រាជធានីភ្នំពេញ ៖ មន្ទីរសម្រាកព្យាបាលជំងឺមេត្តាសំណង់១២ ត្រូវបានមន្ទីរសុខាភិបាលរាជធានីភ្នំពេញ សហការជាមួយអាជ្ញាធរមូលដ្ឋាន ចុះបិទ និងរុះរើផ្លាកយីហោទម្លាក់ចេញ បន្ទាប់ពីព្យាបាលបណ្ដាលឲ្យក្មេងប្រុសអាយុ ៨ខែម្នាក់ បានស្លា.ប់បាត់បង់ជីវិត…
រាជធានីភ្នំពេញ ៖ មន្ទីរសម្រាកព្យាបាលជំងឺមេត្តាសំណង់១២ ត្រូវបានមន្ទីរសុខាភិបាលរាជធានីភ្នំពេញ សហការជាមួយអាជ្ញាធរមូលដ្ឋាន ចុះបិទ និងរុះរើផ្លាកយីហោទម្លាក់ចេញ បន្ទាប់ពីព្យាបាលបណ្ដាលឲ្យក្មេងប្រុសអាយុ ៨ខែម្នាក់ បានស្លា.ប់បាត់បង់ជីវិត ។
ការចុះបិទមន្ទីរសម្រាកព្យាបាលជំងឺមេត្តាសំណង់១២ នេះ បានធ្វើឡើងកាលពីវេលាម៉ោង០៤និង២០នាទីរសៀលថ្ងៃទី៨ ខែកក្កដា ឆ្នាំ២០២៥ ដោយធ្វើឡើងទៅតាមសេចក្តីសម្រេច ស្តីពីការបិទមន្ទីរសម្រាកព្យាបាលជំងឺ មេត្តាសំណង់ ១២ លេខ៦០៤/២៥ រប ចុះថ្ងៃទី០៨ ខែកក្កដា ឆ្នាំ២០២៥ របស់មន្ទីរសុខាភិបាលរាជធានីភ្នំពេញ ដោយមានការចូលរួមលោកវេជ្ជបណ្ឌិត កែវ វិបុល អនុប្រធានមន្ទីរសុខាភិបាល នៃរដ្ឋបាលរាជធានីភ្នំពេញ,លោក កែវ សុភា អភិបាលរង នៃគណៈអភិបាលខណ្ឌទួលគោក និងអាជ្ញាធសង្កាត់ ។
មន្ទីរសម្រាកព្យាបាលជំងឺមេត្តាសំណង់១២ ស្ថិតនៅផ្ទះលេខ២៥ ផ្លូវលេខ២៦៥ សង្កាត់ទឹកល្អក់ទី៣ ខណ្ឌទួលគោក រាជធានីភ្នំពេញ។ ក្នុងឱកាសនោះគណៈកម្មការ ក៏បានប្រគល់សេចក្តីជូនលោកវេជ្ជបណ្ឌិត ហ៊ាង រតនា ដែលជាម្ចាស់ទុនមន្ទីរសម្រាកព្យាបាលជំងឺ មេត្តាសំណង់១២ ផងដែរ ។
តាមសេចក្តីសម្រេច ស្តីពីការបិទមន្ទីរសម្រាកព្យាបាលមេត្តាសំណង់១២ របស់មន្ទីរសុខាភិបាល នៃរដ្ឋបាលរាជធានីភ្នំពេញ បានសម្រេច
ប្រការ១ ៖ បិទទីតាំងផ្តល់សេវាសុខាភិបាលឯកជន ០១កន្លែង (មន្ទីរសម្រាកព្យាបាល មេត្តាសំណង់១២) របស់លោក វេជ្ជបណ្ឌិត ហ៊ាង រតនា ដែលមានទីតាំងស្ថិតនៅផ្ទះលេខ២៥ ផ្លូវលេខ២៦៥ សង្កាត់ទឹកល្អក់ទី៣ ខណ្ឌ ទួលគោក រាជធានីភ្នំពេញ ដោយមូលហេតុ ពុំទាន់មានលិខិតអនុញ្ញាតពីក្រសួងសុខាភិបាល ។
