ខេត្តបាត់ដំបង ៖ ជនសង្ស័យចំនួន០៣នាក់បងប្អូន ត្រូវបានកម្លាំងសមត្ថកិច្ចឃាត់ខ្លួនជាបន្តបន្ទាប់ កាលពីព្រលប់ថ្ងៃទី១៤ វិច្ឆិកា នៅភូមិទូលព្រុំ២ ឃុំកកោះ ស្រុកមោងប្ញស្សី ក្រោយមួយថ្ងៃ…
ខេត្តបាត់ដំបង ៖ ជនសង្ស័យចំនួន០៣នាក់បងប្អូន ត្រូវបានកម្លាំងសមត្ថកិច្ចឃាត់ខ្លួនជាបន្តបន្ទាប់ កាលពីព្រលប់ថ្ងៃទី១៤ វិច្ឆិកា នៅភូមិទូលព្រុំ២ ឃុំកកោះ ស្រុកមោងប្ញស្សី ក្រោយមួយថ្ងៃ ដែលជនទាំង០៣នាក់នេះ បានព្រួតគ្នាកាប់ និងវាយទៅលើបុរសម្នាក់ហូតដល់ស្លាប់ ពេលគាត់កំពុងដើររកខ្យងនៅតំបន់ទន្លេសាប។
យោងតាមរបាយការណ៍សមត្ថកិច្ចបានឲ្យដឹងថា ជនសង្ស័យទាំង០៣នាក់មាន ១-ឈ្មោះ សែ សាន ភេទប្រុស អាយុ២៦ឆ្នាំ ២-ឈ្មោះ សែ រតនា ហៅ វត្ត ភេទប្រុស អាយុ២៤ឆ្នាំ និង៣-ឈ្មោះ សែ សុង ភេទប្រុស អាយុ៣០ឆ្នាំ ពួកគេរស់នៅភូមិទូលព្រុំ២ ឃុំកកោះ ស្រុកមោងឬស្សី។ រីឯជនរងគ្រោះឈ្មោះ មុំ អេង ភេទប្រុស អាយុ៥១ឆ្នាំ រស់នៅភូមិថ្មី ឃុំព្រៃតូច ស្រុកមោងប្ញស្សី។
នាយរងការិយាល័យព្រហ្មទណ្ឌកំរិតធ្ងន់ លោក វ៉ាន់ តារ៉ា ដែលបានចុះបំបែកសំណុំរឿងនេះ និង បានសាកសួរនាំជនសង្ស័យទាំង០៣នាក់ បានប្រាប់ថា ក្រុមជនដល់បានប្រើប្រាស់កាំបិតកាប់ទៅលើជនរងគ្រោះត្រូវចំក្បាល និងវាយដោយដៃ ។ លោកបានដកស្រង់សម្ដីជនសង្ស័យទៀតថា ក្រោយពីកាប់ជនរងគ្រោះស្លាប់ ពួកគេបានលើកជនរងគ្រោះដាក់លើកាណូតស្មាច់ (កាណូតជនរងគ្រោះ) រួចពួកគេក៏ឡើងជិះកាណូតរបស់ខ្លួន គេចខ្លួនត្រឡប់មកផ្ទះវិញទាំងកណ្ដាលយប់ លុះបានមួយថ្ងៃក្រោយទើបត្រូវកម្លាំងរបស់លោកចុះស្រាវជ្រាវរហូតឃាត់ខ្លួនពួកគេទាំង០៣នាក់បងប្អូន។
បើតាមរបាយការណ៍ព្រឹត្តិហេតុរបស់សមត្ថកិច្ច ករណី«ឃាតកម្ម» នេះ បានកើឡើងនៅវេលាម៉ោងជិត១រំលងអធ្រាត្រឈានចូលថ្ងៃទី១៣ វិច្ឆិកា នៅតំបន់ព្រៃរនាមទន្លេសាប ស្ថិតក្នុងភូមិសាស្ត្រ ភូមិរំចេក ឃុំកកោះ ស្រុកមោងប្ញស្សី។ ជនរងគ្រោះ និងជនសង្ស័យ សុទ្ធតែជាអ្នកដើររកខ្យងនៅតំបន់ទន្លេសាប ។ នៅយប់កើតហេតុ ក្រុមជនសង្ស័យទាំង០៣នាក់ ជិះកាណូតទាំងកណ្ដាលយប់ទៅកាន់កន្លែងជនរងគ្រោះដាក់នុយខ្យង ហើយក៏ផ្ទុះជម្លោះជាមួយគ្នា ដែលគេអះអាងថា ផ្ដើមចេញពីគំនុំរឿងដើររកខ្យងបំពានតំបន់គ្នា។
