ទីក្រុងហាណូយ៖ អាកាសធាតុត្រជាក់ចាប់ផ្ដើមគ្របដណ្ដប់ទៅលើប្រទេសវៀតណាមជាបណ្ដើរៗហើយ។ ខ្យល់បក់ពីទិសនិរតីនឹងចាប់ផ្ដើមបោកបក់ខ្លាំងនៅទូទាំងភាគខាងជើងចាប់ពីសប្ដាហ៍ក្រោយតទៅ។ សីតុណ្ហភាពនឹងធ្លាក់ចុះដល់១០អង្សានៅតំបន់ភ្នំ ខណៈដែលទីក្រុងហាណូយនឹងមានសីតុណ្ហភាពធ្លាក់ចុះដល់១៤អង្សាសេ។ នៅល្ងាចចន្ទ អាកាសធាតុត្រជាក់នឹងកើតមាននៅភាគឦសានមុនគេ។ បន្ទាប់មកនឹងកើតមាននៅតំបន់ដីសណ្ដទន្លេមេគង្គ និងភាគពាយព្យ។ នេះបើយោងតាមការព្យាកររបស់ក្រសួងឧតុនិយម។
ទន្ទឹមនឹងការបក់មកត្រសៀកៗនៃខ្យល់ត្រជាក់ តំបន់ខាងជើងក៏នឹងមានភ្លៀងកក់ខែរដូវរងាផងដែរនៅក្នុងល្បឿនចាប់ពី១២-៣៨គីឡូម៉ែត្រក្នុងមួយម៉ោង។ បរិយាកាសបែបនេះនឹងកើតមាននៅថ្ងៃចន្ទ និងថ្ងៃអង្គារ។ សេវាកម្មព្យាករអាកាសធាតុឈ្មោះអឹឃ្យូវេដឺ (Accuweather) អះអាងថាសីតុណ្ហភាពនៅទីក្រុងហាណូយនឹងចុះត្រជាក់ដល់១៦-១៩អង្សានៅថ្ងៃអង្គារ។
ប៉ុន្មានថ្ងៃទៅមុខទៀត សីតុណ្ហភាពនឹងចុះត្រជាក់មកនៅ២០-២៤អង្សានៅពេលថ្ងៃត្រង់ និង១៤អង្សានៅពេលយប់ជ្រៅ។ នៅតំបន់ខ្ពង់រាបដែលមានកម្ពស់ចាប់ពី១៥០០ម៉ែត្រនៅលើកម្ពស់ទឹកសមុទ្រដូចជានៅទីក្រុងសាប៉ា (Sa Pa) នៃខេត្តឡាវកៃ (Lào Cai) សីតុណ្ហភាពកាន់តែចុះត្រជាក់ខ្លាំងមែនទែនចាប់ពីថ្ងៃពុធសប្ដាហ៍ក្រោយ។ នៅតំបន់នេះ សីតុណ្ហភាពជាមធ្យមត្រឹមតែ១៣អង្សាតែប៉ុណ្ណោះនៅពេលថ្ងៃ ហើយនឹងធ្លាក់ចុះរហូតដល់៨-១១អង្សានៅពេលយប់។
ចរន្តខ្យល់ត្រជាក់ដែលបក់ខ្លាំងៗនឹងកើតឡើងនៅវៀតណាមភាគកណ្ដាលចាប់ពីថ្ងៃអង្គារតទៅ ហើយនឹងធ្វើឱ្យសីតុណ្ហភាពចុះត្រជាក់ចាប់ពី១៦-១៨អង្សាតែប៉ុណ្ណោះ។ គេរំពឹងថានៅអំឡុងពេលនោះនឹងមានភ្លៀងលាយខ្យល់កន្ត្រាក់ផងដែរ ហើយក៏អាចនឹងមានខ្យល់កួច ផ្គរ រន្ទះ និងខ្យល់កន្ត្រាក់កើតមាននៅតំបន់ខ្លះ។
ចាប់ពីល្ងាចថ្ងៃចន្ទតទៅ ឈូងសមុទ្រតុងកឹងនឹងមានខ្យល់ត្រជាក់បក់ចាប់ពីល្បឿន៣៩-៦១គីឡូម៉ែត្រក្នុង១ម៉ោង។ រលកសមុទ្រនឹងហក់ឡើងខ្ពស់ចាប់ពី២-៣,៥ម៉ែត្រ។ ត្រឹមល្ងាចថ្ងៃអង្គារ តំបន់មាត់សមុទ្រចាប់ពីខេត្តក្វាងទ្រីដល់ខេត្តក្វាងង៉ាយនឹងមានខ្យល់បក់ល្បឿនចាប់ពី៣៩-៤៩គីឡូម៉ែត្រក្នុងមួយម៉ោង ខណៈដែលរលកសមុទ្រមានកម្ពស់ចាប់ពី២-៤ម៉ែត្រ។
មជ្ឈមណ្ឌលស្រាវជ្រាវធារាសាស្ត្រ និងឧតុនិយមរបស់វៀតណាមព្យាករថាខ្យល់ត្រជាក់នឹងបក់ខ្លាំងៗយ៉ាងពេញបន្ទុកនៅតំបន់ដូចរៀបរាប់ខាងលើនេះចាប់ពីខែធ្នូ ឆ្នាំ២០២៤នេះរហូតដល់ខែកុម្ភៈ ឆ្នាំ២០២៥។ មិនតែប៉ុណ្ណោះ សីតុណ្ហភាពនៅតំបន់ខ្លះនឹងចុះត្រជាក់ដល់ធ្លាក់ទឹកកក ឬធ្លាក់ព្រិលថែមទៀតផង។ ជាពិសេស តំបន់ភ្នំនៅប្រទេសវៀតណាមភាគខាងជើង៕
ចែករំលែកព័តមាននេះ