រាជធានីភ្នំពេញ ៖ លោក អេ ភូថង អតីតកំពូលអ្នកប្រដាល់គុនខ្មែរដ៏ល្បីល្បាញកាលពី២០ឆ្នាំមុន បច្ចុប្បន្នជាគ្រូបង្វឹកប្រចាំក្លិប«ស.សុម៉ាលីគុនខ្មែរ» បាននិងកំពុងលើកទឹកចិត្តក៏ដូចជាជួយជ្រោមជ្រែងឱ្យកូនប្រុសស្រីទាំង៤នាក់របស់លោកហ្វឹកហាត់ប្រដាល់គុនខ្មែរដើម្បីរក្សាកេរដំណែលក្បាច់គុនបុរាណខ្មែររហូតក្លាយជាគ្រួសារអ្នកប្រដាល់ដែលកំពុងកាក់កបនឹងអាជីពឈឺខ្លួនមួយនេះថែមទៀតផង ។
បច្ចុប្បន្នកូនប្រុស-ស្រីទាំង៤នាក់របស់លោកត្រូវបានណែនាំតម្រង់ទិសឱ្យចូលហ្វឹកហាត់ប្រដាល់ជាមួយលោកទាំងអស់ ហើយក្នុងចំណោមកូន៤នាក់នេះ គឺកីឡាការិនី អេ យ៉ានុត ភូថង ដែលជាកូនស្រីច្បង កីឡាករ អេវិរៈខាំឈីតភូថង ហៅមុឺន មេឃា(កូនប្រុសទី២) កីឡាករ អេ អាំម៉ារីនភូថង(កូនប្រុសទី៣) និង កីឡាករ អេឡិច ភូថង(កូនពៅ) កំពុងសាងភាពល្បីល្បាញបណ្ដើរៗ បន្ទាប់ពីពួកគេទទួលបានឱកាសឡើងប្រកួតលើសង្វៀនប្រដាល់តាមប៉ុស្តិ៍ទូរទស្សន៍ជាញឹកញាប់។
លោក អេ ភូថង ពន្យល់ថា មូលហេតុដែលលោកជំរុញឱ្យកូនៗ ទាំង៤នាក់ចូលប្រឡូកក្នុងវិស័យប្រដាល់គុនខ្មែរបន្តវេនពីលោកបែបនេះ ដោយសារលោកចង់ឱ្យកូនៗរបស់លោកទាំងអស់ចេះក្បាច់ប្រដាល់គុនខ្មែរ ដើម្បីរក្សាកេរដំណែលក្បាច់គុនក្នុងត្រកូល អេ ទៅដល់កូនចៅពួកគេជំនាន់ក្រោយៗទៀត ក៏ដូចជារួមចំណែកលើកស្ទួយវិស័យកីឡាប្រដាល់គុនខ្មែររបស់ជាតិឱ្យកាន់តែរីកចម្រើនផងដែរ។
លោកថា គ្រួសាររបស់លោកមានមហិច្ឆតាធំធេងណាស់គឺរស់នៅដើម្បីតែគុនខ្មែរមួយគត់ ហើយបើស្លាប់ទៅវិញត្រូវបន្សល់ទុកនូវកេរ្តិ៍ឈ្មោះដ៏ល្អផូរផង់ ជាគ្រួសារអ្នកថែរក្សាគុនខ្មែរសម្រាប់តកូនចៅជំនាន់ក្រោយ ។ លោកមិនខ្វល់ថា ជីវិតនឹងផុតរលត់នៅពេលណានោះទេ តែឥឡូវនេះនៅមានជីវិតត្រូវតែខិតខំមើលសិស្ស ឱ្យហ្វឹកហាត់បានដិតដល់ និងការប្រកួតឱ្យបានល្អ គឺលោកសប្បាយចិត្តហើយ ។ លោកនិយាយបែបនេះដោយសារតែលោកទើបតែមានអាយុ៥១ឆ្នាំ ប៉ុន្តែខ្លួនប្រាណរបស់លោកបានរួមរឹតទៅដោយជំងឺជាច្រើនមុខ។
លោក អេ ភូថង បានរំលឹកថា ពេលកូនៗនៅតូច លោកនិងភរិយាជួបការលំបាកយ៉ាងខ្លាំងដោយពុំមានប្រាក់សម្រាប់ចាយវាយគ្រប់គ្រាន់នោះទេ ពេលខ្លះហូបបាយជាមួយអំបិលក៏មានដែរ ។ ប៉ុន្តែក្រុមគ្រួសាររបស់លោកនៅតែតស៊ូក្រាញននាលជាមួយកីឡាប្រដាល់គុនខ្មែរ និងតែងប្រាប់កូនៗឱ្យខំតស៊ូឡើងទៀតផង។