ពេលផ្ទុះជម្លោះវាយតប់គ្នា ស្រាប់តែក្រុមជនដៃដល់ក៏ទាញកាំបិតខ្វែវកាប់ទៅលើជនរងគ្រោះបណ្ដាលឲ្យស្លាប់នៅក្នុងនៅក្នុងទឹកតែម្ដង។ សាក្សីខ្លះបាននិយាយថា នៅយប់កើតហេតុ ជនរងគ្រោះបានប្រើប្រាស់កាំភ្លើងខ្យល់បាញ់ទៅលើក្រុមជនសង្ស័យ នៅពេលគាត់ប្រទះឃើញក្រុមជនសង្ស័យកំពុងចុះរាវរកនុយខ្យងរបស់គាត់ ទើបមានការឈ្លោះប្រកែកគ្នា ហើយក្រុមជនសង្ស័យក៏ទាញកាំបិតកាប់ជនរងគ្រោះតែម្ដង។
ប៉ុន្តែបើតាមចម្លើយសារភាពរបស់ក្រុមជនសង្ស័យ ដែលបានឆ្លើយនោះចំពោះមុខសមត្ថកិច្ចថា កាលពីថ្ងៃទី ៩ វិច្ឆកា ពួកខ្លួននិងជនរងគ្រោះធ្លាប់បានឈ្លោះប្រកែកគ្នាម្ដងហើយរឿងមុខរបរដើររកខ្យងនៅតំបន់ទន្លេសាបនេះ។ ក្រុមនេះបានសារភាពទៀតថា នៅយប់កើតហេតុ ពួកខ្លួនពិតជាបានកាប់សម្លាប់ជនរងគ្រោះមែន ដោយតែជនរងគ្រោះបានប្រើប្រាសកាំភ្លើងខ្យល់បាញ់ពួកខ្លួនមុន។ ជនសង្ស័យបានបញ្ជាក់ថា ពេលកាប់ជនរងគ្រោះដួលក្នុងទឹក ពួកខ្លួនក៏លើកកាណូតរបស់ជនរងគ្រោះ រួចពួកខ្លួនក៏ឡើងជិះកាណូតខ្លួនគេចមិនផ្ទះទាំងយប់ លុះស្អែកឡើងក៏ត្រូវសមត្ថកិច្ចចុះមកឃាត់ខ្លួនល្មម។
លោក ឈឿង គឹមសុង ស្នងការរងដែលបានដឹកនាំកម្លាំងជំនាញចុះអន្តរាគមន៍លើករណី«ឃាតកម្ម» នេះ បាននិយាយថា ការឃាត់ជនសង្ស័យទាំង០៣នាក់បងប្អូនខាងលើនេះ ក្រោយពីមានការចង្អុលបង្ហាញពីសាក្សីនានា ដែលបានដឹងរឿងនេះ។ លោកក៏បានបញ្ជាក់ដែរថា បើតាមការស្រាវជ្រាវ ភាគីទាំង០២ ពិតជាធ្លាប់ឈ្លោះប្រកែកគ្នាមែន មុនពេលឈានដល់ការកាប់សម្លាប់គ្នានៅកន្លែងដើររកខ្យង។ នៅចំពោះមុខសមត្ថកិច្ច ក្រុមជនសង្ស័យបានសារភាពទទូលស្គាល់កំហុសហើយ។ ពេលនេះ មន្ត្រីជំនាញកំពុងសួរនាំ ចាត់ការតាមនីតិវិធីហើយ៕
ចែករំលែកព័តមាននេះ