រាជធានីភ្នំពេញ ៖ រថយន្តទ្រុងឃ្លុប ១គ្រឿង ខណៈកំពុងបើកបរសុខៗ បានខូចនៅតាមផ្លូវ ហើយអ្នកបើកបរ ក៏បានហៅជាងទៅធ្វើការជួសជុល ដោយពុំបានដាក់ស្លាកសញ្ញាប្រុងប្រយ័ត្នឡើយ។ ពេលនោះមាន…
រាជធានីភ្នំពេញ ៖ រថយន្តទ្រុងឃ្លុប ១គ្រឿង ខណៈកំពុងបើកបរសុខៗ បានខូចនៅតាមផ្លូវ ហើយអ្នកបើកបរ ក៏បានហៅជាងទៅធ្វើការជួសជុល ដោយពុំបានដាក់ស្លាកសញ្ញាប្រុងប្រយ័ត្នឡើយ។ ពេលនោះមាន ម៉ូតូកង់បី ១គ្រឿង ទៅដល់ក៏បានបុកពីក្រោយរថយន្តនោះពេញទំហឹង និងរុញទៅមុខបុកម៉ូតូ១គ្រឿង និងកិនជាប់។ ម៉ូតូខាងលើនោះ គឺជារបស់ជាងជួសជុលរថយន្ត ដែលទុកនៅពីមុខរថយន្តនោះ ដោយឡែកម៉ូតូកង់បី បានរួញខ្ទេច១កំណាត់មុខ និងគាបបុរស ដែលជាអ្នកបើកបររងរបួសធ្ងន់ ។
ឧប្បត្តិហេតុគ្រោះថ្នាក់ចរារណ៍នេះ បានកើតឡើងកាលពីវេលាម៉ោង៣និង២០នាទីរសៀលថ្ងៃទិ០៨ ខែកក្កដា ឆ្នាំ២០២៥ នៅលើមហាវិថីស៊ី ជីនពីង ហៅផ្លូវក្រវាត់ក្រុងទី៣ ត្រង់ចំណុចជិតភ្លើងស្តុបវត្តអង្គត្រគៀត ស្ថិតនៅក្នុងភូមិត្រាំស្លឹក សង្កាត់កន្ទោក ខណ្ឌកំបូល រាជធានីភ្នំពេញ ។
រថយន្តទ្រុងឃ្លុប ដឹកទំនិញ ១គ្រឿងនោះ ម៉ាកហ៊ីយ៉ាន់ដាយ ពណ៍ស ពាក់ស្លាកលេខភ្នំពេញ 3B-9673 បើកបរដោយបុរសមិនស្គាល់អត្តសញ្ញាណម្នាក់។ រថយន្តនោះ បានកិនម៉ូតូ ១គ្រឿង ម៉ាកហុងដាឌ្រីមសេ១២៥ ពណ៍ខ្មៅ ពាក់ស្លាកលេខព្រៃវែង 1S-2929 ដែលជារបស់ជាងជួសជុលរថយន្ត បណ្ដាលឲ្យរងការខូចខាតផងដែរ ។
ដោយឡែកម៉ូតូកង់បី ពណ៍ស លាយទឹកប៊ិច ពាក់ស្លាកលេខភ្នំពេញ 1LH-9013 ដឹកចំណីសត្វ បើកបរដោយឈ្មោះអ៊ិត នឿន អាយុ៤០ឆ្នាំ រងរបួសធ្ងន់ មានទីលំនៅភូមិអរិយក្សត្រ សង្កាត់អរិយក្សត្រ ក្រុងអរិយក្សត្រ ខេត្តកណ្ដាល ។
បើតាមសាក្សី នៅកន្លែងកើតហេតុ បានប្រាប់ឲ្យដឹងថា នៅមុនពេលកើតហេតុ គាត់បានឃើញរថយន្តទ្រុងបិទជិតខាងលើ ពុំដឹងថា ដឹកអ្វីទេ ខណៈកំពុងបើកបរធ្វើដំណើរក្នុងទិសដៅពីជើងទៅត្បូងសុខៗ ទៅដល់ត្រង់ចំណុចកើតហេតុ ក៏ស្រាប់តែខូច។ បន្ទាប់មក អ្នកបើកបរ ក៏បានហៅជាងទៅជួសជុល ប៉ុន្តែពុំបានដាក់ស្លាកសញ្ញាអ្វីមួយ ដើម្បីជាការប្រុងប្រយ័ត្ននោះទេ ចំណែកជាង ពេលទៅដល់ បានទុកម៉ូតូរបស់ខ្លួន នៅពីមុខរថយន្តខូចនោះ រួចធ្វើការជួសជុល ។
សាក្សីដដែល បានប្រាប់ឲ្យដឹងបន្តទៀតថា ខណៈពេលកំពុងជួសជុលរថយន្តនោះ ស្រាប់តែម៉ូតូកង់បី ដឹកចំណីសត្វ ទៅដល់បុករថយន្តពីក្រោយពេញទំហឹង ធ្វើឲ្យរថយន្តនេះជ្រុលទៅមុខបុកម៉ូតូជាងជួសជុលរថយន្តនោះដួលហើយត្រូវរថយន្តកិនជាប់ពីលើ។ ចំណែកម៉ូតូកង់បី បានខ្ទេចរួញ១កំណាត់មុខ និងគាបអ្នកបើកបរជាប់ បណ្ដាលឲ្យរងរបួសធ្ងន់ធ្ងរ បន្ទាប់មកត្រូវបានក្រុមសង្គ្រោះអង្គភាព៧១១ ចុះទៅជួយគាស់យកចេញរួចបញ្ជូនទៅកាន់មន្ទីរពេទ្យ ដើម្បីសង្គ្រោះបន្ទាន់ ។
សមត្ថកិច្ច បាននិយាយថា ក្រោយពេលកើតហេតុ កម្លាំងនគរបាលចរាចរណ៍ នៃអធិការដ្ឋានខណ្ឌកំបូល បានចុះទៅធ្វើការវាស់វែង រួចនាំយករថយន្ត និងម៉ូតូកង់បី ទៅរក្សាទុក រង់ចាំការដោះស្រាយនៅពេលក្រោយ។ ចំណែកម៉ូតូហុងដាឌ្រីម ត្រូវបានម្ចាស់ ដែលជាជាងជួសជុលរថយន្តសុំរួចខ្លួន និងសុំយកទៅធ្វើការជួសជុលដោយខ្លួនឯង ព្រោះមិនចង់ពាក់ព័ន្ធនឹងរឿងនេះឡើយ ៕
ចែករំលែកព័តមាននេះ