លោក ឃួង ស្រេង អំពាវនាវសុំឱ្យកីឡាករអុំទូក និងប្រជាពលរដ្ឋ ចូលរួមថែរក្សាបរិស្ថាន និងអនាម័យទាំងអស់គ្នា
រាជធានីភ្នំពេញ ៖ លោគ ឃួង ស្រេង អភិបាល នៃគណៈអភិបាលរាជធានីភ្នំពេញ បានស្នើសុំអោយកីឡាករ កីឡាការិនីអុំទូក ចែវទូក…
រាជធានីភ្នំពេញ ៖ លោគ ឃួង ស្រេង អភិបាល នៃគណៈអភិបាលរាជធានីភ្នំពេញ បានស្នើសុំអោយកីឡាករ កីឡាការិនីអុំទូក ចែវទូក និងប្រជាពលរដ្ឋ ចូលរួមថែរក្សាបរិស្ថានទាំងអស់គ្នា និងសុំអោយអាជីវករលក់ដូរទាំងអស់ កុំដំឡើងថ្លៃម្ហូបអាហារ ក្នុងឱកាសព្រះរាជពិធីបុណ្យអុំទូក បណ្តែតប្រទីប សំពះព្រះខែ និងអកអំបុក ដែលនឹងប្រព្រឹត្តទៅនាប៉ុន្មានថ្ងៃ ខាងមុខនេះ ។
ការស្នើសុំនេះរបស់លោក ឃួង ស្រេង បានធ្វើឡើងនាព្រឹកថ្ងៃទី១២ ខែវិច្ឆិកានេះ នៅរមណីដ្ឋានវប្បធម៏ប្រវត្តិសាស្ត្រវត្តភ្នំ ខណៈលោក និងលោកស្រី ជា ស៊ីណា ឃួង ស្រេង អញ្ជើញជាអធិបតីភាព ក្នុងពិធីក្រុងពាលី សម្រាប់ការប្រណាំងទូក ថ្នាក់រាជធានីភ្នំពេញ នៅរសៀលថ្ងៃទី១២ ខែវិច្ឆិកានេះផង និងបួងសួងសុំសេចក្តីសុខ ជូនប្រជាពលរដ្ឋទាំងអស់ ក្នុងព្រះរាជពិធីបុណ្យអុំទូក បណ្តែតប្រទីប សំពះព្រះខែ និងអកអំបុក នាពេលខាងមុខផង ក្នុងនាមរាជធានីភ្នំពេញជាម្ចាស់ផ្ទះជាកន្លែងប្រារពព្រះរាជពិធី ។
ការប្រារព្វពិធីបែបសាសនានេះ មានគោលបំណង សុំម្ចាស់ទឹក ម្ចាស់ដី បារមីលោកយាយដូនពេញ សូមជួយតាមបីបាច់ថែរក្សាចំណុះទូក និងសុំអោយដំណើរការប្រារព្វព្រះរាជពិធីបុណ្យអុំទូកប្រព្រឹត្តទៅដោយរលូន និងជោគជ័យ ប្រកបដោយសុខសុវត្ថិភាព និងប្រកបដោយភាពរីករាយស្និតស្នាល រក្សាបានប្រពៃណី ទំនៀមទំលាប់ជាតិ និងសាមគ្គីភាព មិត្តភាព ។
លោក ឃួង ស្រេង អភិបាលរាជធានីភ្នំពេញ បានថ្លែងក្នុងពិធីក្រុងពាលី សម្រាប់ការប្រណាំងទូក ថ្នាក់រាជធានីភ្នំពេញ ថា ៖ ព្រះរាជពិធីបុណ្យអុំទូក បណ្តែតប្រទីប សំពះព្រះខែ និងអកអំបុក បានទាក់ទាញការចាប់អារម្មណ៏យ៉ាងខ្លាំងពីសំណាក់ភ្ញៀវជាតិ អន្តរជាតិ និងបងប្អូនប្រជាពលរដ្ឋគ្រប់តំបន់ ដែលជាការរួមចំណែកថែរក្សា នូវប្រពៃណី ទំនៀមទំលាប់ជាតិ តាំងពីយូលង់មកហើយ។ ព្រះរាជពិធីបុណ្យនេះ មានបំណងបង្ហាញពីការរំលឹកដឹងគុណដល់កងទព័ជើងទឹក ដ៏ខ្លាំងពូកែ ក្នុងបុព្វហេតុការពារបូរណៈភាពទឹកដីរបស់បុព្វបុរសខ្មែរ ច្រើនជំនាន់មកហើយ។ អត្ថន័យមួយទៀត គឺជាការបង្ហាញពីការដឹងគុណ ព្រះគង្គា ដែលបាននាំមកនូវទឹក និងដីល្បាប់ ដ៏មានជីជាតិ សម្រាប់ផលដំណាំដាំដុះរបស់ប្រជាពលរដ្ឋយើង ក្នុងការលើកស្ទួយវិស័យកសិកម្មជាតិ ឲ្យមានការរីកចម្រើន។ ម្យ៉ាងទៀត ក៏ជាការផ្តល់ឱកាសសប្បាយរីករាយ និងសាមគ្គីភាព ក្នុងមហាគ្រួសាសម្រាប់បងប្អូនប្រជាពលរដ្ឋខ្មែរ ក្នុងសុខសន្តិភាព ដ៏បរិបូណ៏ រួមទាំងដំណើរការអភិវឌ្ឍន៏ ប្រទេសជាតិយ៉ាងឆាប់រហ័ស ពិសេសនៅរាជធានីភ្នំពេញ ក្រោមការដឹកនាំរបស់សម្តេចមហាវរធិបតី ហ៊ុន ម៉ាណែត នាយករដ្ឋមន្ត្រី ។
លោក ឃួង ស្រេង ក្នុងឱកាសនោះ ក៏បានណែនាំអោយអាជ្ញាធរ កងកម្លាំងទាំងអស់ ត្រូវពង្រឹងសន្តិសុខ សុវត្ថិភាព ទប់ស្កាត់បទល្មើសលូច ឆក់ ប្លន់ ការពារបងប្អូនប្រជាពលរដ្ឋ ដែលមកលេងកំសាន្តនៅព្រះរាជពិធីបុណ្យអុំទូកនេះ។ ប៉ុន្តែទោះបីជាយ៉ាងណាក្តី អនុវត្តតាមអនុសាសន៏ណែនាំរបស់សម្តេចមហាវរធិបតីហ៊ុន ម៉ាណែត គណៈបញ្ជាការឯកភាពរាជធានីភ្នំពេញ បានត្រៀមរួចរាល់ហើយ ក្នុងការរក្សាសន្តិសុខ សុវត្ថិភាព សណ្តាប់ធ្នាប់របៀបរៀបរយសាធារណៈ ជូនប្រជាពលរដ្ឋមកលេងបុណ្យអុំទូកឆ្នាំនេះ ឲ្យទទួលបានភាពសប្បាយរីករាយ ។
លោក ឃួង ស្រេង អភិបាលរាជធានីភ្នំពេញ ក៏បានអំពាវនាវបន្ថែមទៀតដល់បងប្អូនជាកីឡាករ.កីឡាការនីអុំទូកទាំងអស់ ត្រូវប្រកាន់ភ្ជាប់នូវអនាម័យល្អ ហូបស្អាត ផឹកស្អាត រស់នៅស្អាត និងសម្រាកឲ្យបានគ្រប់គ្រាន់ ជៀសវាងផលប៉ះពាល់ដល់សុខភាព ដែលវានឹងប៉ះពាល់ដល់ការប្រកួត រួមទាំងការពង្រឹងសាមគ្គីភាព ក្នុងចំណោមបងប្អូនកីឡាករទាំងអស់ ដោយក្តីយោគយល់ និងអធ្យាស្រ័យគ្នា ដើម្បីរួមគ្នាលើកតំកើងប្រពៃណីទំនៀមទំលាប់ជាតិ ។
លោក ហែម ស៊ីណារ៉េត ប្រធានមន្ទីរមន្ទីរអប់រំ យុវជន និងកីឡា រាជធានីភ្នំពេញ ឲ្យដឹងថា ៖ ទូកទាំងអស់ ដែលត្រូវប្រណាំងក្នុងព្រះរាជពិធីបុណ្យអុំទូកនេះ មានចំនួន៤៤ទូក មកពី១២ខណ្ឌ ក្នុងចំណោម១៤ខណ្ឌ ក្នុងរាជធានីភ្នំពេញ ដោយបានចែកចេញជា ៣ប្រភេទ គឺទូកអុំខ្នាតអន្តរជាតិ, ទូកអុំបុរស និងទូកចែវបុរស ដោយមាន កីឡាករ កីឡាការិនី សរុបចំនួន ៣,១៩៣នាក់ (ស្រី៩២នាក់) ៕
ចែករំលែកព័តមាននេះ