រាជធានីភ្នំពេញ ៖ អគ្គិភ័យមួយបានឆាបឆេះបង្គោលភ្លើងចំនួន២ដើមឆេះយ៉ាងសន្ធោសន្ធៅតែត្រូវបានបងប្អូនប្រជាពលរដ្ឋនាំគ្នាយកបំពង់ពន្លត់អគ្គិភ័យបាញ់ពន្លត់ទាន់ពេលវេលា បង្កអោយមានការភ្ញាក់ផ្អើលកាលពីវេលាម៉ោង២ឈានចូលថ្ងៃទី១១ ខែវិច្ឆិកា ឆ្នាំ២០២៤ នៅតាមបណ្តោយផ្លូវវេងស្រេង ទល់មុខ ក្រុមហ៊ុនលក់ម៉ូតូ ម៉ាកហុងដា ស្ថិតនៅសង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ ។

តាមប្រភពពត៌មានពីកន្លែងកើតហេតុបាននិយាយប្រាប់ថា នៅមុនពេលកើតហេតុ មានការឆ្លងចរន្តនិងទុស្សេខ្សែភ្លើងឆេះខ្សែភ្លើងជាប់និងបង្គោលបណ្តាលឲ្យការឆាបឆេះយ៉ាងសន្ធោសន្ធៅ ។ ខណៈពេលកើតហេតុភ្លាមៗ មានបងប្អូនប្រជាពលរដ្ឋនៅកន្លែងកើតហេតុ បាននាំគ្នាយកបំពង់ពន្លត់អគ្គិភ័យ ដើម្បីយកមកបាញ់ពន្លត់ភ្លាមៗ ដោយនាំគ្នាបានបាញ់ពន្លត់អស់ប្រមាណជិត២០បំពង់ ទើបបានរលត់ ។

បង្គោលភ្លើងនៅទីតាំងកន្លែងកើតហេតុ ជាកន្លែងផ្ទុកកាប៊ីនភ្លើងដ៏ធំ តែការឆាបឆេះ មិនរាលដាលដល់កាប៊ីនភ្លើងឡើយ គឺឆាបឆេះតែខ្សែភ្លើង នឹងខ្សែអ៊ុកទិច ដែលជាប់ជាមួយបង្គោលភ្លើង ចំនួន២ដើមខាងលើតែប៉ុណ្ណោះ ហើយរងការខូចខាតយ៉ាងធ្ងន់ធ្ងរ ។

ប្រភពព័ត៌មានពីកន្លែងកើតហេតុបានបន្តទៀតថា ខណៈពេលអគ្គិភ័យឆាបឆេះ បង្គោល ភ្លើងខាងលើ កំលាំងសមត្ថកិច្ចមូលដ្ឋាន បានទាក់ទងទៅ អគ្គិសនីកម្ពុជាភ្លាម ដើម្បីអោយបិទភ្លើងនឹងកុំអោយឆាបឆេះបន្ត ។

ក្រោយពេលកើតហេតុ បន្ទាប់ពី​បង្គោលភ្លើងចំនួន២ដើមខាងលើត្រូវបានឆាបឆេះហើយត្រូវបានប្រជពលរដ្ឋបាញ់ពន្លត់រួច ខាងជំនាញអគ្គិសនី បានមកដល់កន្លែងកើតហេតុហើយកំពុងតែជួសជុលនឹងប្តូរខ្សែភ្លើងវិញជាបន្តបន្ទាប់ ៕