សហរដ្ឋអាមេរិក ៖ កីឡាករ Cristiano Ronaldo ក្លាយជាកីឡាករបាល់ទាត់ពិភពលោករកបានប្រាក់ចំណូលច្រើនជាងគេបំផុតប្រចាំឆ្នាំ ២០២៤ ពីបញ្ជីទស្សនាវដ្តីពាណិជ្ជកម្មសហរដ្ឋអាមេរិក Forbes ដោយចំណូលកីឡាករឆ្នើមព័រទុយហ្គាល់រូបនេះ ច្រើនជាងចំណូលកីឡាករ Lionel Messi និង Neymar បូកបញ្ចូលគ្នាទៅទៀត។

របាយការណ៍ប្រចាំឆ្នាំ ២០២៤ របស់ទស្សនាវដ្ដី Forbes ចេញផ្សាយកាលពីថ្ងៃទី១៨ ខែតុលា ឆ្នាំ២០២៤ បានបង្ហាញឱ្យឃើញថា ខ្សែប្រយុទ្ធឆ្នើម Cristiano Ronaldo រកបាន ២៨៥លានដុល្លារ ដោយក្នុងនោះ ២២០លានដុល្លារបានមកពីកិច្ចសន្យាលើទីលានជាមួយក្លិប Al-Nassr នៅលីគកំពូលរបស់ប្រទេសអារ៉ាប៊ីសាអូឌីត ខណៈដែល ៦៥លានដុល្លារផ្សេងទៀតបានមកពីភាពជាដៃគូឧបត្ថម្ភក្រៅទីលានប្រកួត។

ប្រធានក្រុមជម្រើសជាតិព័រទុយហ្គាល់វ័យ៣៩ឆ្នាំរូបនេះ មានកិច្ចសន្យាពេញមួយជីវិតតម្លៃ ២០លានដុល្លារក្នុងមួយឆ្នាំជាមួយនឹងក្រុមហ៊ុនផលិតសម្ភារៈកីឡា Nike ដែលបានសហការគ្នាអស់រយៈពេល២ទសវត្សរ៍ចុងក្រោយនេះ ហើយក្រៅពីនោះក៏រួមមានកិច្ចព្រមព្រៀងឧបត្ថម្ភជាមួយនឹងក្រុមហ៊ុន TAG Heuer, Herbalife, Binance, Armani និងក្រុមហ៊ុនជាច្រើនផ្សេងទៀតផងដែរ។

នេះគឺជាកំណត់ត្រាផ្ទាល់ខ្លួនថ្មីមួយសម្រាប់ Ronaldo ដែលកើនលើសកំណត់ត្រាចាស់ ដែលរកបាន ២៦០លានដុល្លារ និងបានធ្វើឱ្យអតីតខ្សែប្រយុទ្ធឆ្នើមក្រុម Sporting CP, Manchester United, Real Madrid និង Juventus រូបនេះ ឈរនៅលើកំពូលតារាងកីឡាករបាល់ទាត់រកចំណូលបានច្រើនបំផុតរបស់ទស្សនាវដ្ដី Forbes ជាលើកទី៦។ ហើយចាប់តាំងពីទស្សនាវដ្តី Forbes ចាប់ផ្តើមតាមដានប្រាក់ចំណូលអត្តពលិកនៅក្នុងឆ្នាំ១៩៩០មក រហូតមកទល់ពេលនេះ គឺមានតែអតីតអ្នកប្រដាល់សកលឆ្នើមអាមេរិក Floyd Mayweather ប៉ុណ្ណោះ ដែលអាចរកប្រាក់ចំណូលបានច្រើនជាង ២៨៥លានដុល្លារក្នុងមួយឆ្នាំ អំឡុងពេលប្រកបអាជីព។

ដោយឡែក កីឡាករ Lionel Messi ខ្សែប្រយុទ្ធឆ្នើមក្រុមជម្រើសជាតិអាហ្សង់ទីន ដែលបច្ចុប្បន្នកំពុងប្រកបអាជីពជាមួយនឹងក្លិប Inter Miami នៅលីគកំពូលសហរដ្ឋអាមេរិក ឈរនៅចំណាត់ថ្នាក់លេខ ២ រកប្រាក់ចំណូលបានចំនួន ១៣៥លានដុល្លារសម្រាប់ឆ្នាំ ២០២៤ ដោយចំណូលលើទីលាន ៦០លានដុល្លារ និងក្រៅទីលាន ៧៥លានដុល្លារ។ កីឡាករ Neymar ខ្សែប្រយុទ្ធឆ្នើមក្រុមជម្រើសជាតិប្រេស៊ីល និងក្លិប Al Hilal សមាជិកលីគកំពូលអារ៉ាប៊ីសាអូឌីត ឈរនៅចំណាត់ថ្នាក់លេខ ៣ ដោយរកប្រាក់ចំណូលបាន ១១០លានដុល្លារសម្រាប់ឆ្នាំ ២០២៤ ដោយចំណូលលើទីលាន ៨០លានដុល្លារ និងក្រៅទីលាន ៣០លានដុល្លារ។

ក្រៅអំពីកីឡាករឆ្នើមទាំងចំណាត់ថ្នាក់កំពូលទាំង ១០ សម្រាប់បញ្ជីអត្តពលរកចំណូលបានច្រើនបំផុតប្រចាំឆ្នាំ ២០២៤ រួមមាន ៖ ខ្សែប្រយុទ្ធសញ្ជាតិបារាំង Karim Benzema ១០៤លានដុល្លារ ខ្សែប្រយុទ្ធសញ្ជាតិបារាំង Kylian Mbappé ៩០លានដុល្លារ ខ្សែប្រយុទ្ធសញ្ជាតិន័រវែស Erling Haaland ៦០លានដុល្លារ ខ្សែប្រយុទ្ធសញ្ជាតិប្រេស៊ីល Vinicius Jr. ៥៥លានដុល្លារ ខ្សែប្រយុទ្ធសញ្ជាតិអេហ្ស៊ីប Mohammed Salah ៥៣លានដុល្លារ ខ្សែប្រយុទ្ធសញ្ជាតិសេណេហ្គាល់ Sadio Mané ៥២លានដុល្លារ និងខ្សែបម្រើសញ្ជាតិបែលហ្ស៊ិក Kevin De Bruyne ៣៩លានដុល្លារ៕