រាជធានីភ្នំពេញ ៖ បុរសម្នាក់បានទៅផឹកកាហ្វេ នៅក្នុងហាងកាហ្វមួយកន្លែង ដោយគាត់នាំកូនប្រុស អាយុទើប២ឆ្នាំម្នាក់ ទៅជាមួយផងដែរ ហើយក្រោយមក ខណៈគាត់រវល់តែផឹកកាហ្វេ ភ្លេចខ្លួន…
រាជធានីភ្នំពេញ ៖ បុរសម្នាក់បានទៅផឹកកាហ្វេ នៅក្នុងហាងកាហ្វមួយកន្លែង ដោយគាត់នាំកូនប្រុស អាយុទើប២ឆ្នាំម្នាក់ ទៅជាមួយផងដែរ ហើយក្រោយមក ខណៈគាត់រវល់តែផឹកកាហ្វេ ភ្លេចខ្លួន ស្រាប់តែកូនប្រុសរត់ឆ្លងផ្លូវ ស្របពេលនោះមានរថយន្តតូយ៉ូតា ព្រូស ១គ្រឿង បើកបរដោយស្ត្រីម្នាក់ ទៅដល់បុកបណ្ដាលឲ្យដួលបោកក្បាលរងរបួសធ្ងន់ ហើយក្រោយពេលបញ្ជូនទៅសង្គ្រោះដល់មន្ទីរពេទ្យ ក៏បានស្លា.ប់ ។
ឧប្បត្តិហេតុនោះ បានកើតឡើងកាលពីវេលាម៉ោ១០និង៥៥នាទីព្រឹកថ្ងៃទី២៥ ខែវិច្ឆិកា ឆ្នាំ២០២៤ នៅតាមផ្លូវបេតុងក្នុងបរិវេណផ្សារសំបួរមាស ស្ថិតនៅក្នុងភូមិសំបួរ សង្កាត់ដង្កោ ខណ្ឌដង្កោ រាជធានីភ្នំពេញ ។
យោងតាមប្រភពកន្លែងកើតហេតុ បានឲ្យដឹងថា ក្មេងប្រុសរងគ្រោះ និងបុរសជាឪពុកមិនទាន់ត្រូវបានស្គាល់អត្តសញ្ញាណនៅឡើយទេ គ្រាន់តែដឹងថា កូនប្រុសដែលស្លាប់នោះ មានអាយុទើបតែ២ឆ្នាំប៉ុណ្ណោះ ។ ដោយឡែកនៅមុនពេលកើតហេតុ បុរសជាឪពុក បានទៅផឹកកហ្វេ នៅចំណុចកើតហេតុនោះ ហើយគាត់ក៏បាននាំយកកូនប្រុសរូបនោះ ទៅជាមួយផងដែរ ។
ប្រភពដដែល បានប្រាប់ឲ្យដឹងបន្តថា ក្រោយមក ខណៈដែលគាត់រវល់តែផឹកកាហ្វេភ្លេចខ្លួន ស្រាប់តែកូនប្រុសបានរត់ឆ្លងផ្លូវទៅទិញនំហូប ហើយពេលរត់ទៅដំបូងអត់ទាន់អីទេ លុះក្រោយពេលរត់ត្រលប់ចេញកន្លែងលក់នំមកវិញ ក៏ជួបគ្រោះអកុសលតែម្ដង ដោយមានរថយន្តម៉ាកតូយ៉ូតា ព្រូស ពណ៍ទឹកប្រាក់ ១គ្រឿង ពាក់ស្លាកលេខភ្នំពេញ 2BH-2865 បើកបរដោយស្ត្រីម្នាក់ក្នុងទិសដៅពីជើងទៅត្បូងទៅដល់ ជាន់ហ្វ្រាំងអត់ទាន់ ក៏បុកបណ្ដាលឲ្យដួលបោកក្បាលរងរបួសធ្ងន់ ។
ប្រភពខាងលើ បានប្រាប់ឲ្យដឹងបន្ថែមទៀតថា ភ្លាមៗនោះ រថយន្តបានឈប់ស្ងៀម បន្ទាប់មកបុរសជាឪពុក និងស្ត្រី ដែលជាអ្នកបើកបររថយន្តខាងលើ បាននាំគ្នាលើកកូនដាក់រថយន្តនោះដឹកទៅកាន់មន្ទីរពេទ្យរុស្ស៊ី ដើម្បីសង្គ្រោះបន្ទាន់ ប៉ុន្តែជាអកុសល ដោយសាររបួសធ្ងន់ធ្ងរពេក ក្រោយមកក្មេងប្រុសរូបនេះ ក៏បានបាត់បង់ជីវិត រួចក៏បានដឹកសពត្រលប់មកផ្ទះវិញ ។ បន្ទាប់មកនគរបាលខណ្ឌដង្កោ បានចុះទៅពិនិត្យកាមេរ៉ាសុវត្ថិភាព និងធ្វើការវាស់វែង រួចស្ទូចយករថយន្តទៅរក្សាទុកនៅអធិការដ្ឋាននគរបាលខណ្ឌដង្កោ រង់ចាំការដោះស្រាយគ្នាតាមផ្លូវច្បាប់ នៅពេលក្រោយ ៕
ចែករំលែកព័តមាននេះ