រាជធានីភ្នំពេញ ៖ លោក ប្លង់ សុផល ព្រះរាជអាជ្ញារង និងជាអ្នកនាំពាក្យអយ្យការអមសាលាដំបូងរាជធានីភ្នំពេញ កាលពីព្រឹកថ្ងៃទី១៤ ខែតុលា ឆ្នាំ២០២៤…
រាជធានីភ្នំពេញ ៖ លោក ប្លង់ សុផល ព្រះរាជអាជ្ញារង និងជាអ្នកនាំពាក្យអយ្យការអមសាលាដំបូងរាជធានីភ្នំពេញ កាលពីព្រឹកថ្ងៃទី១៤ ខែតុលា ឆ្នាំ២០២៤ បានឲ្យដឹងថា ករណីសំណុំរឿងលោក ដួង តារា ត្រូវបានតំណាងអយ្យការបើកការស៊ើបសួររួច រាល់ហើយ ដោយបានចោទប្រកាន់ពីបទឆបោក.តាមបញ្ញត្តមាត្រា ៣៧៧ និងមាត្រា ៣៧៨ នៃក្រមព្រហ្មទណ្ឌ ។
ក្រោយបញ្ចប់ការសាកសួរ និងចោទប្រកាន់ជនសង្ស័យជាផ្លូវការហើយសំណុំរឿងត្រូវបានតំណាងអយ្យការចាត់បញ្ជូនទៅខាងចៅក្រមស៊ើបសួរ ដើម្បីឲ្យចៅក្រមឃុំខ្លួនជនសង្ស័យដាក់ពន្ធនាគារជាបណ្តោះអាសន្ន ឬមិនឃុំខ្លួនជាឆន្ទានុសិទ្ធិរបស់ចៅក្រម ។
បើយោងតាមបញ្ញត្តមាត្រា ៣៧៧ និងមាត្រា ៣៧៨ នៃក្រមព្រហ្មទណ្ឌ ដូចដែលតំណាងអយ្យការបានធ្វើការចោទប្រកាន់ជាផ្លូវការនោះ ច្បាប់តម្រូវឲ្យផ្តន្ទាទោសជនជាប់ចោទ ដាក់ពន្ធនាគារពី៦ ខែទៅ៣ ឆ្នាំ និងពិន័យជាប្រាក់ដល់ទៅ៦លាន រៀល ។
សូមរម្លឹកកាលពីរសៀលថ្ងៃទី១០ ខែ តុលា ឆ្នាំ ២០២៤ សមត្ថ កិច្ចនគរបាលការិយាល័យសន្តិសុខ នៃស្នងការដ្ឋាននគរបាលរាជធានីភ្នំពេញ បានអនុវត្តន៍ដីកាបញ្ជាឲ្យនាំខ្លួនលោក ដួង តារា ទៅកាន់ស្នងការដ្ឋាននគរបាលរាជធានីភ្នំពេញ ដើម្បីធ្វើការសាកសួរ ពាក់ព័ន្ធនឹងបណ្ដឹងរបស់ប្រជាពលរដ្ឋ ។
លោក ដួង តារា ដែលគេស្គាល់ថា ជារដ្ឋលេខាធិការទីស្តីគណៈរដ្ឋមន្ត្រី ទើបមកពីបំពេញទស្សនៈកិច្ចនៅចិន ហើយត្រូវបានសមត្ថកិច្ចបង្ហាញដឺការនាំខ្លួនទៅកាន់ស្នងការដ្ឋានរាជធានីភ្នំពេញ ។
ក្រោយពីឃាត់ខ្លួនសមត្តកិច្ចបានបញ្ជូនលោក ដួង តារា ប្រគល់ជូនស្ថាប័នអយ្យការធ្វើការសាកសួរតាមនីតិវិធី រហូតសម្រេចធ្វើការចោទ ប្រកាន់ជនសង្ស័យជាផ្លូវការ ។
សូមរម្លឹកទៀតថា តាមប្រភពច្បាស់ការណ៍ បានឱ្យដឹងថា កម្លាំងនគរបាលការិយាល័យសន្តិសុខ កាលពីរសៀលថ្ងៃទី១០ ខែតុលា ឆ្នាំ ២០២៤ បានអនុវត្តន៍ដីកាបញ្ជាឱ្យនាំខ្លួនលោក ដួង តារា ទៅ កាន់ស្នងការដ្ឋាននគរបាល រាជធានី ភ្នំពេញ ដើម្បីធ្វើការសាកសួរពាក់ព័ន្ធនឹងបណ្ដឹងរបស់ប្រជាពលរដ្ឋ ។
