- ភ្នំពេញ
ពិធីបុណ្យអុំទូក អកអំបុក សំពះព្រះខែ និងបណ្តែតប្រទីប ជាពិធីបុណ្យប្រពៃណីដ៏សំខាន់បំផុតមួយរបស់កម្ពុជាប្រចាំខែវិច្ឆិកា ។ វា គឺជាការបញ្ចូលគ្នានៃពិធីសាសនា និងប្រវត្តិសាស្ត្រដែលមានតាំងបុរាណកាលមក ។…
ពិធីបុណ្យអុំទូក អកអំបុក សំពះព្រះខែ និងបណ្តែតប្រទីប ជាពិធីបុណ្យប្រពៃណីដ៏សំខាន់បំផុតមួយរបស់កម្ពុជាប្រចាំខែវិច្ឆិកា ។ វា គឺជាការបញ្ចូលគ្នានៃពិធីសាសនា និងប្រវត្តិសាស្ត្រដែលមានតាំងបុរាណកាលមក ។
ពិធីបុណ្យដែលគ្រោងនឹងរៀបចំចាប់ពីថ្ងៃ១៤ កើត ដល់១រោច ខែកក្តិក ឆ្នាំរោងត្រូវនឹងថ្ងៃទី១៤ ដល់១៦ ខែវិច្ឆិកា ចុងសប្តាហ៍នេះជាពិធីផ្សារភ្ជាប់ទាំងផ្នែកខាងវិញ្ញាណ និងប្រពៃណីខាងយោធា ។ ជាប្រវត្តិសាស្ត្រ ពិធីនេះត្រូវបានរៀបចំឡើង ដើម្បីរំលឹក និងបង្ហាញចំពោះឧត្តមភាព និងអានុភាពកងទ័ពជើងទឹករបស់កម្ពុជា ។
ការរៀបចំព្រឹត្តិការណ៍នៅចុងសប្តាហ៍នេះ មិនត្រឹមតែផ្តល់នូវការជួបជុំ ដើម្បីត្រឹមតែប្រពៃណី និងវប្បធម៌ប៉ុណ្ណោះទេ ប៉ុន្តែក៏ជាពេលមួយដើម្បីឆ្លុះបញ្ចាំងពីសេចក្តីប្រាថ្នានៃកងទ័ពជើងទឹករបស់កម្ពុជាក្នុងបរិបទនៃវិស័យសន្តិសុខនាសម័យទំនើប និងការប្រកួតប្រជែងក្នុងតំបន់ ។ បច្ចុប្បន្ននេះ កងទ័ពជើងទឹករបស់កម្ពុជា ហាក់មានសភាពនៅពីក្រោយប្រទេសជិតខាងក្នុងតំបន់ជាច្រើន ដែលជាគម្លាតរាជរដ្ឋាភិបាល ត្រូវដោះស្រាយ នៅពេលដែលប្រទេសនេះសម្លឹងមើលការការពារដែនទឹករបស់ខ្លួន និងលើកកម្ពស់ស្ថិរភាពក្នុងតំបន់ ជាពិសេសគឺសន្តិសុខនៅលំហរសមុទ្រ ។
ដើមកំណើតនៃពិធីបុណ្យអុំទូក ស្ថិតនៅក្នុងទំនាក់ទំនងរបស់ប្រទេសកម្ពុជាទៅនឹងទន្លេ និងបឹង ដែលជាប្រភពនៃអាហារ ការដឹកជញ្ជូន និងការការពារជាច្រើនសតវត្សមកហើយ ។ កាលពីមុនព្រឹត្តិការណ៍នេះគឺជាវិធីមួយ ដើម្បីបង្ហាញពីភាពខ្លាំងនៃកងទ័ពជើងទឹករបស់ប្រទេសជាតិ ។ ពិធីបុណ្យអុំទូក ជានិមិត្តរូបនៃការដឹងគុណរបស់កម្ពុជា ចំពោះជីវិតដែលប្រភពទឹកនាំមក ខណៈការប្រណាំងទូក គឺជាសក្ខីភាពនៃកម្លាំងទ័ពជើងទឹករបស់ប្រទេស ។ ការប្រណាំងទូកទាំងនេះនៅតែជាបេះដូងនៃពិធីបុណ្យអុំទូកនាពេលបច្ចុប្បន្ននេះ។
ខណៈពេលដែលពិធីបុណ្យនេះបាន និងកំពុងរក្សានូវប្រពៃណី និងបង្ហាញនូវឧត្តមភាពនៃកងទ័ពជើងទឹក កងទ័ពជើងទឹករបស់ខ្លួនកម្ពុជាបាន និងកំពុងជម្នះដើម្បីបន្តជាមួយនឹងបញ្ហាប្រឈមនានា និងការអភិវឌ្ឍក្នុងតំបន់ ជាពិសេស គឺការធ្វើទំនើបកម្មនៃកងទ័ពជើងទឹក ។
នៅក្នុងបរិបទនៅអាស៊ីអាគ្នេយ៍ អំណាចកងទ័ពជើងទឹកកាន់តែមានសារៈសំខាន់ ខណៈដែលប្រទេសនានាផ្តល់អាទិភាពដល់ទំនើបកម្មនៃកងកម្លាំងយោធារបស់ពួកគេ ។ ប្រជាជាតិនានាដូចជា វៀតណាម ថៃ និងឥណ្ឌូនេស៊ី សុទ្ធតែបានកំពុងធ្វើការបណ្តាក់ទុនយ៉ាងសំខាន់នៅក្នុងកងកម្លាំងជើងទឹករបស់ពួកគេ តាមរយៈការទិញនាវា និងបំពាក់បច្ចេកវិទ្យាទំនើបៗ។