ប្រការ២ ៖ ប្រធានការិយាល័យនិយ័តកម្មសុខាភិបាល ប្រធានការិយាល័យសុខាភិបាលស្រុកប្រតិបត្តិចតុមុខ និងលោក វេជ្ជបណ្ឌិត ហ៊ាង រតនា មានភារកិច្ចអនុវត្តសេចក្តីសម្រេចនេះតាមភារកិច្ចរៀងៗខ្លួន ឱ្យមានប្រសិទ្ធិភាព ចាប់ពីថ្ងៃចុះហត្ថលេខានេះតទៅ ។
បន្ទាប់ពីមន្ទីរសម្រាកព្យាបាលជំងឺមេត្តាសំណង់១២ ត្រូវបានបិទនៅវេលាក្បាលព្រលប់ លោកវេជ្ជបណ្ឌិត ហ៊ាន រតនា ដែលជាជាម្ចាស់គ្លីនិក បានបង្ហោះសារនៅក្នុងបណ្ដាញសង្គមអោយដឹងថា “ពេលនេះ គ្លីនិកមេត្តាសំណង់១២ ត្រូវបានបិទ។ ខ្ញុំមានមនោសញ្ជេតនា និងអនុស្សាវរីយ៍ ជាមួយទីនេះ និងជាមួយអ្នកជំងឺនៅទីនេះច្រើនណាស់ ពេលនេះ បេះដូងរបស់ខ្ញុំ ដូចត្រូវបានកាំបិតមួយចាក់យ៉ាងជ្រៅ ណាមួយ គឺទិដ្ឋភាព ដែលម្តាយអោបសាកស.ពកូនយំ នៅដិតដាមចំពោះមុខខ្ញុំ។ នេះគឺជាលើកទីមួយហើយ ក្នុងឆាកជីវិតខ្ញុំ ដែលខ្ញុំព្យាយាមជួយសង្គ្រោះអ្នកជំងឺដោយខ្លួនឯងផ្ទាល់ហើយ និងបញ្ជូនជំងឺបន្តដើម្បីជួយសង្គ្រោះហើយ តែនៅតែមិនអាចជួយសង្គ្រោះអ្នកជំងឺបាន។ វាបានប៉ះទង្គិចផ្លូវចិត្តខ្ញុំខ្លាំងណាស់ នៅហេតុការណ៍ទាំងនេះ និងជាពិសេស នៅពេលលឺពាក្យថា «ព្យាបាលដើម្បីលុយ»។ ខ្ញុំដឹងច្បាស់អំពីខ្លួនឯង ថាទឹកចិត្តខ្ញុំបែបណា ថាចង់ធ្វើអ្វី ដើម្បីអ្វី ទស្សនៈវិស័យរបស់ខ្លួនឯងបែបណា ខ្ញុំលះបង់អ្វីខ្លះ។ ពេលនេះខ្ញុំសួរខ្លួនឯងថាតើ ខ្ញុំគួរបន្តទៀតទេ ??? នោះសូមបងប្អូនវាយតម្លៃចុះ ថាខ្ញុំជាមនុស្សបែបណា ជាគ្រូពេទ្យបែបណា ? បងប្អូនអាចខំមិនបានទាំងអស់ មិនថា បងប្អូនជាគ្រូពេទ្យ អ្នកស្អប់ខ្ញុំ អ្នកស្រលាញ់ខ្ញុំ ជាអ្នកជំងឺខ្ញុំ ឬក៏មិនមែន បើខ្ញុំមើលឃើញថា មានខំមិនចាប់ពី ៥% ទៅ ថាខ្ញុំជាគ្រូពេទ្យមិនល្អ នោះខ្ញុំនឹងបញ្ចប់អាជីពជាគ្រូពេទ្យរបស់ខ្លួន បោះបង់សញ្ញាប័ត្រ និងគណៈគ្រូពេទ្យរបស់ខ្ញុំចោល និងឈប់ធ្វើជាគ្រូពេទ្យពេញមួយជីវិត រហូតដល់ថ្ងៃខ្ញុំស្លា.ប់។ លោកក៏បានបញ្ជាក់ទៀតថានេះ មិនមែនជាការឆ្លើយតប ឬបកស្រាយអ្វីមួយនោះទេ គឺខ្ញុំគ្រាន់តែចង់រំដោះផ្លូវចិត្តរបស់ខ្ញុំ ។
