ទីក្រុងវៀងចន្ទន៍៖ រដ្ឋាភិបាលឡាវបានសម្រេចចិត្តហាមការលក់ស្រាវ៉ុតកា (vodka) និងស្រាវីសស្គី។ វ៉ុតកាជាស្រាដែលខ្លាំងអាចដុតឆេះដោយសារគេប្រើប្រាស់សម្រាប់ប្រទេសដែលមានអាកាសធាតុត្រជាក់ខ្លាំង។ ចំណាត់ការរបស់ឡាវធ្វើឡើងបន្ទាប់ពីមានករណីស្លាប់អ្នកទេសចរជនជាតិបរទេស៦នាក់ដែលជួបជុំគ្នាស៊ីផឹកនៅក្នុងពេលរាត្រីកាលពីដើមខែវិច្ឆិកា។
ជួបជុំគ្នាមិនទាន់បានប៉ុន្មានផង ពួកគេម្នាក់ៗមានអាការៈមិនស្រួលខ្លួន។ ទោះបីដឹកទៅដល់មន្ទីរពេទ្យ និងទទួលការព្យាបាលយ៉ាងណាក៏ដោយក៏មិនអាចជួយសង្គ្រោះអាយុជីវិតរបស់ពួកគេបានឡើយ។ ដូច្នេះ អាជ្ញាធរឡាវបានចេញបញ្ជាហាមឃាត់ការលក់ និងទទួលទានស្រាមានផ្លាកយីហោថៃហ្គើវ៉ុតកា (Tiger Vodka) និងថៃហ្គើវីសស្គី (Tiger Whisky) ដោយសារគេបារម្ភថាផលិតផលទាំង២ប្រភេទនេះអាចនឹងបង្កគ្រោះថ្នាក់ចំពោះសុខភាព។
អូស្ត្រាលីក៏អំពាវនាវឱ្យប្រជាជនរបស់ខ្លួនដែលធ្វើដំណើរកម្សាន្តនៅប្រទេសដទៃសូមកុំទទួលទានផលិតផលទាំង២ប្រភេទនេះ។ នៅក្នុងចំណោមជនរងគ្រោះដែលស្លាប់ទាំង៦នាក់នោះមានជនជាតិដាណឺម៉ាក២នាក់, អាមេរិកម្នាក់, អង់គ្លេសម្នាក់ និងអូស្ត្រាលី២នាក់។ ពួកគេស្លាប់នៅតំបន់ទេសចរដ៏ពេញនិយមនៃទីក្រុងវ៉ាងវៀង (Vang Vieng) កាលពីថ្ងៃទី១២ ខែវិច្ឆិកា។
រដ្ឋាភិបាលឡាវសម្ដែងការសោកស្ដាយដោយស្មោះអស់ពីដួងចិត្ត និងសូមចូលរួមរំលែកមរណទុក្ខដ៏ក្រៀមក្រំបំផុតជាមួយក្រុមគ្រួសារជនរងគ្រោះទាំង៦នាក់។ រដ្ឋាភិបាលសន្យាថានឹងបើកការស៊ើបអង្កេតស៊ីជម្រៅដើម្បីចង់ដឹងការពិតនៅពីក្រោយសំណុំរឿងនេះ។ កាលពីថ្ងៃទី២៦ ខែវិច្ឆិកា សារព័ត៌មានឡាវចុះផ្សាយថាសមត្ថកិច្ចចាប់ខ្លួនអ្នកគ្រប់គ្រងតំបន់ទេសចរណ៍ដែលកើតហេតុខាងលើនេះ។ អ្នកដែលត្រូវចាប់ឃុំដទៃទៀតជាជនជាតិវៀតណាម។
នារីជនជាតិអូស្ត្រាលីដែលស្លាប់ទាំង២នាក់មានអាយុ១៩ឆ្នាំដូចគ្នា។ ម្នាក់ឈ្មោះហូលី បូល (Holly Bowles) និងម្នាក់ទៀតឈ្មោះប៊ីយ៉ង់កា ចូន (Bianca Jones)។ សាក្សីនិយាយថាពួកគេចូលផឹកស៊ីនៅក្នុងបារ។ បន្ទាប់មកចេញទៅដើរកម្សាន្តនៅពេលក្បាលព្រលប់ និងចាប់ផ្ដើមធ្វើទុក្ខកាន់តែខ្លាំងឡើងៗរហូតដល់ផុតដង្ហើមតែម្ដង។ សូមជម្រាបថាវ៉ាងវៀងជាតំបន់រមណីយដ្ឋានដ៏ពេញនិយមរបស់ជនជាតិបរទេស។
ទីក្រុងនេះធ្លាប់ជាកន្លែងជួបជុំគ្នារបស់ក្រុមអ្នកទេសចរដែលនិយមចូលចិត្តជីវិតរស់នៅបែបព្រៃភ្នំ។ ក្រៅពីអូស្ត្រាលី ប្រទេសដទៃទៀតដែលមានជនជាតិរបស់ខ្លួនស្លាប់នៅក្នុងហេតុការណ៍នោះក៏បានចេញសេចក្ដីប្រកាសស្នើសុំយ៉ាងទទូចឱ្យជនជាតិរបស់ខ្លួនដទៃទៀតប្រយ័ត្នប្រយែងឱ្យមែនទែនក្នុងការទទួលទានគ្រឿងស្រវឹងដែលមិនស្គាល់ប្រភពច្បាស់លាស់នៅពេលពួកគេធ្វើដំណើរកម្សាន្តនៅប្រទេសឡាវ៕
ចែករំលែកព័តមាននេះ