រាជធានីភ្នំពេញ ៖ វគ្គសិក្សាសាមគ្គីអូឡាំពិកស្ដីពីការអភិវឌ្ឍប្រព័ន្ធកីឡាជាតិសម្រាប់កីឡាលើកទម្ងន់បានបិទបញ្ចប់កាលពីល្ងាចថ្ងៃទី២៧ ខែតុលា នៅទីស្នាក់ការគណៈកម្មាធិការជាតិអូឡាំពិកកម្ពុជា ដោយវគ្គនេះមានសិក្ខាកាមចូលរួមចំនួន២៥នាក់។ លោក ងិន សុបញ្ញា តំណាងឯកឧត្តមវ៉ាត់…
រាជធានីភ្នំពេញ ៖ វគ្គសិក្សាសាមគ្គីអូឡាំពិកស្ដីពីការអភិវឌ្ឍប្រព័ន្ធកីឡាជាតិសម្រាប់កីឡាលើកទម្ងន់បានបិទបញ្ចប់កាលពីល្ងាចថ្ងៃទី២៧ ខែតុលា នៅទីស្នាក់ការគណៈកម្មាធិការជាតិអូឡាំពិកកម្ពុជា ដោយវគ្គនេះមានសិក្ខាកាមចូលរួមចំនួន២៥នាក់។
លោក ងិន សុបញ្ញា តំណាងឯកឧត្តមវ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា និងជារដ្ឋលេខាធិការក្រសួងអប់រំយុវជន និងកីឡា បានឱ្យដឹងថាវគ្គបណ្ដុះបណ្ដាលកីឡាលើកទម្ងន់នេះ គឺជាការជួយឧបត្ថម្ភគាំទ្ររបស់គណៈកម្មាធិជាតិអូឡាំពិកអន្តរជាតិ ។
វគ្គបណ្ដុះបណ្ដានេះធ្វើឡើងក្នុងគោលបំណងជួយបង្កើនធនធានគ្រូបង្វឹក និងមន្ត្រីអាជ្ញាកណ្ដាល ចៅក្រម សហព័ន្ធកីឡាលើកទម្ងន់កម្ពុជា ឱ្យមានចំណេះជំនាញអំពីច្បាប់អន្តរជាតិសំដៅបំពេញការងារឱ្យកាន់តែមានប្រសិទ្ធភាពខ្ពស់ ។
លោកបន្តថា កីឡាលើកទម្ងន់ជាប្រភេទកីឡាអូឡាំពិក ដូច្នេះលោកបានសំណូមពរទៅដល់សិក្ខាកាមទាំងអស់ត្រូវ យកចំណេះជំនាញដែលទទួលបានទៅអនុវត្តបន្តប្រកបដោយប្រសិទ្ធភាព ជាពិសេសកីឡាករក្មេងៗនៅតាមបណ្ដាក្លិបនីមួយៗ ព្រោះយើងដឹងហើយថា ស៊ីហ្គេមឆ្នាំ២០២៥ ដែលប្រទេសថៃធ្វើជាម្ចាស់ផ្ទះ កីឡាលើកទម្ងន់ក៏ជាប្រភេទកីឡាមានសក្ដានុពលមួយដែរ។ ម្យ៉ាងវិញទៀតឆ្នាំ២០២៩ កម្ពុជាត្រូវទទួលធ្វើជាម្ចាស់ផ្ទះកីឡាយុវជនអាស៊ី ដូច្នេះយើងត្រូវតែត្រៀមខ្លួនទុកជាមុនឱ្យបានល្អ។
លោក ងិន សុបញ្ញា បន្ថែមថា កីឡាលើកទម្ងន់វាជាប្រភេទកីឡាអូឡាំពិក ដែលពិបាកក្នុងការដណ្ដើមយកមេដាយបំផុត ប៉ុន្តែបើសិនជាយើងបានត្រៀមខ្លួនពីឥឡូវនេះទៅ ទម្រាំដល់ពេលនោះប្រហែលជាយើងអាចមានសង្ឃឹមច្រើនក្នុងការដណ្ដើមមេដាយជូនជាតិ ព្រោះវានៅសល់រយៈពេលវែងទៀត ។
យើងត្រូវការធនធានមនុស្សច្រើនដើម្បីរៀបចំនិងត្រៀមលក្ខណៈឱ្យបានគ្រប់ជ្រុងជ្រោយទុកជាមុន ។ លោកបានសម្ដែងនូវការកោតសរសើរដល់សិក្ខាកាមទាំង២៥នាក់ក្នុងនោះមានស្ត្រីចំនួន១០នាក់ផងដែរ ដែលមកពីគ្រប់រាជធានីខេត្តក្នុងការលះបង់ពេលវេលាខិតខំរៀនសូត្រអស់រយៈពេលជាងមួយសប្ដាហ៍មកនេះ ដោយពុំមានការធ្វេសប្រហែសឡើយ៕
ចែករំលែកព័តមាននេះ