០០គីឡូម៉ែត្រ គិតទាំងព្រំដែនទឹក, ព្រំដែនគោក និងសមុទ្រអាន់ដាម៉ាន់ (Andaman)។ យោងតាមសេចក្ដីជូនដំណឹងពីការិយាល័យជលផលរបស់ថៃ ទូកនេសាទថៃបានបើកប្រតិបត្តិការដោយខុសច្បាប់នៅលើដែនសមុទ្ររបស់ភូមាពិតប្រាកដមែន។ ហេតុនេះហើយបានជាធ្វើឱ្យមានភាពតានតឹងរវាងអាជ្ញាធរថៃ និងភូមាដើម្បីការពារទូកនេសាទរបស់ជនជាតិខ្លួន៕
ចែករំលែកព័តមាននេះ