ខេត្តកំពង់ស្ពឺ ៖ ត្រកួនគ្រាប់ (ឬហៅថា ត្រកួនចិន) ត្រូវបានប្រជាពលរដ្ឋជាច្រើនគ្រួសារ ដែលរស់នៅក្នុងភូមិអង្វេរ ឃុំក្រាំងអំពិល ស្រុកសំរោងទង ខេត្តកំពង់ស្ពឺបានដាំជាលក្ខណៈគ្រួសារ…
ខេត្តកំពង់ស្ពឺ ៖ ត្រកួនគ្រាប់ (ឬហៅថា ត្រកួនចិន) ត្រូវបានប្រជាពលរដ្ឋជាច្រើនគ្រួសារ ដែលរស់នៅក្នុងភូមិអង្វេរ ឃុំក្រាំងអំពិល ស្រុកសំរោងទង ខេត្តកំពង់ស្ពឺបានដាំជាលក្ខណៈគ្រួសារ ហើយមានតម្លៃទាប ខណៈដែលពួកគាត់ប្រើដើមទុនច្រើន ពេលប្រមូលផលមិនអាចផ្គត់ផ្គង់ជីវភាពគ្រួសារបាន ។
ពួកគាត់មិនដឹងថា បន្លែត្រកួនធ្លាក់តម្លៃទាបនេះ ដោយសារតែឈ្មួញកណ្តាលទំលាក់តម្លៃ ឬមួយក៏ខាងទីផ្សារនោះទេ សូមឱ្យមន្ទីរជំនាញ និងរាជរដ្ឋាភិបាល មេត្តាជួយរកទីផ្សារឱ្យកសិករដាំបន្លែលក្ខណៈគ្រួសារដែលបានដាំនៅក្នុងអង្វេរ ឃុំក្រាំងអំពិល ស្រុកសំរោងទងផង ។
អ្នកស្រី យ៉ៃ ធីម អាយុ៦៩ឆ្នាំ មុខរបរកសិករ រស់នៅក្នុងភូមិអង្វែ ឃុំក្រាំងអំពិល ស្រុកសំរោងទង ខេត្តកំពង់ស្ពឺបានរៀបរាប់ឱ្យដឹងថា អ្នកស្រីបានដាំបន្លែត្រកួនគ្រាប់ (ឬហៅថា ត្រកួនចិន)ជាលក្ខណៈគ្រួសារនេះជាង២០ឆ្នាំមកហើយ ។ បន្លែត្រកួននេះ ងាយស្រួលដាំអាចចំណេញប្រាក់ផ្គត់ផ្គង់ជីវភាពគ្រួសារ និងអាចផ្គត់ផ្គង់ឱ្យកូនៗរបស់គាត់បានសិក្សារៀនសូត្របានផងដែរ ។
អ្នកស្រី យ៉ៃ ធីម ជាកសិករអ្នកដាំបន្លែត្រកួនបានបន្តទៀតថា សម្រាប់ការដាំត្រកួនគ្រាប់ (ឬហៅថាត្រកួនចិន) នេះ ការចំណាយអស់គួរសមដែរ សម្រាប់ធ្វើចំនួនពីររងនេះ ទាំងជួលគេភ្ជួររាស់ដីបាចគ្រាប់ ជី និងចំណាយផ្សេងៗអស់ចាប់ពី២០ ទៅ៣០ម៉ឺនរៀល ។ បើតម្លៃចាប់ពី១០០០រៀលឡើងទៅ ទើបបានចំណេញប្រាក់គ្រាន់ផ្គត់ផ្គង់ក្នុងជីវភាពគ្រួសារបាន ប៉ុន្តែបច្ចុប្បន្ននេះ តម្លៃធ្លាក់រហូតដល់៩០០រៀលទៅហើយនោះច្បាស់ជាខាតដើមហើយ ។
កសិករអ្នកដាំត្រកួន អ្នកស្រី យ៉ៃ ធីម បានបន្ថែមថា ចំពោះការថែទាំត្រកួនវិញងាយស្រួលទេ គឺបន្ទាប់ពីភ្ជួរដីពូនជារងរួចហើយ យើងបាចគ្រាប់បាន៦ ទៅ៧ថ្ងៃ បាចជីធម្មជាតិ មានដូចជាជីអាចម៍មាន់ អាចម៍ទា អាចម៍គោជាដើម ហើយក៏មានលាយជីរបស់ក្រុមហ៊ុនតិចតួចដែរ បើខែប្រាំងស្រោចទឹករាល់ថ្ងៃ ។ លុះត្រកួនអាយុកាលបានចំនួន១០ថ្ងៃយើងចាប់បាចជីម្តងទៀតត្រកួនសាល់ល្អ លុះដល់អាយុ១៨ ទៅ២០ថ្ងៃ គឺអាចប្រមូលផលត្រកួនគ្រាប់(ឬហៅថា ត្រកួនចិន)បានហើយ។
សម្រាប់តម្លៃត្រកួនមិនស្ថិតស្ថេរនោះទេ គឺតម្លៃនៅលើមាត់របស់អ្នកទិញឬក៏ឈ្មួញកណ្តាលតែប៉ុណ្ណោះ ជួនពេលខ្លះតម្លៃត្រកួនអាចឈានដល់៣០០០រៀល ទៅ៤០០០រៀលក្នុង១គីឡូក្រាមក៏មាន ហើយសម្រាប់តម្លៃធ្លាក់ចុះខ្លាំង៥០០រៀលក៏មានដែរ ។ ពេលនេះ គាត់ប្រមូលផលលក់ឱ្យឈ្មួញកណ្តាលបានតម្លៃត្រឹមតែ៩០០រៀលតែប៉ុណ្ណោះ ហើយត្រូវលាងសម្អាតត្រកួនឱ្យស្អាតល្អ ទើបគេមកថ្លឹងត្រូវចិត្តរបស់ឈ្មួញ ។
អ្នកស្រី យ៉ៃ ធីម ជាកសិករអ្នកដាំត្រកួនរស់នៅក្នុងភូមិអង្វេរ ឃុំក្រាំងអំពិល ស្រុកសំរោងទង ខេត្តកំពង់ស្ពឺ ធ្វើការសំណូមពរដល់អ្នកទិញ ឬហៅថា ឈ្មួញកណ្តាលនោះ មេត្តាជួយឱ្យតម្លៃដល់កសិករអ្នកដាំផង ចង់បានណាស់តម្លៃថេរត្រឹមតម្លៃ១០០០រៀលក៏បានចំណេញខ្លះដែរ មិនបាច់ឡើងចុះតាមតែមាត់នោះទេ និងសូមឱ្យអាជ្ញាធរ មន្ទីរជំនាញពាក់ព័ន្ធ និងជាពិសេស សំណូមពរដល់រាជរដ្ឋាភិបាល មេត្តាជួយរកទីផ្សារដល់កសិករដែលជាអ្នកដាំដំណាំបន្លែត្រកួនគ្រាប់ (ឬហៅថាត្រកួនចិន)នេះ ឱ្យបានតម្លៃខ្ពស់ផងទាន គ្រាន់បានកសិករបានកម្រៃអាចចិញ្ចឹមគ្រួសារ និងផ្គត់ផ្គង់កូនចៅរៀនសូត្របានផងដែរ៕
ចែករំលែកព័តមាននេះ