ខេត្តកំពត ៖ មន្ត្រីប៉េអឹម២នាក់ដែលឈរជើងនៅស្នាក់ការត្រពាំងរពៅ ស្រុកទឹកឈូ បានបើករថយន្តតាមចាប់រថយន្តដឹកក្តារ៧បន្ទះធ្វើឱ្យអ្នកជិះក្នុងនោះប្រមាណ១៥នាក់ព្រលឹងចុងសក់។ ហេតុការណ៍នេះកើតឡើងនៅវេលាម៉ោង២រសៀល ថ្ងៃទី២១ មិថុនា លើផ្លូវជាតិលេខ៣ ត្រពាំងរពៅ-កំពត។
ឈ្មោះសាយ ខន ភេទប្រុស អាយុ៣៨ឆ្នាំ នៅឃុំស្តេចគង់ឱ្យដឹងថា គាត់ទិញក្តារចំនួន៧បន្ទះនៅដេប៉ូវាលរេញ ហើយដឹកតាមរថយន្តទួរីសទៅស្រុកបន្ទាយមាស។ ពេលរថយន្តទៅដល់ត្រពាំងរពៅ ឃុំព្រែកត្នោត ស្រុកទឹកឈូ ស្រាប់តែត្រូវរថយន្តប៉េអឹមមិនដឹងចេញមកពីកន្លែងណាទេបើកប្រដេញក្នុងចំងាយជិត១០គីឡូម៉ែត្រទើបស្ទាក់ជាប់ពីខាងមុខ។ ពេលប៉េអឹមសួររកម្ចាស់ក្តារ គាត់ក៏ប្រាប់ថា ក្តារនេះគាត់ទិញពីដេប៉ូយកទៅធ្វើជញ្ជាំងផ្ទះមិនមែនជួញដូរទេ ។ គាត់យកលុយ២ម៉ឺនរៀលឱ្យទៅប៉េអឹមនោះ តែគេនិយាយថា «ម៉េចស្មានតែមិនដែលស្គាល់លុយ២ម៉ឺនរៀលឬ? »។ ប៉េអឹមនោះទារលុយពី គាត់ចំនួន២០ម៉ឺនរៀល ហើយគំរាមថា «បើមិនព្រមឱ្យ ចង់ទៅដេកឱ្យមូសខាំ ឬយ៉ាងណា»។
អ្នកឃើញហេតុការណ៍និយាយថា ម្ចាស់ក្តារលើកដៃសំពះមន្ត្រីប៉េអឹមឱ្យយោគយល់ តែគេនិយាយថា «បើអ៊ីចឹងមានតែហៅមេព្រៃមកឥឡូវហើយ»។ ម្ចាស់ក្តារ និងម្ចាស់រថយន្តសំពះប៉េអឹមនោះសុំឱ្យលុយត្រឹម១២ម៉ឺនរៀលទើបគេព្រមទទួលយក ហើយព្រមានថា ថ្ងៃក្រោយកុំដឹកឈើបែបនេះទៀត។
អ្នកជិះរថយន្តនិយាយថា នេះជាការជំរិតទារប្រាក់តែម្តង ហើយពួកមន្ត្រីទាំង២រូបនោះគ្មានមនោសញ្ចេតនាដល់ពលរដ្ឋទេ។ មន្ត្រីរដ្ឋបាលព្រៃឈើខេត្តកំពតធ្លាប់មានប្រសាសន៍ថា ពាក់ព័ន្ធនឹងរថយន្តដឹកអ្នកដំណើរ ហើយដឹកឈើឆ្លងកាត់ខេត្តកំពត គឺមានរូបភាពតូចតាចបំផុតគ្មានអ្វីគួរឱ្យចាប់អារម្មណ៍ទេ ៕
ចែករំលែកព័តមាននេះ