ទោះបីជាបែបណា មន្ត្រីសមត្ថកិច្ចមិនបានទម្លាយឱ្យដឹងថា ការនាំខ្លួនលោកទៅស្នងការដ្ឋាននគរបាលនោះ ទាក់ទិនរឿងក្ដីអ្វី ឱ្យប្រាកដនៅឡើយទេ គ្មានអ្វីក្រៅពីឱ្យច្បាប់ដុសក្អែលឡើយ ។
ជាការកត់សម្គាល់លោក ដួង តារា រយៈពេលកន្លងមកនេះ លោកមានឡានទំនើប និងចែកលុយដល់ ជនក្រីក្រតាមដងផ្លូវថតដាក់ហ្វេសប៊ុកបង្ហាញថា ជាមនុស្សល្អ តែពេលនេះរងការចោទប្រកាន់ថាជាអ្នកនៅពីក្រោយខ្នងនៃគម្រោងឆបោកលុយទ្រង់ទ្រាយធំពីប្រជាពលរដ្ឋរាប់សិបនាក់នៅខេត្ស្វាយរៀង ដូចគម្រោងឆបោកអតីតឧកញ៉ាឡេ ង ចាន់ណា នៅខេត្តសៀមរាបដែរ ។
គម្រោងឆបោកនេះដែរ ដៃគូរបស់លោកត្រូវបានចាប់ឃុំខ្លួន ហើយគឺប្រើវិធីលួងលោមឱ្យប្រជាពលរដ្ឋដាក់ប្រាក់វិនិយោគជាមួយក្រុមហ៊ុនភូមិខ្មែរគ្រុបតាមរូបភាពទិញអចលនទ្រព្យ ( ផ្ទះដីឡូតិ៍ ) ដើម្បីទទួលបានការប្រាក់ចំណេញខ្ពស់ តែនៅទីបំផុត អ្នកចាញ់បោកបានចោទប្រកាន់ថា ក្រុមហ៊ុនភូមិខ្មែរគ្រុបនោះ បានលក់ដីឡូត៍ និងផ្ទះល្វែងខ្យល់តែប៉ុណ្ណោះ ។
លោក ដួង តារា បច្ចុប្បន្នឡើងឋាន:ជារដ្ឋលេខាធិការនៃទីស្ដីការគណៈរដ្ឋមន្ត្រី លោកក្លាយជាមន្ត្រីធំម្នាក់ ក្នុងជួររាជរដ្ឋាភិបាល មិនមែនដោយសារអតីតភាព ឬប្រវត្តិតស៊ូនយោបាយជាមួយគណបក្សប្រជាជនកម្ពុជានោះទេ ប៉ុន្តែគឺដោយសារលោកជាអ្នកបង្កើត និងកាន់ទំព័រហ្វេសប៊ុ ក (Facebook)ផ្លូវការរបស់សម្ដេចតេជោ ហ៊ុន សែន នាពេលកន្លងមក ។
ការនាំខ្លួនលោកនេះ ទោះបីមិនទាន់អាចដឹងលម្អិតថា ទាក់ទិននឹងករណីមួយណាឱ្យច្បាស់នៅឡើយក្ដី ក៏វាជួន ពេលនេះដែរ បងធំរបស់លោក គឺឈ្មោះ លី សាម៉េត ដ៏ល្បីល្បាញដែលកំពុងគេចខ្លួនពីការ តាមចាប់អនុវត្តន៍ច្បាប់ទាក់ទិននឹងការឆបោកប្រាក់រាប់សែន និងរាប់លានដុល្លារ ។
មន្ត្រីនគរបាលរាជធានីភ្នំពេញអះអាងថា សមត្ថកិច្ចនៅមិនទាន់រកឃើញ និងចាប់ខ្លួនគ្រូមា លី សា ម៉េត បាននៅឡើយ ទេ ក្រោយពេលដែលសម្ដេចតេជោ ហ៊ុន សែន ទម្លាយពីរឿងឆបោកប្រាក់រាប់លានដុល្លារ ។
