ខេត្តបាត់ដំបង ៖ ទើបតែសម្រាលកូនខ្ចីបាន២០ថ្ងៃ ភរិយាកម្មករស្ពាយបារីឆ្លងដែនម្នាក់ ក្នុងចំណោម០២នាក់ដែលត្រូវក្រុមទាហានប៉ារ៉ាថៃចាប់ខ្លួនបានអំពាវនាវទាំងទឹកភ្នែកសុំឲ្យអាជ្ញាធរកម្ពុជាជួយអន្តរាគមន៍រំដោះស្វាមីរបស់នាងពីអាជ្ញាធរថៃឲ្យបានត្រឡប់មកជួបជុំគ្រួសារវិញ ដែលកំពុងជួបប្រទះនឹងជីវភាពក្រលំបាកតោកយ៉ាកយ៉ាងខ្លាំង។
ជួបជាមួយអ្នកសារព័ត៌មាន កាលពីរសៀលថ្ងៃទី០៧ កក្កដា ស្ត្រីឈ្មោះ ខេម ណៃ អាយុ៣៥ឆ្នាំ ស្នាក់នៅបន្ទប់ជួលបណ្ដោះអាសន្ន ក្នុងភូមិត្រពាំងព្រលិត ឃុំសន្តិភាព ស្រុកសំពៅលូន បានរៀបរាប់ទាំងទឹកភ្នែកពីដំណើររឿងដែលនាងបានដឹងខ្លះៗពីស្វាមីរបស់នាងពាក់ព័ន្ធនឹងការស៊ីឈ្នួលលីសែងទំនិញឆ្លងដែនឲ្យគេកន្លងមក ។
នាង ខេម ណៃ បានប្រាប់ថា ស្វាមីនាងឈ្មោះ កៀត កាយ អាយុ៣៦ឆ្នាំ រីឯកម្មករម្នាក់ទៀតឈ្មោះ ខាយ ឈឿន អាយុ២២ឆ្នាំ ជាសាច់ញាតិនាងដែរ ត្រូវទាហានថៃចាប់ខ្លួននៅក្នុងទឹកដីថៃ ។ គាត់និយាយថា ភ្លាមៗនោះ គាត់មិនបានដឹងថា ទាហានថៃចាប់ប្ដីគាត់និងឈ្មោះឈឿនពីរឿងអ្វីទេ ។ ប៉ុន្តែក្រោយមក ក៏មានគេនិយាយថា «ទាហានថៃចាប់ប្ដីខ្ញុំ និងម្នាក់ទៀតពីរឿងនាំបារីឆ្លងដែន ។ ពេលត្រូវទាហានថៃចាប់ភ្លាម ប្ដីខ្ញុំបានទូរស័ព្ទមកប្រាប់ដែរ តែខ្ញុំស្ដាប់មិនបានទេ លុះបន្តិចក្រោយមកទើបខ្ញុំដឹងថា ទាហានថៃបានចាប់គាត់» ។
ខេម ណៃ បានបញ្ជាក់ពីប្រវត្តិប្ដីដែរថា ប្ដីគាត់ជាធម្មតា ធ្វើកម្មករសំណង់ និងស៊ីឈ្នូលកាច់ពោត ដកដំឡូង បានប្រាក់កំរៃតិចតួចយកមកឲ្យនាង តែនាងមិនធ្លាប់ដឹងថា ប្ដីនាងទៅស៊ីឈ្នូលលីសែងបារីឆ្លងដែនខុសច្បាប់ឲ្យគេចឹងទេ លុះគេប្រាប់ទើបដឹង ។ នាងបានលើកដៃសំពះសុំឲ្យសមត្ថកិច្ចកម្ពុជាជួយអន្តរាគមន៍ដោះស្រាយរឿងប្ដីនាង ដើម្បីឲ្យបានវិលត្រឡប់មកផ្ទះវិញ ព្រោះពេលនេះនាងទើបសម្រាលកូនខ្ចីបានប្រហែល២សបា្តហ៍ស្នាក់នៅបន្ទប់ជួលពុំមានអ្នកជួយមើលខុសត្រូវ
ទេ ។
កាលពីរសៀលថ្ងៃទី០៥ កក្កដា កម្លាំងទាហានប៉ារ៉ាថៃបានចាប់ខ្លួនពលរដ្ឋខ្មែរចំនួន០២នាក់ ម្នាក់ឈ្មោះ កៀត កាយ អាយុ៣៦ឆ្នាំ និងឈ្មោះ ខាយ ឈឿន អាយុ២២ឆ្នាំ នៅក្នុងទឹកដី ឃុំខ្លងហាត ស្រុកខ្លងហាត ខេត្តស្រះកែវ ប្រទេសថៃ ជាមួយនឹងបារីជាច្រើនការ៉ុង ដែលមានចំនួនជាង១៥០០០កញ្ចប់ ។
ក្រោយពីចាប់ខ្លួនអ្នកស៊ីឈ្នូលលីបារីឆ្លងដែន ប្រព័ន្ធផ្សព្វផ្សាយរបស់ថៃបានធ្វើសេចក្ដីរាយការណ៍ដោយស្រង់ចម្លើយបឋមពីពលរដ្ឋខ្មែរទាំង០២នាក់នោះថា បារីជាច្រើនការ៉ុងនោះពួកខ្លួនបានស្ពាយឆ្លងអូរព្រំដែនចេញពីចំណុច «ច្រករបៀងគីឡូ៩» ក្នុងទឹកដីស្រុកសំពៅលូន ខេត្តបាត់ដំបង ។
