រាជធានីភ្នំពេញ ៖ ថ្លែងជាសាធារណៈ សម្តេចតេជោហ៊ុន សែនប្រធានព្រឹទ្ធសភា បានគូសបញ្ជាក់ថា កម្ពុជាសុខចិត្តលះបង់សេដ្ឋកិច្ចក្នុងសង្គម មិនសុខចិត្តឲ្យកម្ពុជាមានការបែកបាក់សាមគ្គី និងសង្គ្រាម ដោយសារតែការញុះញង់ពីក្រុមជុលនិយមឡើយ…
រាជធានីភ្នំពេញ ៖ ថ្លែងជាសាធារណៈ សម្តេចតេជោហ៊ុន សែនប្រធានព្រឹទ្ធសភា បានគូសបញ្ជាក់ថា កម្ពុជាសុខចិត្តលះបង់សេដ្ឋកិច្ចក្នុងសង្គម មិនសុខចិត្តឲ្យកម្ពុជាមានការបែកបាក់សាមគ្គី និងសង្គ្រាម ដោយសារតែការញុះញង់ពីក្រុមជុលនិយមឡើយ ។
សម្តេចតេជោ ហ៊ុន សែន បានមានប្រសាសន៍ នៅក្នុងពិធីបើកអនុសំវច្ឆរ មហាសន្និបាត មន្ត្រីសង្ឃ ទូទាំងប្រទេសលើកទី៣២ នាព្រឹកថ្ងៃទី២១ ខែវិច្ឆិកា ឆ្នាំ២០២៤ នៅវិទ្យាស្ថានជាតិអប់រំ ថា កម្ពុជាសុខចិត្តលះបង់សេដ្ឋកិច្ចក្នុងសង្គម មិនសុខចិត្តឲ្យកម្ពុជាមានការបែកបាក់សាមគ្គី និងសង្គ្រាម ដោយសារតែការញុះញង់ពីក្រុមពួកអគតិមួយក្តាប់តូចនោះឡើយ ។
ត្រង់ន័យនេះ ត្រូវបានសម្តេច បានបញ្ជាក់ថា ៖ «កម្ពុជាសម្រេចដកខ្លួន ចេញពីកិច្ចសហប្រតិបត្តិការ CLV គឺដើម្បីលុបបំបាត់មន្ទិលសង្ស័យពីបងប្អូនប្រជាពលរដ្ឋ» ។
ជាមួយគ្នានេះ ពាក់ព័ន្ធទៅនឹងបញ្ហាកោះគុត សម្តេចតេជោ ហ៊ុន សែន ប្រកាសថា តំបន់កោះគុត គឺជាតំបន់ត្រួតស៊ីគ្នា រវាងកម្ពុជា និងថៃ ខណៈកោះនេះ គឺរាជរដ្ឋាភិបាលកម្ពុជា និងថៃ កំពុងបន្តជជែកគ្នាយ៉ាងក្តៅគគុកនៅឡើយ ប៉ុន្តែមានជនអគតិ មួយក្តាប់តូច (ក្រុមក្បត់ ជាតិ៣ជំនាន់) កំពុងតែធ្វើការញុះញង់ អុចអាលលើបញ្ហានេះ ហើយការញុះញង់បែបនេះអាចនឹងធ្វើឲ្យកម្ពុជា និងថៃ ឈានដល់មានការផ្ទុះអាវុធ ។
សម្តេចតេជោ បានមានប្រសាសន៍បញ្ជាក់ទៀតថា ការប្តឹងផ្តល់គ្នា ទៅតុលាការអន្តរជាតិ លើបញ្ហាកោះគុត តាមការញុះញង់របស់ជនអគតិមួយក្តាប់តូច នៅក្រៅប្រទេសនោះ មិនមែនជាការងាយស្រួលនោះទេ ។
ឆ្លៀតនៅក្នុងឱកាសនេះ សម្ដេចតេជោ ហ៊ុន សែន សូមអំពាវនាវដល់ប្រជាពលរដ្ឋទុកលទ្ធភាពឲ្យរដ្ឋាភិបាលចរចាជាមួយនឹងរដ្ឋាភិបាលថៃរឿងកោះគុត ហើយសង្ឃឹមថា ខាងអ្នកជ្រុលនិយមនៅក្នុងប្រទេសថៃ ក៏ត្រូវទុកលទ្ធភាពឲ្យរដ្ឋាភិបាលក្នុងប្រទេសថៃ ធ្វើការចរចាដែរ ។
សម្ដេចតេជោ បានលើកឡើងទៀតថា រាជរដ្ឋាភិបាល បានយកចិត្តទុកដាក់ណាស់ជាមួយប្រទេសជិតខាង ជាក់ស្ដែងពេលនេះ ការបោះបង្គោលព្រំដែន ជាមួយនឹងប្រទេសឡាវបានចំនួន ៨៦ភាគរយ ជាមួយវៀតណាមបានចំនួន ៨៤ភាគរយ និងបានបោះបង្គោល ព្រំដែនតូចៗ បន្ថែមទៀត ដើម្បីឱ្យពលរដ្ឋដែលទៅកម្សាន្តនៅតាមព្រំដែន ងាយឃើញ ងាយយល់ នឹងធ្វើឲ្យការរស់នៅតាមតំបន់ព្រំដែនកាន់តែមានភាពល្អប្រសើរ ។
សម្ដេចតេជោ បន្ថែមទៀតថា ក្រុមជ្រុលនិយមនៅកម្ពុជា ជាក្រុមជ្រុលនិយមមិនធម្មតា ដែលទាមទារឲ្យធ្វើច្បាប់ ដើម្បីដាក់ទោស និងការពារសុខសន្តិភាព និងការអភិវឌ្ឍនៅកម្ពុជា ។
នៅក្នុងឱកាសនេះផងដែរ សម្ដេចតេជោ ហ៊ុន សែន ក៏បានអំពាវនាវដល់កងទ័ពទាំងជើងទឹក និងជើងគោកទាំងអស់ មិនត្រូវចល័តកម្លាំងទៅតំបន់កោះគុត ឬធ្វើសកម្មភាពអ្វីនោះទេ ក្រោយពីមិនទាន់ទទួលព័ត៌មានពីបញ្ហានៅកោះគុតនោះ ។
សម្ដេចតេជោបញ្ជាក់បន្ថែមថា កម្ពុជា និងថៃ នៅតែបន្តចរចាពីបញ្ហានេះ ដោយសន្តិវិធី នៅឡើយ ៕
ចែករំលែកព័តមាននេះ