រាជធានីភ្នំពេញ ៖ ប្រជាពលរដ្ឋប្រមាណជាង២០០នាក់ បាននាំគ្នាលើកទៅផ្ទះលោកឧកញ៉ា ហ៊ី គឹមហុង អគ្គនាយកក្រុមហ៊ុនពិភពដីមាសដើម្បីទាមទារឲ្យសមត្ថកិច្ចចាប់ខ្លួនលោកឧកញ៉ា ជាថ្មី ដើម្បីដោះស្រាយសងប្រាក់ជនរងគ្រោះ ព្រោះលោកឧកញ៉ា…
រាជធានីភ្នំពេញ ៖ ប្រជាពលរដ្ឋប្រមាណជាង២០០នាក់ បាននាំគ្នាលើកទៅផ្ទះលោកឧកញ៉ា ហ៊ី គឹមហុង អគ្គនាយកក្រុមហ៊ុនពិភពដីមាសដើម្បីទាមទារឲ្យសមត្ថកិច្ចចាប់ខ្លួនលោកឧកញ៉ា ជាថ្មី ដើម្បីដោះស្រាយសងប្រាក់ជនរងគ្រោះ ព្រោះលោកឧកញ៉ា បានសន្យាថា នឹងចេញមុខមកដោះស្រាយសំណងដល់ជនរងគ្រោះ បន្ទាប់ពីត្រូវបានតុលាការដោះលែង ឲ្យនៅក្រៅឃុំ តែតាមពិតជាល្បិច តែប៉ុណ្ណោះ ។
ការតវ៉ានេះ បានផ្ទុះឡើងជាថ្មី នៅវេលាថ្ងៃត្រង់ ថ្ងៃទី៤ ខែវិច្ឆិកា ឆ្នាំ២០២៤ ដោយប្រជាពលរដ្ឋលើកគ្នាទៅផ្ទះរបស់លោកឧកញ៉ា ហ៊ី គឹមហុង ស្ថិតនៅបុរីវារីណា ក្នុងសង្កាត់ក្រាំង ខណ្ឌសែនសុខ រាជធានីភ្នំពេញ និងបាននាំគ្នាបិទផ្លូវ ទទូចឲ្យអាជ្ញាធរ និងសមត្ថកិច្ចព្រមទាំងតុលាការចាត់វិធានការចាប់ខ្លួនលោកឧកញ៉ា ឲ្យមកដោះស្រាយ សងប្រាក់ជនរងគ្រោះវិញ ។
តាមប្រជាពលរដ្ឋ ឲ្យដឹងថា លោកឧកញ៉ា ហ៊ី គឹមហុង ជាមនុស្សបោកប្រាស់ ដែលបានសន្យាថា បើសិនគាត់បានចេញពីពន្ធនាគារ គាត់នឹងដោះស្រាយសងប្រាក់បងប្អូនប្រជាពលរដ្ឋដែលរងគ្រោះវិញ តែតាមពិត ជាល្បិចរបស់គាត់ ដើម្បីឲ្យរួចខ្លួន តែប៉ុណ្ណោះ ។
ប្រជាពលរដ្ឋ ក៏បានស្នើសុំដល់ថ្នាក់ដឹកនាំ ឲ្យជួយអន្តរាគមន៍ ដើម្បីចាប់ខ្លួនលោកឧកញ៉ាបោកប្រាស់ជាថ្មីម្ដងទៀត ។
បន្ទាប់ពីមានការតវ៉ាបិទផ្លូវ អាជ្ញាធរខណ្ឌសែនសុខ លោក ម៉ូវ ម៉ានិត អភិបាលខណ្ឌ ក៏បានចុះទៅសម្របសម្រួល ណែនាំឲ្យប្រជាពលរដ្ឋបើកផ្លូវ ដើម្បីសម្រួលចរាចរណ៍ ឡើងវិញ ។
គួរបញ្ជាក់ថា កន្លងមកប្រជាពលរដ្ឋរងគ្រោះរាប់រយនាក់ បានលើកគ្នាទៅស្នាក់ការក្រុមហ៊ុន ស្ថិតនៅភូមិត្រពាំងថ្ងាន់ សង្កាត់ពន្សាំង ខណ្ឌព្រែកព្នៅ រាជធានីភ្នំពេញ ជាបន្តបន្ទាប់ ដើម្បីទាមទារប្រាក់ពីក្រុមហ៊ុន បន្ទាប់ពីពួកគេបានចាញ់បោកក្រុមហ៊ុនពិភពដីមាស ដោយទិញដី បានការប្រាក់ ។
កាលពីកំឡុង ឆ្នាំ២០២១-២០២២ ពួកគាត់រាប់ពាន់គ្រួសារ បាននាំគ្នាមកទិញដីរបស់ក្រុមហ៊ុនពិភពដីមាសនេះ នៅស្រុកឧត្តុង្គខេត្តកំពង់ស្ពឺ ក្នុងមួយឡូតិ៍ ១៥,០០០ដុល្លារ ហើយនៅក្នុងការទិញដីទៀតសោត គឺបានការប្រាក់បីភាគរយ ជាហេតុធ្វើអោយពួកគាត់បានយកប្លង់ដី និងផ្ទះទៅដាក់ធនាគារ ដើម្បីយកលុយ មកទិញដីពីក្រុមហ៊ុន បានការប្រាក់ និងខ្លះទៀតយកលុយទៅដាក់អោយក្រុមហ៊ុន ដើម្បីយកការប្រាក់ ក៏មានដែរ ប៉ុន្តែទីបំផុត បានការតែប៉ុន្មានខែ បាញ់បោកអស់ទាំងការ និងទាំងដើម ។
ក្រោយប្រជាពលរដ្ឋរាប់រយពាន់នាក់ បានផ្ទុះការតវ៉ាដុតកង់រថយន្តជាច្រើនលើកមកហើយ ព្រមទាំងមានការប៉ះទង្គិចគ្នា ក្រុមអង្គរក្សបានប្រើហិ.ង្សាមកលើសមត្ថកិច្ច ហើយត្រូវបានសមត្ថកិច្ចឃាត់ខ្លួនលោកឧកញ៉ា ហ៊ី គឹមហុង តែក្រោយមក ក៏ត្រូវតុលាការដោះលែងវិញ ដោយលោកឧកញ៉ាសន្យាថា នឹងដោះស្រាយសងសំណងដល់ជនរងគ្រោះ តែទីបំផុតទៅ គឺសន្យាខ្យល់ ៕
ចែករំលែកព័តមាននេះ