ប្រព័ន្ធផ្សាយផ្សាយនានា ខាងកម្ពុជាបានសេចក្ដីរាយការណ៍ខាងភាគីថៃ នេះយកមិនចុះផ្សាយព្រោងព្រាតពេញមេឃ ។ ប៉ុន្តែនៅថ្ងៃបន្ទាប់ ស្រាប់តែព័ត៌មាននេះ ត្រូវបានគេបដិសេធវិញ ។ ប្រភពព័ត៌មានបានទម្លាយជាហូរហែថា «តាមពិតបារីរាប់សិបការ៉ុងនោះ ត្រូវគេលួចនាំឆ្លងអូរព្រំដែនទាំងកណ្ដាលថ្ងៃ នៅមិនឆ្ងាយប៉ុន្មានឡើយពីច្រកទ្វារអន្តរជាតិព្រំដែន ភ្នំដី ស្រុកសំពៅលូន។
រីឯចម្លើយដំបូង ដែលកម្មករស៊ីឈ្នូលស្ពាយបារីឆ្លងដែន បាននិយាយប្រាប់ទាហានថៃថា ចេញតាមច្រករបៀងគីឡូ៩នោះ គ្រាន់តែជាការបង្វែងដានមិនឲ្យគេដឹងច្រកនាំចេញតែប៉ុណ្ណោះ» ។
ទំនងបែបនេះហើយ ទើបនៅព្រឹកថ្ងៃទី០៧ កក្កដា គេឃើញកម្លាំងចម្រុះនៃរដ្ឋបាលស្រុកសំពៅលូន ។ ជាពិសេស កម្លាំងសមត្ថកិច្ចដែលពាក់ព័ន្ធនឹងកិច្ចការងារព្រំដែន បាននាំគ្នាចុះពិនិត្យ «ច្រករបៀង» លួចលាក់មួយកន្លែងនៅប៉ែកខាងត្បូង មិនឆ្ងាយប៉ុន្មានពីច្រកទ្វារព្រំដែនអន្តរជាតិ «ភ្នំដី» (ផ្លូវខាងក្រោយកាស៊ីណូ) ។
ច្រករបៀងលួចលាក់នេះ ត្រូវគេដឹងថា ស្ថិតក្នុងដែនសមត្ថកិច្ចរបស់កម្លាំង «វរសេនាតូចនគរបាលការពារព្រំដែនគោកលេខ៨១៧» ដែលមានលោកវរសេនីយឯក ម៉ង់ ស៊ី ជាមេបញ្ជាការ ។
ប្រភពព័ត៌មានដែលសុំមិនប្រាប់ឈ្មោះបានបង្ហើបឲ្យដឹងថា គេបានសង្ស័យភាគច្រើនទៅលើចំណុចច្រករបៀងមួយនេះ ជាច្រកលួចរត់ពន្ធបារីឆ្លងដែនទៅកាន់ប្រទេសថៃ ។ ហើយក៏ជាច្រកលួចនាំចេញ នាំចូលយ៉ាងមមារញឹកនូវទំនិញរត់ពន្ធនានាដែរ នាពេលកន្លងមក ។
កោះសន្តិភាពបានព្យាយាមទំនាក់ទំនងមន្ត្រីពាក់ព័ន្ធមួយចំនួននៅថ្ងៃទី០៨ កក្កដា ដើម្បីសុំការបំភ្លឺជាក់លាក់ ជុំវិញករណីនេះ ប៉ុន្តែភាគច្រើនសុទ្ធតែបានបដិសេធសុំមិនបញ្ចេញអត្តសញ្ញាណ ។ បើយោងលើប្រភពព័ត៌មានទាំងនេះ ស្ទើរប្រហាក់ប្រហែលគ្នាបានដាក់ការសង្ស័យទៅលើ «ច្រករបៀង» នៅខាងត្បូងច្រកអន្តរជាតិ «ភ្នំដី» ប៉ុន្មានរយម៉ែត្រនោះថា គឺជា «ច្រកលួចរត់ពន្ធបារីឆ្លងដែនខុសច្បាប់ចេញទៅប្រទេសថៃ» ដែលមេឈ្មួញទុច្ចរិតជួលកម្មករខ្មែរឲ្យលីសែងឆ្លងដែន រហូតត្រូវក្រុមទាហានថៃចាប់ខ្លួនបាន០២នាក់ កាលពីថ្ងៃមុននេះ ។
ប្រភពបានបង្ហើបឲ្យដឹងជាតម្រុយដែរថា មេខ្លោងនៅពីក្រោយមុខជំនួញរត់ពន្ធបារីឆ្លងដែនខុសច្បាប់ខាងលើនេះ អាចជាមនុស្សមានអំណាចនៅក្នុងមូលដ្ឋានតែម្ដង ទើបហ៊ានប្រព្រឹត្តបទល្មើសឆ្លងដែននេះ ។
បន្ទាត់ព្រំដែនកម្ពុជា-ថៃ ទូទាំងប្រទេសត្រូវបានបិទជិតទាំងស្រុងហើយ នៅតែមេឈ្មួញបារីអាចលួចនាំបារីឆ្លងដែនទាំងកណ្ដាលថ្ងៃ ផុតពីភ្នែកសមត្ថកិច្ចកម្ពុជា យ៉ាងងាយរហូតដល់ទៅជាង១៥០០០កញ្ចប់ ។ ដូច្នេះ ថ្នាក់ដឹកនាំគូរតែធ្វើការស្រាវជ្រាវរកមុខមេខ្លោងនៅពីក្រោយនៃអំពើរត់ពន្ធបារីបំពានច្បាប់នេះ ដើម្បីចាត់ការតាមផ្លូវច្បាប់ ៕
ចែករំលែកព័តមាននេះ