ទីក្រុងសេអ៊ូល៖ អ្នកតំណាងរាស្ត្រកូរ៉េខាងត្បូងជាច្រើននាក់សុទ្ធតែអះអាងដូចៗគ្នាថាកូរ៉េខាងជើងបានបញ្ជូនកងទ័ព៣ពាន់នាក់ទៅរុស្ស៊ីរួចហើយដើម្បីជួយរុស្ស៊ីនៅក្នុងការធ្វើសង្គ្រាមនៅអ៊ុយក្រែន។ ការថ្លែងដូច្នេះបន្ទាប់ពីពួកគេស្ដាប់ការផ្ដល់សក្ខីកម្មពីសំណាក់ទីភ្នាក់ងារស៊ើបការណ៍សម្ងាត់របស់ជាតិ។ បើដូច្នេះមែនមានន័យថាចំនួនពិតប្រាកដដែលរបបក្រុងព្យុងយ៉ាងបញ្ជូនទ័ពទៅរុស្ស៊ីនោះមានច្រើនលើសពីរបាយការណ៍កាលពីលើកមុនរហូតដល់ទៅពីរដងឯណោះ។
របបក្រុងព្យុងយ៉ាងសន្យាជាមួយរុស្ស៊ីថាខ្លួននឹងបញ្ជូនកងទ័ពឱ្យបានមួយម៉ឺននាក់ដើម្បីជួយជ្រោមជ្រែងរុស្ស៊ីនៅក្នុងសង្គ្រាមដ៏បង្ហូរឈាមនេះ។ គេគិតថាយ៉ាងយូរត្រឹមដើមខែធ្នូខាងមុខនេះ កងទ័ពកូរ៉េខាងជើងដែលបញ្ជូនទៅថ្មីៗនេះនឹងចូលប្រឡូកនៅក្នុងសង្គ្រាម។ ខាងលើនេះជាអ្វីដែលក្រុមអ្នកតំណាងរាស្ត្រកូរ៉េខាងត្បូងជម្រាបជូនអ្នកសារព័ត៌មាន។ ប្រភពខ្លះថាពួកគេអាចនឹងចុះទៅសមរភូមិត្រឹមដើមខែវិច្ឆិកាខាងមុខនេះ។
រដ្ឋាភិបាលទីក្រុងម៉ូស្គូ និងព្យុងយ៉ាងមិនដែលបានច្រានចោលព័ត៌មានដែលថាកូរ៉េខាងជើងបញ្ជូនកងទ័ពទៅរុស្ស៊ីទេ។ អ៊ុយក្រែនក៏បានអះអាងដោយយោងតាមប្រភពចារកម្មរបស់ខ្លួនថាកូរ៉េខាងជើងបានបញ្ជូនកងទ័ពទៅរុស្ស៊ីពិតមែន។ មុនដំបូង ពួកគេត្រូវបានដឹកជញ្ជូនតាមនាវាចម្បាំងរបស់រុស្ស៊ីដែលចូលចតនៅកំពង់ផែកូរ៉េខាងជើង។ ពួកគេទៅទីក្រុងវ៉្លាឌីវ៉ូស្តុកដើម្បីហ្វឹកហាត់រយៈពេលខ្លី។ បន្ទាប់មកនឹងបញ្ជូនទៅសមរភូមិក្ដៅនៅភាគខាងកើតអ៊ុយក្រែន។
អ្នកខ្លះមើលស្រាល ឬនិយាយបែបសើចចម្អកថារុស្ស៊ីធ្លាក់ខ្លួនដល់ថ្នាក់រត់ទៅពឹងទាហានកូរ៉េខាងជើងមកជួយច្បាំង។ អ្នកខ្លះថាកូរ៉េខាងជើងជាទាហានមិនធ្លាប់មានពិសោធច្បាំង មិនគួរណាបញ្ជូនទៅប្រឡូកនៅក្នុងសង្គ្រាមអឺរ៉ុបទេ។ ប៉ុន្តែកុំយល់ច្រឡំ។ កងទ័ពកូរ៉េខាងជើងក៏មិនអន់ប៉ុន្មានដែរ។ ទ័ពដែលបញ្ជូនទៅរុស្ស៊ីនេះសុទ្ធតែជាកងកម្លាំងពិសេសដែលឆ្លងកាត់ការហ្វឹកហាត់កម្រិតកំពូល។ បើមិនសាកមិនដឹង។ ម៉្យាងទៀត របបក្រុងព្យុងយ៉ាងក៏មិនអាចធ្វើឱ្យខ្លួនឯងបាក់មុខបាក់មាត់នោះដែរ។
ប្រតិកម្មចំពោះការបញ្ជូនទ័ពកូរ៉េខាងជើងនេះ ប្រមុខដឹកនាំអ៊ុយក្រែន លោកហ្សេឡិនស្គី ថ្លែងថាការចងសម្ព័ន្ធភាពយោធារវាងម៉ូស្គូ និងព្យុងយ៉ាងគួរណាស់ទទួលរងការបញ្ចេញប្រតិកម្មដ៏ខ្លាំងក្លា។ លោកអំពាវនាវឱ្យក្រុមសម្ព័ន្ធមិត្តចាត់វិធានការឆ្លើយតប។ អ្នកការទូតជាន់ខ្ពស់អាមេរិកម្នាក់ថ្លែងថារដ្ឋាភិបាលរបស់ខ្លួនកំពុងពិគ្រោះគ្នាជាមួយក្រុមសម្ព័ន្ធមិត្តអំពីបញ្ហានេះ។
បើមានភស្តុតាងគ្រប់គ្រាន់បញ្ជាក់ថាទីក្រុងព្យុងយ៉ាងពិតជាបញ្ជូនទ័ពទៅអ៊ុយក្រែនមែន ពួកគេនឹងចាត់វិធានការភ្លាម។ អាមេរិកចាត់ទុកថាស្ថានការណ៍នេះពោរពេញដោយគ្រោះថ្នាក់ និងគួរឱ្យព្រួយបារម្ភយ៉ាងខ្លាំង។ ប្រភពខ្លះយល់ថាកូរ៉េខាងជើងមិនមែនបញ្ជូនទ័ពទៅជួយរុស្ស៊ីទទេៗដោយឥតឥតប្រយោជន៍នោះឡើយ។ រុស្ស៊ីប្រាកដជាផ្ដល់នូវការតបស្នងអ្វីមួយជាមិនខាន។ ពួកគេអាចនឹងផ្ដល់ជាហិរញ្ញវត្ថុ ជាបច្ចេកវិទ្យាផលិតអាវុធ ឬអាចផ្ដល់បច្ចេកវិទ្យានុយក្លេអ៊ែរផងក៏អាចថាបាន៕
ចែករំលែកព័តមាននេះ