រាជធានីភ្នំពេញ ៖ ជនសង្ស័យម្នាក់បន្ទាប់ពីធ្វើសកម្មភាពចូលលួចគាស់បន្ទប់ជួលត្រូវបានម្ចាស់ផ្ទះឃើញទាន់នាំគ្នាដេញ​ប៉ផាប់ចាប់ពភីង ធ្វើ​ឱ្យ​ជនសង្ស័យរត់ចូលពួនសំងំនៅផ្ទះចាស់ទុកចោលមួយកន្លែង ហើយ​ក៏​ត្រូវបាននគរបាលប៉ុស្តិ៍ចាប់​ឃាត់ខ្លួន​បានភ្លាមៗ បង្កឲ្យមានការភ្ញាក់ផ្អើលកាលពីវេលាម៉ោង៤និង៣០នាទីទៀបភ្លឺថ្ងៃទី៣១ ខែតុលា ឆ្នាំ២០២៤ នៅចំណុច​ផ្ទះជួលមួយកន្លែង ស្ថិត​ក្នុង​ភូមិត្រពាំងល្វា សង្កាត់កាកាបទី១ ខណ្ឌពោធិ៍សែនជ័យ រាជធានីភ្នំពេញ ។

តាមប្រភពពត៌មានពី​ម្ចាស់ផ្ទះ​បានអោយដឹងថា ផ្ទះរបស់​គាត់តែងតែត្រូវ​ជនសង្ស័យចូលគាស់ជាច្រើនដងមកហើយ លុះនៅយប់ថ្ងៃកើតហេតុ ​គាត់​រង់ចាំមើលជនសង្ស័យធ្វើសកម្មភាព នៅពេលនោះស្រាប់តែឃើញជនសង្ស័យ២នាក់ធ្វើសកម្មភាពឆ្កឹះសោបន្ទប់ជួលរបស់គាត់ ។ បន្ទាប់មក​គាត់​ក៏បានដេញតាម ដោយ​មានបងប្អូនប្រជាពលរដ្ឋនាំគ្នាដេញតាមជាមួយផងដែរ។ ចំណែកជនសង្ស័យ២នាក់បាននាំគ្នារត់គេចពីម្ចាស់ផ្ទះចូលមកសំងំ​ក្នុងផ្ទះចាស់ទុកចោលក្នុង​ដីឡូត៍មួយកន្លែង ។ បន្ទាប់មកម្ចាស់ផ្ទះឃើញជនសង្ស័យកំពុងពួនសំងំនៅក្នុងផ្ទះចាស់ ហើយ​ធ្វើជាដេកលក់ ចំណែកជនរងគ្រោះជាម្ចាស់បន្ទប់ជួល បានតេទូរស័ព្ទប្តឹងនគរបាលប៉ុស្តិ៍ដើម្បីជួយអន្តរាគមន៍ភ្លាមៗនិងឃាត់ជនសង្ស័យបានម្នាក់យកមកសួរនាំភ្លាមៗតែម្តង​ ។

ជនសង្ស័យខាងលើបានសារភាពថា ​ខ្លួន​ទើបតែចេញពីគុកបាន៨ថ្ងៃ តែករណីចូលលួចឆ្កឹះសោបន្ទប់ជួលខាងលើ ​ខ្លួន​អត់បានប្រព្រឹត្តិទេ ​ខ្លួន​ឃើញគេរត់ ​ខ្លួនក៏​រត់តាមគេដែរ ។ អ្នកផ្សេង ដែល​ខ្លួន​ឃើញរត់នោះ​ គឺគេចខ្លួនបាត់អស់ហើយ ។

ក្រោយពេលកើតហេតុ បន្ទាប់ពីជនរងគ្រោះបានចោទប្រកាន់ថា គឺជាជនសង្ស័យខាងលើបានធ្វើសកម្មភាពឆ្កឹះសោបន្ទប់ជួលគាត់ពិតប្រាកដ ហើយបានដាក់ពាក្យបណ្ដឹងសុំឲ្យសមត្ថកិច្ចកសាងសំណុំរឿងបញ្ជូនជនសង្ស័យខាងលើទៅផ្នែកជំនាញព្រហ្មទណ្ឌដើម្បីចាត់ការតាមនី​តិវិធី ៕