សម្រាប់កងទ័ពជើងទឹកកម្ពុជានៅពេលនេះវិញ គឺបានកំពុងតែប្រឈមមុខនឹងបញ្ហាធំៗជាច្រើន ។ ជាមួយនឹងឧបករណ៍យោធា និងធនធានមានកម្រិត កងកម្លាំងជើងទឹកកម្ពុជា កំពុងតែតស៊ូជម្នះនូវការលំបាកទាំងនេះ ដើម្បីបំពេញកាតព្វកិច្ចការពារដែនទឹករបស់ខ្លួននិងការចូលរួមនៅក្នុងកិច្ចខិតខំប្រឹងប្រែងរក្សាសន្តិសុខក្នុងតំបន់ ។
ពិធីបុណ្យអុំទូក គឺជាការរំលឹកប្រចាំឆ្នាំអំពីទំនាក់ទំនងប្រវត្តិសាស្ត្ររបស់កម្ពុជាជាមួយកងទ័ពជើងទឹក ហើយវាក៏ផ្តល់នូវវេទិកាដ៏ល្អសម្រាប់ការពិភាក្សាអំពីទំនើបកម្មនៃកងទ័ពជើងទឹកផងដែរ ។ ដើម្បីពង្រឹងសន្តិសុខ និងអធិបតេយ្យភាពរបស់ខ្លួន កម្ពុជាគួរតែសម្លឹងឆ្ពោះទៅរកការធ្វើទំនើបកម្មកងកម្លាំងជើងទឹករបស់ខ្លួន ស្របតាមកិច្ចខិតខំប្រឹងប្រែងក្នុងតំបន់ និងពង្រឹងកិច្ចសហប្រតិបត្តិការជាមួយសម្ព័ន្ធមិត្ត ។ ការអភិវឌ្ឍភាពជាដៃគូជាមួយប្រទេសជិតខាង និងការចូលរួមក្នុងគំនិតផ្តួចផ្តើមការពារក្នុងតំបន់អាចជួយកម្ពុជាទទួលបានចំណេះដឹង និងធនធានចាំបាច់ ដើម្បីកសាងកម្លាំងទ័ពជើងទឹកឱ្យកាន់តែរឹងមាំ ។
ទំនើបភាវូបនីយកម្មក៏នឹងអនុញ្ញាតឱ្យកម្ពុជាធ្វើឱ្យប្រសើរឡើងនូវសមត្ថភាពរបស់ខ្លួនក្នុងការឆ្លើយតបទៅនឹងការនេសាទខុសច្បាប់ ការរត់ពន្ធ និងបញ្ហាផ្សេងទៀតដែលប៉ះពាល់ដល់សុវត្ថិភាព និងវិបុលភាពនៃដែនទឹករបស់ខ្លួន ។
ទំនើបកម្មកងទ័ពជើងទឹកតម្រូវឱ្យមានការរួមបញ្ចូលគ្នានៃការវិនិយោគ ការបណ្តុះបណ្តាល និងចក្ខុវិស័យយុទ្ធសាស្ត្រ ។ ខណៈពេលដែលប្រទេសប្រហែលជាមិនមានធនធាន ដើម្បីទំនើបកម្មកងកម្លាំងនេះឲ្យពេញដៃពេញជើង ការវិនិយោគបន្តិចម្តងៗក្នុងទំនើបកម្មដូចដែលបានកំពុងធ្វើអាចបង្កើតភាពខុសគ្នាយ៉ាងច្រើន ។ ជាឧទាហរណ៍ ការបំពាក់នាវាល្បាតតូចៗ និងមានល្បឿនលឿន និងការកែលម្អកម្មវិធីហ្វឹកហ្វឺនអាចបង្កើនសមត្ថភាពការពាររបស់កម្ពុជានៅតាមឆ្នេរសមុទ្រ និងផ្លូវទឹករបស់ខ្លួន ។ ផែនការរយៈពេលវែងអាចរួមបញ្ចូលការធ្វើឱ្យប្រសើរឡើងនូវបច្ចេកវិទ្យាក៏ដូចជា ការផ្លាស់ប្តូរការបណ្តុះបណ្តាលជាមួយប្រទេសជាដៃគូ ដើម្បីកសាងកម្លាំងដែលកាន់តែមានចំណេះដឹង និងប្រសិទ្ធភាព ។
សរុបមកវិញ ពិធីបុណ្យអុំទូក តំណាងឱ្យការរួបរួម និងកម្លាំងរបស់ប្រជាជនដូចនេះទំនើបកម្មកងទ័ពជើង អាចក្លាយជាប្រភពនៃមោទនភាព និងសន្តិសុខជាតិ ដែលធានាបានថា ដែនទឹករបស់កម្ពុជានៅតែត្រូវបានការពារសម្រាប់មនុស្សជំនាន់ក្រោយ ។ តាមរយៈការភ្ជាប់អតីតកាលជាមួយអនាគត ប្រទេសកម្ពុជាអាចរក្សាប្រពៃណីរបស់ខ្លួន ខណៈពេលដែលធានាបាននូវទីតាំង របស់ខ្លួននៅក្នុងពិភពលោកដែលមានការផ្លាស់ប្តូរយ៉ាងឆាប់រហ័ស ៕
ចែករំលែកព័តមាននេះ