ទោះបីជាគុណភាពខ្យល់នៅកម្ពុជាមិនទាន់ឈានដល់កម្រិតធ្ងន់ធ្ងរក៏ដោយក៏ប្រទេសជិតខាងដូចជា ថៃនិងវៀតណាម កំពុងជួបប្រទះនូវផលវិបាកយ៉ាងធ្ងន់ធ្ងររួចទៅហើយ ដោយសារតែការបំពុលខ្យល់ដ៏ខ្លាំង ។ ដូច្នេះ វា គឺជាមេរៀនមួយដែលកម្ពុជាគួរតែសិក្សា ហើយត្រូវតែយកចិត្តទុកដាក់លើបញ្ហានានាដែលនឹងអាចគំរា.មកំហែ.ងដល់គុណភាពខ្យល់នេះ នៅក្នុងប្រទេសនៅពេលអនាគត…
ទោះបីជាគុណភាពខ្យល់នៅកម្ពុជាមិនទាន់ឈានដល់កម្រិតធ្ងន់ធ្ងរក៏ដោយក៏ប្រទេសជិតខាងដូចជា ថៃនិងវៀតណាម កំពុងជួបប្រទះនូវផលវិបាកយ៉ាងធ្ងន់ធ្ងររួចទៅហើយ ដោយសារតែការបំពុលខ្យល់ដ៏ខ្លាំង ។ ដូច្នេះ វា គឺជាមេរៀនមួយដែលកម្ពុជាគួរតែសិក្សា ហើយត្រូវតែយកចិត្តទុកដាក់លើបញ្ហានានាដែលនឹងអាចគំរា.មកំហែ.ងដល់គុណភាពខ្យល់នេះ នៅក្នុងប្រទេសនៅពេលអនាគត ។
មកដល់ពេលនេះកំណើននៃនគរូបនីយកម្មឆាប់រហ័ស ឧស្សាហូបនីយកម្ម និងការកើនឡើងនៃការប្រើប្រាស់យានជំនិះ សុទ្ធតែជាមូលហេតុដែលនឹងអាចធ្វើឱ្យកម្ពុជាប្រឈមនឹងហានិភ័យក្នុងការចូលរួមជាមួយប្រទេសទាំងនេះ ក្នុងការប្រឈមមុខនឹងបញ្ហាបំពុលបរិយាកាសធ្ងន់ធ្ងរ ប្រសិនបើវិធានការបង្ការមិនត្រូវបានចាត់វិធានការនៅពេលនេះឲ្យរួចរាល់នោះទេ ។ ដើម្បីគេចចេញពីបញ្ហាបំពុលជាថ្មីនៅទីក្រុងបាងកក និងឈៀងម៉ៃ ដូចកាលពីឆ្នាំទៅអ្នកជំនាញការថៃនៅពេលនេះបានចេញការព្រមានទុកជាមុនរួចហើយពាក់ព័ន្ធនឹងការរួមចំណែក ដើម្បីកាត់បន្ថយការបំពុលជាពិសេសនៅក្នុងអំឡុងពេលធ្លាក់ខ្យល់ក្រោយអស់ទឹកភ្លៀង ។
កុំមើលស្រាលពីគ្រោះថ្នាក់នៃការបំពុលខ្យល់ ហើយសង្ឃឹមថា អ្នកដែលពាក់ព័ន្ធនៅក្នុងសង្គមយើងនឹងយកចិត្តទុកដាក់កុំអោយស្ថានភាពនៃការបំពុលខ្យល់វាធ្លាក់ដល់កម្រិតគ្រោះថ្នាក់ ។ ការបំពុលខ្យល់ត្រូវបានគេដឹងថា បណ្តាលឱ្យមានបញ្ហាសុខភាពជាច្រើន ដូចជា ប៉ះពាល់ដល់សុខភាពផ្លូវដង្ហើម និងសរសៃឈាមបេះដូង ហើយវាមានគ្រោះថ្នាក់ជាពិសេសសម្រាប់ក្រុមដែលងាយរងគ្រោះដូចជាកុមារ មនុស្សចាស់ និងអ្នកដែលមានស្ថានភាពសុខភាពផ្លូវដង្ហើមពីមុន ។ ជាឧទាហរណ៍ នៅក្នុងប្រទេសថៃការប្រឈមមុខនឹងកំណើនសមាសភាពភាគល្អិត(PM2.5)នៅក្នុងខ្យល់ចំនួន១៥ខេត្តក្រុងកាលពីពីឆ្នាំទៅបាននាំឱ្យពលរដ្ឋថៃជាង១,៣លាននាក់ចូលមន្ទីរពេទ្យ ហើយក៏មានសេចក្តីរាយការណ៍ពីករណីស្លា.ប់ជាច្រើនករណីផងដែរ ។ សម្រាប់ប្រទេសកម្ពុជាដែលមានធនធានថែទាំសុខភាពមានកម្រិតអាចប្រឈមនឹងសម្ពាធដ៏លើសលប់លើប្រព័ន្ធសុខាភិបាលរបស់ខ្លួន ប្រសិនបើគុណភាពខ្យល់ធ្លាក់ចុះដល់កម្រិតដែលព្រួយបារម្ភ ។
ក្រៅពីសុខភាពការបំពុលខ្យល់ក៏បំផ្លាញជីវចម្រុះ និងធនធានធម្មជាតិដ៏សម្បូរបែបរបស់ប្រទេសកម្ពុជា ។ សារធាតុពុលអាចបំផ្លាញព្រៃឈើ បំពុលទន្លេ និងប៉ះពាល់ដល់សត្វព្រៃដែលគំរា.មកំហែ.ងដល់វិស័យកសិកម្ម និងសន្តិសុខស្បៀងរបស់កម្ពុជា ។ ប្រទេសថៃ និងវៀតណាមកំពុងទទួលការបាត់បង់ដំណាំ និងការខូចគុណភាពដីរួចហើយដោយសារការបំពុល ។ នេះ ជាសញ្ញាព្រមានសម្រាប់សេដ្ឋកិច្ចដែលពឹងផ្អែកលើវិស័យកសិកម្មរបស់កម្ពុជា ។ លើសពីនេះ ការបំពុលបរិយាកាសអាចប៉ះពាល់ដល់វិស័យទេសចរណ៍ ដែលជាការរួមចំណែកសេដ្ឋកិច្ចដ៏សំខាន់ ។ គោលដៅដែលធ្លាប់អួតពីសម្រស់ធម្មជាតិអាចនឹងឃើញការធ្លាក់ចុះនៃអ្នកទេសចរ ប្រសិនបើគុណភាពខ្យល់កាន់តែអាក្រក់ ។
នៅពេលនេះកម្ពុជាមានឱកាសរៀនសូត្រពីការតស៊ូរបស់ប្រទេសជិតខាង ។ វៀតណាម និងថៃកំពុងវិនិយោគយ៉ាងខ្លាំងនៅក្នុងវិធានការត្រួតពិនិត្យការបំពុល រួមទាំងស្តង់ដារការបំភាយឧស្ម័នដ៏តឹងរ៉ឹង គម្រោងថាមពលកកើតឡើងវិញ និងការត្រួតពិនិត្យគុណភាពខ្យល់ ។ កម្ពុជាគួរតែចាត់វិធានការយ៉ាងសកម្មនៅពេលនេះ រួមទាំងការទទួលយកថាមពលស្អាត ការគ្រប់គ្រងការបំភាយឧស្ម័នឧស្សាហកម្ម និងការលើកកម្ពស់ការយល់ដឹងជាសាធារណៈលើការកាត់បន្ថយការបំពុលបរិយាកាស ។ ស្តង់ដានៃនគរូបនីយកម្មក៏គួរតែយកចិត្តទុកដាក់ផងដែរ ពីព្រោះនៅពេលនេះ គុណភាព និងរបៀបនៃការធ្វើសំណង់នៅកម្ពុជាហាក់មានហានិភ័យខ្ពស់ដល់ការបំពុលខ្យល់ ។
នៅការដ្ឋាននីមួយៗមកដល់ពេលនេះ អ្នកសាងសង់ហាក់មិនសូវរវល់នឹងការហុយធូលី ឬកម្ទេចកម្ទីពីការដ្ឋានទៅក្នុងស្រទាបបរិយាកាសបានល្អនៅឡើយ ។ ក្រៅពីនោះការគ្រប់គ្រងកម្រិតបំភាយនៃឧស្ម័នចេញពីយានយន្តចាស់ៗក៏នៅមិនទាន់មានដែរ ហើយនៅរាជធានីគេនៅឃើញមានយានយន្តដឹកជញ្ជូនជាច្រើនដែលកម្រិតនៃការបំភាយឧស្ម័ន គឺមានស្ថានភាពគួរឲ្យបារម្ភ ហើយស្តង់ដាដឹកជញ្ជូនក៏នៅមានកម្រិត ។ យានយន្តដឹកដី ដឹកថ្ម ដឹកខ្សាច់បម្រើការដ្ឋាន គឺពេលខ្លះគ្រប ពេលខ្លះអត់ហើយការគ្របនោះទៀតសោត គឺឲ្យឃើញ តែគ្របប៉ុណ្ណោះ ។
ដើម្បីកែខៃស្ថានការណ៍អាក្រក់នៅពេលខាងមុខ ជំហានសាមញ្ញដែលយើងគួរធ្វើហើយអាចធ្វើបាន គួរតែយកចិត្តទុកដាក់ដូចជា ការប្រើប្រាស់មធ្យោបាយធ្វើដំណើរសាធារណៈ កាត់បន្ថយការប្រើប្រាស់ថាមពល និងការដាំដើមឈើ និងឥរិយាបទនានាដែលរួមចំណែកធ្វើឱ្យខ្យល់អាកាសកាន់តែស្អាត ។ យុទ្ធនាការលើកកម្ពស់ការយល់ដឹងពីសហគមន៍ និងការអប់រំស្តីពីការបង្ការការបំពុលអាចជួយប្រជាជនកម្ពុជាការពារខ្យល់ដែលយើងទាំងអស់គ្នាចែករំលែក។ លើសពីនេះ អ្នកបង្កើតគោលនយោបាយត្រូវផ្តល់អាទិភាពដល់ការអនុវត្តច្បាប់បរិស្ថាន និងស្វែងយល់ពីការអនុវត្តផែនការទីក្រុងប្រកបដោយនិរន្តរភាព។
កម្ពុជានៅមានពេលវេលាដើម្បីធ្វើសកម្មភាព មុនពេលវិបត្តិបំពុលបរិយាកាសក្លាយជាការគំរាមកំហែង ។ ប៉ុន្តែត្រូវតែធ្វើសកម្មភាពជាបន្ទាន់ ។ តាមរយៈការរៀនសូត្រពីអ្នកដទៃ និងចាត់វិធានការបង្ការនៅថ្ងៃនេះ យើងអាចការពារសុខភាព បរិស្ថាន និងសេដ្ឋកិច្ចសម្រាប់មនុស្សជំនាន់ក្រោយ ។ យើងទាំងអស់គ្នាអាចការពារផ្ទៃមេឃរបស់ប្រទេសកម្ពុជា និងធានាបាននូវសុខភាពល្អនៅថ្ងៃអនាគត ៕
ចែករំលែកព័តមាននេះ