រាជធានីភ្នំពេញ ៖ ក្រុមអឺរ៉ុប ដែលក្នុងនោះរួមមាន ឯកអគ្គរដ្ឋទូតសហភាពអឺរ៉ុប អាល្លឺម៉ង់ និងសាធារណរដ្ឋឆេក តំណាងមកពីស្ថានទូតបារាំង ភ្នាក់ងារបារាំងសម្រាប់ការអភិវឌ្ឍ (AFD)…
រាជធានីភ្នំពេញ ៖ ក្រុមអឺរ៉ុប ដែលក្នុងនោះរួមមាន ឯកអគ្គរដ្ឋទូតសហភាពអឺរ៉ុប អាល្លឺម៉ង់ និងសាធារណរដ្ឋឆេក តំណាងមកពីស្ថានទូតបារាំង ភ្នាក់ងារបារាំងសម្រាប់ការអភិវឌ្ឍ (AFD) អាជ្ញាធរអភិវឌ្ឍន៍ សហប្រតិបត្តិការស្វីស (SDC) និងអង្គការ GIZ រួមជាមួយឯកឧត្តម ឌិត ទីណា រដ្ឋមន្ត្រី ក្រសួងកសិកម្ម រុក្ខាប្រមាញ់ និងនេសាទ (MAFF) កាលពីថ្ងៃទី២៧-២៨ ខែវិច្ឆិកា ឆ្នាំ២០២៤ បានធ្វើទស្សនកិច្ច ដល់ទីតាំងចម្ការផ្ទាល់ ដើម្បីស្វែងយល់អំពីបញ្ហាប្រឈមនានា នៅថ្នាក់មូលដ្ឋាន ដែលកសិករ និងក្រុមកែច្នៃកំពុង ជួបប្រទះលើការផលិតដំណាំ ដែលមានតម្លៃខ្ពស់ ជាពិសេស គ្រាប់ស្វាយចន្ទី និងម្រេច។ មិនតែប៉ុណ្ណោះ ក៏មានកិច្ចពិភាក្សាមួយចំនួន ដើម្បីជួយបង្កើនការយល់ដឹងកាន់តែច្បាស់អំពីកំណើនសក្តានុពល នៃខ្សែច្រវាក់តម្លៃគ្រាប់ស្វាយចន្ទី និងម្រេច ទីផ្សារ នៃការនាំចូល និងការអនុវត្តកសិកម្ម ដែលធន់នឹងអាកាសធាតុ ។
នៅក្នុងដំណើរទស្សនកិច្ចនោះផងដែរ ក៏មានជំនួបពិភាក្សាជាមួយសហគមន៍កសិកម្មទំនើប (MACs) ក្រុមហ៊ុនកែច្នៃ និងអ្នកនាំចេញនានា ក្នុងខេត្តកំពង់ធំ និងត្បូងឃ្មុំ ផងដែរ ក្នុងនោះក៏មានការធ្វើទស្សនកិច្ច ទៅកាន់មជ្ឈមណ្ឌលឧត្តមភាព បុសខ្នុរ ថែមទៀត ។
ឯកឧត្តម ឌិត ទីណា មានប្រសាសន៍ថា សហគមន៍កសិកម្មទំនើប មានសារៈសំខាន់ចំពោះប្រព័ន្ធកសិ-ចំណីអាហាររបស់កម្ពុជា។ ឯកឧត្តម បន្តថា តាមរយៈការចងក្រងកសិករ ជាសហគមន៍កសិកម្មទំនើប នឹងជួយពង្រឹងសន្តិសុខស្បៀង ព្រមទាំងរួមចំណែកធានា នូវនិរន្ដរភាពសេដ្ឋកិច្ច និងបរិស្ថានសម្រាប់កម្ពុជា។ ទន្ទឹមនោះ ការប្រមូលផ្ដុំកសិករឱ្យប្រកាន់យកការអនុវត្តប្រកបដោយចីរភាព ពួកគាត់អាចកាត់បន្ថយថ្លៃដើម ផលិតកម្ម ពង្រឹងអំណាចចរចា ក៏ដូចជាជីវភាពរបស់ពួកគាត់ផងដែរ ។
លោក អ៊ីហ្កូ ទ្រីសម៉ាន់ (Igor Driesmans) ឯកអគ្គរដ្ឋទូតសហភាពអឺរ៉ុប ប្រចាំកម្ពុជា បានមានប្រសាសន៍ថា បញ្ហាកសិកម្មសព្វថ្ងៃ ត្រូវការការសហការរួមគ្នា និងដំណោះស្រាយច្នៃប្រឌិត ហើយក្រុមអឺរ៉ុប កំពុងធ្វើការ ដើម្បីជួយជំរុញពន្លឿនកំណើនបៃតង និងការងារសមរម្យនៅក្នុងអាជីវកម្មកសិ-ពាណិជ្ជកម្មរបស់កម្ពុជា ។
