រាជធានីភ្នំពេញ ៖ ក្មេងប្រុសជំទង់ម្នាក់ ខណៈចេញពីរៀន បានជិះម៉ូតូ ១គ្រឿង ទៅផ្ទះ លុះដល់ផ្លូវត្រូវចូលទៅផ្ទះ ក៏បានបត់ឆ្វេងផ្លូវ ក៏ស្រាប់តែមានរថយន្តម៉ាកតូយ៉ូតា…
រាជធានីភ្នំពេញ ៖ ក្មេងប្រុសជំទង់ម្នាក់ ខណៈចេញពីរៀន បានជិះម៉ូតូ ១គ្រឿង ទៅផ្ទះ លុះដល់ផ្លូវត្រូវចូលទៅផ្ទះ ក៏បានបត់ឆ្វេងផ្លូវ ក៏ស្រាប់តែមានរថយន្តម៉ាកតូយ៉ូតា ស៊ីណា ១គ្រឿង បើកបរដោយបុរសជនជាតិចិនម្នាក់ ក្នុងល្បឿនលឿន ទៅដល់បុកពេញទំហឹង បណ្ដាលឲ្យប៉ើងខ្ទាត ជាច្រើនម៉ែត្រ ស្លា.ប់ភ្លាមៗ នៅនឹងកន្លែង ។
ឧប្បត្តិហេតុនោះបានកើតឡើងកាលពីវេលាម៉ោង១១និង២០នាទីព្រឹកថ្ងៃទី៦ ខែវិច្ឆិកា ឆ្នាំ២០២៤ នៅតាមមហាវិថី ស៊ី ជីនពីង ហៅផ្លូវក្រវាត់ក្រុងទី៣ ត្រង់ចំណុចមុខវត្តគោខ្សាច់ ស្ថិតនៅក្នុងភូមិគោកខ្សាច់ សង្កាត់ភ្លើងឆេះរទេះ ខណ្ឌកំបូល រាជធានីភ្នំពេញ ។
ក្មេងប្រុសរងគ្រោះដែលបាត់បង់ជីវិតនោះ មានឈ្មោះ ណាំង បញ្ញា អាយុ១៦ឆ្នាំ ជាសិស្សរៀននៅវិទ្យាល័យពងទឹក មានទីលំនៅភូមិក្នុងភ្លើងឆេះរទេះលិច សង្កាត់ភ្លើងឆេះរទេះ ខណ្ឌកំបូល ជិះម៉ូតូ ១គ្រឿង ម៉ាកហុងដាប៊ីត ពណ៌សលាយខៀវ ពាក់ស្លាកលេខភ្នំពេញ1HI-6738 ។ ដោយឡែក រថយន្ត ១គ្រឿង ម៉ាកតូយ៉ូតា ស៊ីណា ១គ្រឿង ពណ៌ស ពាក់ស្លាកលេខភ្នំពេញ 2BD-0596 បើកបរដោយបុរសជនជាតិចិនម្នាក់ ។
អ្នកភូមិគោកខ្សាច់ បាននិយាយថា នៅមុនពេលកើតហេតុ ក្មេងប្រុសរងគ្រោះ បានធ្វើដំណើរចេញពីសាលាទៅផ្ទះ ក្នុងទិសដៅពីត្បូងទៅជើង លុះពេលទៅដល់ត្រង់ចំណុចកើតហេតុ បានបត់ឆ្វេងឆ្លងផ្លូវចូលទៅផ្ទះ ស្របពេលនោះ ក៏ស្រាប់តែរថយន្តខាងលើបើកបរក្នុងល្បឿនលឿន ក្នុងទិសដៅពីជើងទៅត្បូង ទៅដល់បុកពេញទំហឹង បណ្ដាលឲ្យខ្ទាតច្រើនម៉ែត្រ ស្លា.ប់ភ្លាមៗតែម្ដង ។
ប្រភពដដែល បានឲ្យដឹងទៀតថា ខណៈនោះម៉ូតូរងការខូចខាត ។ ចំណែករថយន្តបានឈប់ស្ងៀម ហើយអ្នកបើកបរជាជនជាតិចិនខាងលើ ត្រូវបាននគរបាលឃាត់ខ្លួន នាំទៅកាន់ប៉ុស្តិ៍ភ្លើងឆេះរទេះ ។
ក្រោយពេលកើតហេតុ នគរបាលការិយាល័យចរាចរផ្លូវគោក នៃស្នងការដ្ឋានរាជធានីភ្នំពេញ ចុះធ្វើការវាស់វែង និងនាំយករថយន្តនិងម៉ូតូទៅរក្សាទុក ដើម្បីដោះស្រាយគ្នា នៅពេលក្រោយ ៕
ចែករំលែកព័តមាននេះ