រាជធានីភ្នំពេញ៖ សួនកុមារវត្តភ្នំដែលបានជួសជុលកែលម្អយ៉ាងស្រស់ស្អាត បានទាក់ទាញប្រជាពលរដ្ឋពីបណ្ដាខេត្តនាំកូនៗជាទីស្រឡាញ់របស់ខ្លួនមកទស្សនាលេងកម្សាន្តយ៉ាងច្រើនកុះករ ក្នុងព្រះរាជពិធីបុណ្យអុំទូក នៅរាជធានីភ្នំពេញ ដោយម្នាក់ៗមានទឹកមុខសប្បាយរីករាយ ប្រកបដោយស្នាមញញឹម។ លោក សាអែម ប្រជាពលរដ្ឋមកពីខេត្តព្រៃវែងបាននិយាយក្នុងទឹកមុខរីករាយថា៖…
រាជធានីភ្នំពេញ៖ សួនកុមារវត្តភ្នំដែលបានជួសជុលកែលម្អយ៉ាងស្រស់ស្អាត បានទាក់ទាញប្រជាពលរដ្ឋពីបណ្ដាខេត្តនាំកូនៗជាទីស្រឡាញ់របស់ខ្លួនមកទស្សនាលេងកម្សាន្តយ៉ាងច្រើនកុះករ ក្នុងព្រះរាជពិធីបុណ្យអុំទូក នៅរាជធានីភ្នំពេញ ដោយម្នាក់ៗមានទឹកមុខសប្បាយរីករាយ ប្រកបដោយស្នាមញញឹម។
លោក សាអែម ប្រជាពលរដ្ឋមកពីខេត្តព្រៃវែងបាននិយាយក្នុងទឹកមុខរីករាយថា៖ សួនកម្សាន្តនៅទីនេះសំបូរក្មេងៗលេងច្រើនឱ្យតែថ្ងៃបុណ្យទាន ពិសេសថ្ងៃបុណ្យអុំទូកនេះតែម្តង ព្រោះកន្លែងនេះស្អាត ធំទូលាយ ងាយស្រួលនិងមានសុវត្ថិភាពសម្រាប់កូនៗលេងកម្សាន្តសប្បាយ។ លោកបានរៀបរាប់ថា៖ នៅសួនកុមារវត្តភ្នំ មានក្មេងៗមកលេងមិនដាច់នោះទេ តាំងពីព្រឹកព្រលឹម រហូតដល់យប់ក៏មានដែរ។
លោកបញ្ជាក់ថា អុំទូកសំបូរក្មេងៗណាស់តាំងពីម៉ោង៩ព្រឹកដល់ប្រហែល៩យប់ ទើបអស់ក្មេងវិញ ព្រោះនៅទីនេះជាកន្លែងក្មេងលេង ម្យ៉ាងក្មេងៗចូលចិត្តឃើញមានរបស់លេងច្រើន អញ្ចឹងសប្បាយ ហើយទីធ្លាវាត្រជាក់មានដើមឈើធំៗ និងស្រឡះល្អ។
ចំណែកលោកស្រីពៅ មានវ័យប្រមាណជាង៣០ឆ្នាំ កំពុងអង្គុយលើកន្ទេលមើលកូនលេងនៅក្បែនោះបាននិយាយថា៖ តំបន់សួនកុមារនេះ មានបរិស្ថានស្រស់ស្អាត ហើយក្មេងអាចជិះលេងដល់យប់ក៏បាន ដែលនៅជុំវិញមានភ្លើងបំភ្លឺចម្រុះពណ៌ ធ្វើឱ្យយើងជាឳពុកមា្តយ ក៏សប្បាយរីករាយក្នុងការគយគន់ផងដែរ។
លោកស្រីបញ្ជាក់ថា ដោយសារក្មេងៗភាគច្រើនគាត់ចូលចិត្តមកលេងកន្លែងបែបនេះ សំខាន់ស្អាត មានរបស់ក្មេងលេងច្រើន ហើយមានសណ្តាប់ធ្នាប់ល្អ ទីធ្លាទូលាយត្រជាក់ស្រួលក្មេងៗលេងផងដែរ។
សូមរំលឹកថា ដោយមានការគិតគូរយ៉ាងយកចិត្តទុកដាក់ពី ឯកឧត្ដម ឃួង ស្រេង អភិបាលនៃគណៈរាជធានីភ្នំពេញ ដែលលោកតែងតែគិតគូរ ដើម្បីត្រៀមទទួលបងប្អូនប្រជាពលរដ្ឋ និងបង្កលក្ខណៈ សប្បាយរីករាយដល់កុមារ ក៏ដូចជាអាណាព្យាបាលឪពុកម្តាយ ដែលនាំកូនមកដើរលេងកម្សាន្តលំហែលកាយ សម្រាប់ព្រះរាជពិធីបុណ្យអុំទូកទូកនេះ រដ្ឋបាលរាជធានីភ្នំពេញបានធ្វើការជួសជុល ផ្លាស់ប្តូរថ្មីសម្ភារៈ កុមារលេង និងកែលម្អ សួនកុមារវត្តភ្នំឱ្យពួកគាត់លេងកម្សាន្តយ៉ាងសប្បាយរីករាយ ។ សួនកុមារវត្តភ្នំនេះ ត្រូវបានជួសជុល កែលម្អជាថ្មីឡេីងវិញ ជាពិសេស សម្ភារៈសម្រាប់ក្មេងលេងមានការសឹករិចរិលដូចជាបាដាងដុំបង្វិល និងរបករបេីកថ្នាំជាដេីមដែលត្រូវធ្វេីការផ្លាស់ប្ដូរថ្មី និងជួសជុលផ្នែកខ្លះ ព្រមទាំងលៀងសម្អាតបាញ់ថ្មាំឡេីងវិញ ដេីម្បីបង្កលក្ខណៈងាយស្រួលដល់កុមារលេងកម្សាន្តសប្បាយ។
មន្ត្រីជំនាញរដ្ឋបាលរាជធានីភ្នំពេញបានបញ្ជាក់ថា ការងារជួសជុល ផ្លាស់ប្តូរថ្មីសម្ភារៈ កុមារលេង និងកែលម្អ នៅសួនកុមារវត្តភ្នំ និងសួនមុខវត្តបុទុមវតីនេះ បានចាប់អនុវត្តចាប់ពីថ្ងៃទី៣០ខែតុលា២០២៤ ដែលក្រុមការងារកំពុងខិតខំឱ្យរួចរាល់មុនព្រះរាជធពិធីបុណ្យអុំទូក បណ្ដែតប្រទីប សំពះព្រះខែ និងអកអំបុក ដែលនឹងប្រព្រឹត្តិទៅនាពេលឆាប់ៗខាងមុខនេះ ។
សូមបញ្ជាក់ថា សួនកុមារវត្តភ្នំ ត្រូវបានរដ្ឋបាលរាជធានីភ្នំពេញកសាងឡើងកាលពីអំឡុងឆ្នាំ២០០៤-២០០៥ មកដល់ពេលនេះមានរយៈពេលប្រមាណ២០ឆ្នាំហើយ ហើយក្នុងពេលកន្លងមករដ្ឋបាលរាជធានីភ្នំពេញមានការជួសជុលជាបន្តបន្ទាប់ដែរ តែសម្រាប់ឆ្នាំនេះជួសជុលលក្ខណៈធំដែលកន្លែងខ្លះត្រូវរេីចេញនិងតម្លេីងថ្មីតែម្តង៕
ចែករំលែកព័តមាននេះ