លោកបន្តថា តាមរយៈការចូលរួមជាមួយរាជរដ្ឋាភិបាលកម្ពុជា យើងកំពុងកសាង ភាពជាដៃគូដ៏រឹងមាំក្នុងការផ្តល់សិទ្ធិអំណាចដល់កសិករក្នុងស្រុក បង្កើនផលិតភាព និងការកែច្នៃក្នុងស្រុក ព្រមទាំងលើកកម្ពស់ការអនុវត្តប្រកបដោយចីរភាព។ យើងប្តេជ្ញាគាំទ្រដល់វិស័យកសិកម្មកម្ពុជា និងធានាថាវិស័យនេះ អនុលោមតាមស្តង់ដារអន្តរជាតិកម្រិតខ្ពស់ ។
ដោយទ្បែក ឯកអគ្គរដ្ឋទូតអាល្លឺម៉ង់ Stefan Messerer ក៏បានបន្ថែមដែរថា គោលបំណងចម្បងរបស់យើង គឺគាំទ្រដល់រាជរដ្ឋាភិបាលកម្ពុជាក្នុងការលើកកម្ពស់ភាពប្រកួតប្រជែង និងភាពធន់នឹងអាកាសធាតុ នៃវិស័យកសិកម្ម។ តាមរយៈការជំរុញការអនុវត្តប្រកបដោយចីរភាព និងការពង្រឹងខ្សែច្រវាក់តម្លៃ យើងប្តេជ្ញាបង្កើនប្រាក់ចំណូល ពង្រីកសមត្ថភាពកែច្នៃ និងកែលម្អលទ្ធភាពចូលទៅកាន់ទីផ្សារសម្រាប់អ្នកពាក់ព័ន្ធទាំងអស់ ដោយផ្តោតសំខាន់លើការបន្ថែមតម្លៃក្នុងស្រុក ។
យោងតាមសេចក្តីប្រកាសព័ត៌មានបានឲ្យដឹងថា កិច្ចសហប្រតិបត្តិការនេះ កំពុងតែចូលរួមអនុវត្តដោយប្រទេសបារាំង អាល្លឺម៉ង់ សហភាពអឺរ៉ុប និង ក្រសួងកសិកម្ម រុក្ខាប្រមាញ់ និងនេសាទ ក្នុងគោលបំណង អភិវឌ្ឍការស្រាវជ្រាវ និងលើកកម្ពស់ការអភិវឌ្ឍន៍ប្រកបដោយចីរភាពនៅក្នុងខ្សែច្រវាក់តម្លៃកសិកម្ម របស់កម្ពុជា។ គំនិតផ្តួចផ្តើមនេះ ស្របតាមគោលនយោបាយរបស់ក្រសួងកសិកម្ម រុក្ខាប្រមាញ់ និងនេសាទ (MAFF) ក្នុងការ លើកកម្ពស់ផលិតកម្មប្រកបដោយចីរភាព និងពង្រឹងទំនាក់ទំនងអាជីវកម្មនៅក្នុងសហគមន៍កសិកម្ម (ACs) ក៏ដូចជាជាមួយអ្នកកែច្នៃ និងអ្នកនាំចេញ ដែលលើកកម្ពស់ផលិតភាព និងធានាសុវត្ថិភាពស្បៀងអាហារ ស្របតាមស្តង់ដារសង្គម និងបរិស្ថាន ។
គំនិតផ្តួចផ្តើមរបស់ក្រុមអឺរ៉ុប ស្តីពីកសិពាណិជ្ជកម្មបៃតង និងការងារសមរម្យ ដែលមានការគាំទ្រ ដោយប្រទេសជាច្រើននៅអឺរ៉ុប មានគោលបំណងអភិវឌ្ឍខ្សែច្រវាក់តម្លៃកសិកម្មប្រកបដោយ ចីរភាព ដោយពុំមានការកាប់បំផ្លាញព្រៃឈើនៅកម្ពុជា។ យុទ្ធវិធីនៃគំនិតផ្តួចផ្តើមនេះ គឺធ្វើយ៉ាងណាដើម្បី បង្កើតប្រព័ន្ធកសិ-កែច្នៃ ដែលធន់ ដែលបំពេញតាមលក្ខខណ្ឌទីផ្សារដែលមានតម្លៃខ្ពស់ ទាំងក្នុងតំបន់អឺរ៉ុប និងអាស៊ាន ៕
ចែករំលែកព័តមាននេះ