រហូតមកទល់នឹងពេលនេះ ជីវភាពគ្រួសារលោកមានការផ្លាស់ប្ដូរជាវិជ្ជមានដែលទាំងអស់នេះសុទ្ធតែកើតចេញពីការតស៊ូបម្រើក្នុងវិស័យកីឡាប្រដាល់គុនខ្មែរទាំងអស់ ។ ជាក់ស្ដែងបច្ចុប្បន្នក្នុងមួយខែកូនប្រុសស្រី៣នាក់របស់លោក ម្នាក់ៗអាចរកប្រាក់បានរហូតរាប់ពាន់ដុល្លារពីការឡើងប្រកួត ដែលនេះមិនទាន់គិតពីប្រាក់ខែដែលពួកគេទទួលបានពីការងាររដ្ឋក្នុងក្របខណ្ឌនៃកងយោធពលខេមរៈភូមិន្ទផងទេ ។ មិនតែប៉ុណ្ណោះលោកនៅមានសិស្សសំណព្វចិត្តម្នាក់ទៀតដែលជាប្រភពចំណូលផងដែរគឺកីឡាករធឿន ធារ៉ាដែលកំពុងតែល្បីខ្លាំង និងមានតម្លៃខ្លួនខ្ពស់ជាងគេក្នុងវិស័យប្រដាល់គុនខ្មែរបច្ចុប្បន្ន ។
លោកស្រីសាំង សុម៉ាលី ភរិយាលោកអេ ភូថង បានលូកមាត់ថា សព្វថ្ងៃគ្រួសារលោកស្រីអាចរស់នៅដោយមានសេចក្ដីសុខដោយលោកស្រីនិងស្វាមីអាចសន្សំលុយទិញដីបាន២-៣កន្លែងដែរ ។ ប៉ុន្តែលោកស្រីនិងស្វាមីព្រមទាំងកូនៗនៅតែតស៊ូក្រាញននាលជាមួយគុនខ្មែរ ជាពិសេសកូនៗរបស់លោកស្រីទាំង៤នាក់គឺក្លាយជាអ្នកបន្តវេនគុនខ្មែរទៅថ្ងៃអនាគតព្រោះឆន្ទៈរបស់ស្វាមីលោកស្រីគឺលោកអេ ភូថង ចង់ឱ្យគុនខ្មែរល្បី ឱ្យគេទទួលស្គាល់ពាសពេញពិភពលោក ។ សូម្បីលោកឧត្តមសេនីយ៍ទោខូវ ឆាយ ប្រធានសហព័ន្ធកីឡាប្រដាល់គុនខ្មែរក៏ទទួលស្គាល់គ្រួសារលោកស្រី ថាមានគុណសម្បត្តិច្រើនជាមួយកីឡាប្រដាល់គុនខ្មែរដែរ ។
សព្វថ្ងៃលោកស្រីនិងស្វាមីបានបើកក្លិបប្រដាល់មួយកន្លែងនៅជន្លង់ម្លូ ស្ថិតក្នុងសង្កាត់ភ្លើង
ឆេះរទេះ ខណ្ឌកំបូល ឈ្មោះក្លិប«ស.សុម៉ាលីគុនខ្មែរ» ដែលមានសិស្សកំពុងហ្វឹកហាត់ប្រមាណ៣០នាក់ជារៀងរាល់ថ្ងៃ។
សូមរម្លឹកថា លោក អេ ភូថង ជាអតីតអ្នកប្រដាល់គុនខ្មែរល្បីឈ្មោះខ្លាំងជាងគេនៅកម្ពុជា កាលពី២០ឆ្នាំមុន ហើយរាល់ពេលលោកឡើងសង្វៀនប្រកួតអន្តរជាតិម្តងៗគឺទទួលបាន ការគាំទ្រយ៉ាងខ្លាំង។ បច្ចុប្បន្ន អតីតកំពូលអ្នកប្រដាល់គុនខ្មែររូបនេះបានចូលនិវត្តន៍លាលែង ពីការឡើងសង្វៀនប្រកួតហើយ ដោយលោកងាកមកចាប់អាជីពជាគ្រូបង្វឹក និងចៅក្រមអាជ្ញា កណ្តាលវិញម្តង ។ ចំណែកលោកស្រីសាំង សុម៉ាលី បច្ចុប្បន្នជាមន្ត្រីនៅក្នុងសហព័ន្ធកីឡាប្រដាល់គុនខ្មែរ តែដោយសារបញ្ហាសុខភាពលោកស្រីបានផ្អាកការងារជាអាជ្ញាកណ្ដាលកាត់សេចក្ដីលើសង្វៀនមួយរយៈ ៕
ចែករំលែកព័តមាននេះ