គួរបញ្ជាក់ថា កាលពីព្រឹកថ្ងៃទីថ្ងៃទី៧ ខែកក្កដា ឆ្នាំ២០២៥ មានការភ្ញាក់ផ្អើលយ៉ាងខ្លាំងនៅមន្ទីរសម្រាកព្យាបាលជំងឺមេត្តាសំណង់១២ បន្ទាប់ពីស្ត្រីម្នាក់ រួមទាំងក្រុមគ្រួសារ បានបីស.ពកូនប្រុស មកទ្រហោយំ នៅមន្ទីរសម្រាកព្យាបាលជំងឺមេត្តាសំណង់១២ ដោយចោទប្រកាន់ថា បានព្យាបាលក្មេងអាយុ៨ខែ មានការធ្វេសប្រហែស បណ្ដាលឲ្យស្លា.ប់ ព្រមទាំង កើតទុកមិនសុខចិត្ត ប្ដឹងសមត្ថកិច្ចឱ្យចុះត្រួតពិនិត្យ និងស្រាវជ្រាវ ដើម្បីរកយុត្តិធម៌ ។
ក្មេងប្រុស ដែលបានស្លាប់បាត់បង់ជីវិតឈ្មោះ វង់ ចន្ទវឌ្ឍនៈវិភូ អាយុ៨ខែ មានឪពុក ឈ្មោះ វង់ រដ្ឋា ភេទប្រុស អាយុ៣២ឆ្នាំ ទីលំនៅ៥៥ ផ្លូវលេខ៩ បុរីឡាយគង់ សង្កាត់ចោមចៅ២ ខណ្ឌពោធិ៍សែនជ័យ រាជធានីភ្នំពេញ។ បានស្លា.ប់បាត់បង់ជីវិត នៅវេលាម៉ោង០៧និង៥០នាទីព្រឹកថ្ងៃទី៧ ខែកក្កដា ឆ្នាំ២០២៥ នៅមន្ទីរពេទ្យគន្ធបុប្ផា បន្ទាប់ពីបញ្ជូនចេញពីមន្ទីរសម្រាកព្យាបាលជំងឺមេត្តាសំណង់ ១២ ។
លោកវេជ្ជបណ្ឌិត ហ៊ាង រតនា ភេទប្រុស អាយុ៣២ឆ្នាំ ម្ចាស់មន្ទីរសម្រាកព្យាបាលមេត្តាសំណង់១២ បានបំភ្លឺប្រាប់សមត្ថកិច្ចឲ្យដឹងថា នៅវេលាម៉ោងប្រហែល១៦ និង០០នាទី ថ្ងៃទី០៥ ខែកក្កដា ឆ្នាំ២០២៥ ឪពុកម្ដាយទារករងគ្រោះ បាននាំមកកាន់មន្ទីរសម្រាកព្យាបាលមេត្តាសំណង់១២ ដោយពិនិត្យឃើញ មានកំដៅ៣៧,៥០អង្សារ ហើយបានឲ្យទារករងគ្រោះសម្រាកព្យាបាលតាមដានអាការៈសុខភាពបន្ត។ នៅវេលាម៉ោងប្រហែល០៦ និង៣០នាទី ថ្ងៃទី០៧ ខែកក្កដា ឆ្នាំ២០២៥ ទារករងគ្រោះ ស្រាប់តែមានអាការៈមិនស្រួលធ្វើទុកខ្លាំង ទើបខាងគ្រូពេទ្យយើងបានធ្វើការសង្គ្រោះតាមបច្ចេកទេសពេទ្យ តែដោយអាការៈមិនស្រួលខ្លាំងទើប ដឹកទារកតាមរថយន្តផ្ទាល់ខ្លួន ទៅកាន់មន្ទីរពេទ្យគន្ធបុប្ផា, ពេលទៅដល់គ្រូពេទ្យនៅមន្ទីរពេទ្យគន្ធបុប្ផា បានធ្វើការសង្គ្រោះប្រហែលជាកន្លះម៉ោង ទើបប្រាប់ថា ទារកបានស្លា..