ខេត្តព្រះសីហនុ ៖ តាមរយៈកោះសន្តិភាពទឹកប្រាក់អំណោយសប្បុរសធម៌ត្រូវបាននាំទៅប្រគល់ដល់ដៃបុរសអភ័ព្វកើតជំងឺទាចទឹក ធ្ងន់ធ្ងរ ព្រមទាំងក្រុមគ្រួសារកាលពីព្រឹកថ្ងៃទី២១ មិថុនា ។ ថវិកាដែលបាននាំទៅប្រគល់ឱ្យដោយភ្នាក់ងារកោះសន្តិភាពនេះ ១-លោកជំទាវហ៊្វូ ឆេងសៀង ឧបត្ថម្ភ១០០ដុល្លារសហរដ្ឋអាមេរិក
ខេត្តព្រះសីហនុ ៖ តាមរយៈកោះសន្តិភាពទឹកប្រាក់អំណោយសប្បុរសធម៌ត្រូវបាននាំទៅប្រគល់ដល់ដៃបុរសអភ័ព្វកើតជំងឺទាចទឹក ធ្ងន់ធ្ងរ ព្រមទាំងក្រុមគ្រួសារកាលពីព្រឹកថ្ងៃទី២១ មិថុនា ។ ថវិកាដែលបាននាំទៅប្រគល់ឱ្យដោយភ្នាក់ងារកោះសន្តិភាពនេះ ១-លោកជំទាវហ៊្វូ ឆេងសៀង ឧបត្ថម្ភ១០០ដុល្លារសហរដ្ឋអាមេរិក ២-លោកប៊ូ រ៉ា និងអ្នកស្រីអ៊ូ ចាន់ថន ឧបត្ថម្ភ២០ម៉ឺនរៀល ។
អ្នកស្រីភូ មុំ អាយុ៥២ឆ្នាំ មានទីលំនៅក្នុងក្រុមទី៤៨ (ខាងកើតស្ពានទឹកសាប) ភូមិស្មាច់ដែង ឃុំរាម ស្រុកព្រៃនប់ ប្តីឈ្មោះឃី ឈុច អាយុ៥៥ឆ្នាំ មុខរបរដើរកាប់អុសលក់ដែលត្រូវជាឪពុកម្តាយបុរសកើតទាចទឹកនេះ បាននិយាយរៀបរាប់ទាំងទឹកមុខក្រៀមក្រំថា គាត់មានកូនចំនួន១០នាក់ (ស្រី៥នាក់ ប្រុស៥នាក់) ហើយកូនប្រុសដែលកើតជំងឺទាចទឹកនេះ ឈ្មោះឃី ណែត អាយុ៣៤ឆ្នាំ ជាកូនទី២ ។ កូនប្រុសនេះមានប្រពន្ធឈ្មោះដាំ យ៉េន អាយុ២៦ឆ្នាំ មានកូនស្រីម្នាក់ឈ្មោះឃី ស្រីលីម អាយុ២ឆ្នាំ តែបច្ចុប្បន្នបែកបាក់គ្នាហើយ ព្រោះតែកូនប្រុសគាត់មានជំងឺមិនអាចព្យាបាលបាន ។
អ្នកស្រីមុំបានបន្តថា មួយជីវិតរបស់គាត់នេះពុំដែលបានស្គាល់ពាក្យថា មានទេគឺស្គាល់តែពាក្យថាក្រ និងលំបាក ហើយឥឡូវនេះមិនត្រឹមតែក្រទេ វាថែមទាំងទាល់ច្រកទៀតផង ព្រោះតែកូនប្រុសទី២ កើតជំងឺទាចទឹកអស់រយៈពេល៨ខែមកហើយ ដោយមានអាការពោះឡើងធំ ជើងហើមដើរលែងរួច រហូតឥឡូវនេះហើមឡើងចេញទឹកទៀតផង ។ អ្នកស្រីចង់ព្យាបាលកូនប្រុសណាស់ តែគ្មានលទ្ធភាព ព្រោះសព្វថ្ងៃ នេះសង្ឃឹមតែលើប្តីរកស៊ីកាប់អុសបន្តិចបន្តួចលក់យកប្រាក់មកចិញ្ចឹមគ្រួសារដែលមានសមាជិករហូតដល់១៣នាក់ ។
ទោះបីជាបែបណាក្តី អ្នកស្រីមានក្តីរំភើបពន់ពេកណាស់ បន្ទាប់ពីបានទទួលថវិកាអំណោយសប្បុរសធម៌ពីម្ចាស់ទាន ។ ទឹកប្រាក់នេះ ច្រើនណាស់សម្រាប់ក្រុមគ្រួសារគាត់ដែលសូម្បីតែយល់សប្តិ ក៏មិនហ៊ានដែរ និងសូមបួងសួងដល់វត្ថុស័ក្តិសិទ្ធិក្នុងលោកទាំងអស់ប្រទានពរជ័យដល់សប្បុរសជនទាំងអស់ឱ្យជួបតែសេចក្តីចំរុងចំរើនកុំបីឃ្លៀងឃ្លាតឡើយ ៕
ចែករំលែកព័តមាននេះ