សហរដ្ឋអាមេរិក ៖ វីរបុរសកីឡាប្រដាល់សកលទម្ងន់ធ្ងន់ពិភពលោក ម៉ៃ ថៃសាន់ (Mike Tyson) កាលពីពេលថ្មីៗនេះ បានប្រកាសថា បើទោះបីជាលោកមានលុយច្រើនក៏ដោយ ក៏លោកមិនផ្ទេរមរតករបស់លោកទៅឱ្យកូនៗនោះទេ ព្រោះពួកគេត្រូវខិតខំរកលុយចិញ្ចឹមជីវិតដោយខ្លួនឯង។

អតីតអ្នកប្រដាល់សកលដ៏ឆ្នើមសញ្ជាតិអាមេរិក ម៉ៃ ថៃសាន់ បច្ចុប្បន្នឈានដល់វ័យ៥៨ឆ្នាំ ត្រូវបានរាយការណ៍ថាទទួលបានតម្លៃខ្លួនរហូតដល់ ២០លានដុល្លារអាមេរិកពីការប្រកួតតទល់ជាមួយនឹងយុវជន ជេក ផូល (Jake Paul) វ័យ២៧ឆ្នាំ កាលពីថ្ងៃទី១៥ ខែវិច្ឆិកា កន្លងទៅថ្មីៗនេះ បើទោះបីជាលោកបានរងបរាជ័យយ៉ាងណាក៏ដោយ។ មុនពេលត្រឡប់ឡើងសង្វៀនប្រកួតអាជីពជាមួយតារា​យូធូបប្រែខ្លួនជាអ្នកប្រដាល់សកលអាជីព ជេក ផូល ទ្រព្យសម្បត្តិសុទ្ធរបស់លោក ម៉ៃ ថៃសាន់ ត្រូវបានប៉ាន់ប្រមាណថាមានចំនួន ១០លានដុល្លារអាមេរិក។ ទោះជាយ៉ាងណានេះក្តី លោកបានបញ្ជាក់ប្រាប់កាសែត The Sun យ៉ាងច្បាស់ថា លោកគ្មានគម្រោងផ្ទេរមរតកដល់កូនៗរបស់លោកនោះទេ។

លោកថា «អធិស្ឋានទៅកាន់ព្រះឱ្យបានច្រើន ហើយខំប្រឹងប្រែងធ្វើការខ្លាំងបំផុត និងជឿជាក់លើខ្លួនឯង។ ខ្ញុំមិនអាចជួយកូនៗដោយផ្តល់មរតកដល់ពួកគេនោះទេ។ ខ្ញុំអាចធ្វើបាបពួកគេបានបើខ្ញុំធ្វើដូចនេះ។ ពួកគេត្រូវរៀនសូត្រ ព្រោះប្រសិនបើពួកគេគ្មានក្តីប្រាថ្នា និងគ្មានបទពិសោធន៍ទេ នោះពួកគេនឹងចុះចាញ់ នៅពេលជួបឧបសគ្គតិចតួច»។

របាយការណ៍ទស្សនាវដ្តីពាណិជ្ជកម្មសហរដ្ឋអាមេរិក Forbes បានរាយការណ៍ថាពេញមួយអាជីពប្រដាល់​របស់​ម៉ៃ ថៃសាន់ លោកអាចរកប្រាក់ចំណូលបានរហូតដល់ ៦៨៥លានដុល្លារ។ ទោះជាយ៉ាងណា ទម្លាប់ចាយវាយខ្ជះខ្ជាយហួសហេតុ បានធ្វើឱ្យលោកក្ស័យធន នៅឆ្នាំ ២០០៣ មុនពេលចូលនិវត្តន៍ពីអាជីពនៅពីរឆ្នាំក្រោយ ដោយនៅពេលនោះថែមទាំងជាប់បំណុលចំនួន ២៣លានដុល្លារផងដែរ។ លោកបន្តប្រាប់ The Sun ថា «ខ្ញុំបានធ្វើរឿងល្ងង់ខ្លៅជាច្រើនដូចជា អេ! អូនស្រី តើអូនចូលចិត្តឡាននេះទេ? អូខេ អ៊ីចឹងមកចំណាយពេលចុងសប្តាហ៍ជាមួយបង នេះគឺជារឿងដ៏ឆ្កួតសុទ្ធដែលអ្នកអាចធ្វើដោយលុយរបស់អ្នក»។

ដើម្បីដោះខ្លួនចេញពីបំណុល ម៉ៃ ថៃសាន់ បានចូលរួមសម្តែងក្នុងខ្សែភាពយន្តជាច្រើន និងមានវីដេអូគំនូរជីវចលផ្ទាល់ខ្លួនផងដែរ។ លោកក៏មានកម្មវិធីជជែកពិភាក្សា Podcast មួយឈ្មោះថា « Hotboxin’ with Mike Tyson» ដោយដំណើរការចាប់ពីឆ្នាំ ២០១៩ ដល់ឆ្នាំ ២០២៤។ ប៉ុន្តែទោះយ៉ាងណា ប្រាក់ចំណូលរបស់លោកភាគច្រើនបានវិនិយោគនៅកសិដ្ឋានកញ្ឆា គឺជាកន្លែងដែលលោកដាំដុះ និងលក់កញ្ឆា (Marijuana) ហើយនិងផលិតផលសុខភាពផលិតពីកញ្ឆាផងដែរ។

តាមប្រភពពីសារព័ត៌មាន The People របស់សហរដ្ឋអាមេរិកបានឱ្យដឹងថា លោក ម៉ៃ ថៃសាន់ មានកូនប្រុសស្រីសរុបចំនួន៧នាក់ និងធ្លាប់ឆ្លងកាត់ការរៀបអាពាហ៍ពិពាហ៍ចំនួន៣លើក ដោយភរិយា​ទី១ឈ្មោះ Robin Givens ភរិយាទី២ឈ្មោះ Monica Turner និងភរិយាទី៣ ដែលជាភរិយាបច្ចុប្បន្នមានឈ្មោះថា Lakiha Spicer រៀបការជាមួយគ្នាតាំងពីឆ្នាំ ២០០៩ មកម្ល៉េះ៕ ដកស្រង់ ៖ VnExpress