ប់បាត់ទៅហើយ រួចខាងមន្ទីរពេទ្យគន្ធបុប្ផា បានចេញលិខិតមរណភាពឲ្យ ហើយក្រុមគ្រួសារ ដឹកសាកសពទារកត្រឡប់មកកាន់មន្ទីរសម្រាកព្យាបាលមេត្តាសំណង់១២វិញ ។
បន្ទាប់ពីកូនប្រុសជាទីស្រឡាញ់ បានដាច់ខ្យល់ស្លាប់ ក្រុមគ្រួសារមានប្រតិកម្មយ៉ាងខ្លាំង ហើយទ្រហោយំ ហើយបានចោទប្រកាន់មកលើគ្រូពេទ្យនៅមន្ទីរសម្រាកព្យាបាលជំងឺមេត្តាសំណង់១២ ថាមានការធ្វេសប្រហែស មិនយកចិត្តទុកដាក់ទុកបណ្ដោយឲ្យកូនរបស់គាត់រហូតដល់ធ្ងន់ធ្ងរបាត់បង់ជីវិត ហើយប្តឹងសមត្ថកិច្ច ក៏ដូចជាមន្ត្រីពាក់ព័ន្ធឲ្យជួយអន្តរាគមន៍ ដើម្បីឲ្យជួយរកយុត្តិធម៌ព្រមទាំងបីកូនជាទីស្រឡាញ់របស់គាត់ ទៅដល់មន្ទីរពេទ្យតែម្ដង។ នៅព្រឹកនោះ មន្ទីរសុខាភិបាលរាជធានីភ្នំពេញ ក៏ដូចជានគរបាលមូលដ្ឋាន និងនគរបាលជំនាញ ក៏ចុះទៅត្រួតពិនិត្យ និងបង្កឲ្យមានការភ្ញាក់ផ្អើលយ៉ាងខ្លាំង នៅមន្ទីរសម្រាកព្យាបាលជំងឺមេត្តាសំណង់ ១២ ។
បន្ទាប់ពីធ្វើការត្រួតពិនិត្យ និងប្រមូលព័ត៌មាន បានលិខិតពិនិត្យឈាមរបស់មន្ទីរសម្រាកព្យាបាលជម្ងឺមេត្តាសំណង់១២ លោកឧកញ៉ាវេជ្ជបណ្ឌិត នង សុវណ្ណរ័ត្ន គ្រូពេទ្យកោសល្យវិច័យអមតុលាការរាជធានីភ្នំពេញ បានសន្និដ្ឋានថា ក្មេងប្រុសស្លាប់ដោយជំងឺគ្រុនឈាម។ ទោះបីជាយ៉ាងណា រំលងបានមួយថ្ងៃ មន្ទីរសម្រាកព្យាបាលជំងឺមេតាដំណង់១២ ត្រូវបានមន្ទីរសុខាភិបាលរាជធានីភ្នំពេញ ចេញសេចក្តី សម្រេចចុះបិទអាជីវកម្ម និងឲ្យរុះរើ ស្លាកចេញ ដោយមូលហេតុ ពុំទាន់មានលិខិតអនុញ្ញាតពីក្រសួងសុខាភិបាល។ គេមានការឆ្ងល់ ថា មន្ទីរសុខាភិបាល ហេតុអ្វីបានជាទុកអោយគ្លីនិកមួយ ធ្វើអាជីវកម្មដោយពុំមានច្បាប់ ជាយូរមកហើយ ហើយទាល់តែមានរឿង ទើបចុះបិទ ហើយថា អត់ច្បាប់ ? ៕
ចែករំលែកព័តមាននេះ