អ្នកនាំពាក្យស្នងការដ្ឋាននគរបាលរាជធានីភ្នំពេញ លោកវរសេនីយ៍ឯក សំ វិច្ឆិកា បានប្រាប់ពីកាលពីថ្ងៃទី៩ ខែតុលា ថា មកដល់ពេលនេះ សមត្ថកិច្ចនៅមិនទាន់ចាប់ខ្លួនលោក លី សាម៉េត បាននៅឡើយ ទេ បន្ទាប់ពីឆ្មក់ចូលត្រួតពិនិត្យគេហដ្ឋានរបស់លោកនៅក្នុងខណ្ឌឫស្សីកែវ កាលពីថ្ងៃទី៨ ខែតុលា ប៉ុន្តែមិនឃើញលោក លី សាម៉េត នៅក្នុងផ្ទះឡើយ ។ លោកបន្តថា បច្ចុប្បន្ន សមត្ថកិច្ចកំពុងស្រាវជ្រាវកំណត់តម្រុយទីតាំងរត់គេចខ្លួនរបស់លោក លី សាម៉េត នៅឡើយ ។
គ្រូទាយតាមអនឡាញ ដែលមុននេះគេស្គាល់ថាជាគ្រូកញ្ចក់ទិព្វឈ្មោះ លី សាម៉េត ឬខ្លះហៅថា គ្រូមា ដែលមានគោរម្យងារជាឧកញ៉ា ត្រូវបានប្រធានព្រឹទ្ធសភាសម្ដេចតេជោ ហ៊ុន សែន តែងតាំងជាទី ប្រឹក្សាផ្ទាល់កាលពីឆ្នាំ២០២២ ។ ជាញឹកញាប់ លោកលី សាម៉េត តែងតែចេញមុខជាមួយលោក ដួង តារាជំនួយការផ្ទាល់របស់សម្ដេចតេជោ ហ៊ុន សែន ក្នុងភាពជាតំណាងនៅក្នុងកម្មវិធីមួយចំនួន ។
កាលពីថ្ងៃទី៧ ខែតុលា សម្ដេចតេជោហ៊ុន សែន បានបង្ហោះសារនៅលើហ្វេសប៊ុក ដោយអះអាងថាលោក លី សាម៉េត តែងប្រើឈ្មោះរបស់សម្ដេច ដើម្បីឆបោកលុយគេ ដោយក្នុងនោះមានការបោកលុយពីឈ្មោះ សុខ ឡេង ចំនួន១០លានដុល្លារ កាលពីឆ្នាំ២០២២ និងក្រោយមកពីលោក មួង ឃីម អនុប្រធាន ក្រុមការងារថ្នាក់កណ្តាលរបស់គណបក្សប្រជាជនកម្ពុជា ចុះមូលដ្ឋានខេត្តព្រះវិហារ ចំនួន២៣ម៉ឺនដុល្លារ ។
សម្ដេចតេជោក៏បានអះអាងទៀតថា សម្ដេចបានទទួលវីដេអូ ពីអភិបាលស្រុកល្វាឯម លោក កន សុខកាយ ដោយប្រាប់ថា លោកលី សាម៉េត បានយកប្រាក់ពីលោកចំនួន៣០ម៉ឺនដុល្លារ ដើម្បីរត់ការឱ្យបានតំណែងជាអភិបាលក្រុងអរិយក្សត្រ ។
ក៏ប៉ុន្តែមួយថ្ងៃ ក្រោយមកលោក កន សុខកាយ ត្រូវបានសម្ដេចធិបតីហ៊ុន ម៉ា ណែ ត នាយករដ្ឋមន្ត្រី បញ្ចប់តំណែងពីអភិបាលស្រុកល្វាឯម ក្រោមហេតុផលថា «ប្រព្រឹត្តកំហុសក្រមសីលធម៌ និងវិជ្ជាជីវៈធ្ងន់ធ្ងរ ។
ចំណែកលោក លី សាម៉េត ដែលគេច្រើននិយាយថា ជាឪពុកធម៍របស់លោក ដួង តារា ដែលសម្តេចតេជោ ហ៊ុន សែន ប្រធានព្រឹទ្ធសភា ឲ្យចាប់ខ្លួននោះ មកដល់ពេលនេះលោក លី សាម៉េត ហៅគ្រូមា មិនដឹងរត់ទៅច្រកដល់ក្រហែងណាទេ ។ តែនៅពេលណាមានការប្រែប្រួស ឬសមត្តកិច្ចចាប់ខ្លួនលោកគ្រូមាបាន កោះសន្តិភាពផ្សាយបន្ត ៕
ចែករំលែកព័តមាននេះ