ដើម្បីកុំអោយធ្លាក់ខ្លួន នៅក្នុងស្ថានភាពបំណុលវណ្ឌកអ្នកដែលមានបញ្ហាលុយ សូមប្រញាប់ទៅប្រឹក្សារក ដំណោះស្រាយជាមួយនឹងស្ថាប័នធនាគារ ឬគ្រឹះស្ថានហិរញ្ញវត្ថុដែលផ្លូវការកុំទៅរកសេវាក្រៅផ្លូវការ ដែល កំពុងតែខិតខំអន្ទងយើងទាំងអស់គ្នាតាមគ្រប់វិធី ។ ដើម្បីជួយសម្រាលបន្ទុកបញ្ហាហិរញ្ញវត្ថុ របស់អតិថិជននៅពេលនេះ…
ដើម្បីកុំអោយធ្លាក់ខ្លួន នៅក្នុងស្ថានភាពបំណុលវណ្ឌកអ្នកដែលមានបញ្ហាលុយ សូមប្រញាប់ទៅប្រឹក្សារក ដំណោះស្រាយជាមួយនឹងស្ថាប័នធនាគារ ឬគ្រឹះស្ថានហិរញ្ញវត្ថុដែលផ្លូវការកុំទៅរកសេវាក្រៅផ្លូវការ ដែល កំពុងតែខិតខំអន្ទងយើងទាំងអស់គ្នាតាមគ្រប់វិធី ។
ដើម្បីជួយសម្រាលបន្ទុកបញ្ហាហិរញ្ញវត្ថុ របស់អតិថិជននៅពេលនេះ ធនាគារជាតិនៃកម្ពុជាបានកំពុងតែជំរុញឲ្យគ្រឹះស្ថានធនាគារ និងមីក្រូហិរញ្ញវត្ថុទាំងអស់ឲ្យពិនិត្យមើលការរៀបចំឥណទានឡើងវិញនេះធ្វើយ៉ាងណាផ្ដល់អត្ថប្រយោជន៍ក៏ដូចជា សម្រាលការលំបាកក្នុងជីវភាពការរស់នៅរបស់ពលរដ្ឋនៅក្នុងគ្រាលំបាក និងរួមចំណែកជួយដល់សេដ្ឋកិច្ចជាតិ ។
លោកស្រី ជា សិរី ទេសាភិបាលធនាគារជាតិនៃកម្ពុជា បានអះអាងនៅក្នុងសន្និសីទកាសែត កាលពីថ្ងៃទី ០៨ ខែតុលាថា ការរៀបចំឥណទានឡើងវិញត្រូវបានដាក់ចេញដោយរាជរដ្ឋាភិបាល និងធនាគារជាតិនៃកម្ពុជាដោយផ្ដល់លទ្ធភាពឲ្យគ្រឹះស្ថានធនាគារ និងមីក្រូហិរញ្ញវត្ថុជួយអតិថិជនក្នុងការបង់ប្រាក់មានការធូរស្រាលជាងមុនមានន័យថា ពីមុនអតិថិជនមានកាតព្វកិច្ចបង់ប្រាក់ប៉ុណ្ណេះក្នុងមួយខែនៅពេលដែលអតិថិជនជួបវិបត្តិធ្លាក់ចំណូលនោះអតិថិជនអាចធ្វើការស្នើឲ្យរៀបចំឥណទានឡើងវិញ ដូច្នេះគ្រឹះស្ថានធនាគារ និងមីក្រូហិរញ្ញវត្ថុ គឺនឹងសម្រួលជួយអតិថិជនដោយអនុញ្ញាតឲ្យបង់ទៅតាមលទ្ធភាពរបស់អតិថិជនមានតាមការពិភាក្សា ។
តាមការពន្យល់បកស្រាយរបស់លោកស្រី ធនាគារជាតិនៃកម្ពុជា ដែលជាអាណាព្យាបាលនៃគ្រឹះស្ថានធនាគារនិងមីក្រូហិរញ្ញវត្ថុទាំងអស់ នៅក្នុងប្រទេសក៏បានអនុញ្ញាតឲ្យគ្រឹះស្ថានហិរញ្ញវត្ថុទាំងអស់ធ្វើយ៉ាងណាសម្រួលឲ្យអតិថិជនបង់សងត្រឡប់មកត្រឹមចន្លោះណាមួយដែលអាចជួយបានទាំងជីវភាពប្រចាំថ្ងៃ និងការបំពេញកាតព្វកិច្ចបានល្អក៏បានផងដែរ ។
លោកស្រីបានបន្តថា ការរៀបចំឥណទានឡើងវិញក្នុងគោលបំណងជួយសម្រាលបន្ទុកចំណាយប្រចាំគ្រារបស់ពលរដ្ឋក្នុងការបំពេញកាតព្វកិច្ចសងត្រឡប់ឥណទាន និងជំរុញកំណើនសេដ្ឋកិច្ច តាមរយៈការបង្កើនលំហូរសាច់ប្រាក់ចំណែកការអនុវត្តកិច្ចការងារនេះនឹងអនុវត្តចាប់ពីត្រីមាសទី៤ ឆ្នាំ២០២៤តទៅ ។
នេះ គឺជាចំណាត់ការមួយខណៈដែលនៅពេលនេះ ក្រុមអ្នករកស៊ីក្រៅប្រព័ន្ធឯណោះបានកំពុងតែខិតខំ អន្ទងពលរដ្ឋកាន់តែខ្លាំងក្លាដោយប្រកាសផ្តល់ឥណទានកាន់តែងាយស្រួល ដោយសម្រួលតាំងពីតាមទូរស័ព្ទរហូតដល់បណ្តាញសង្គមមានហ្វេសបុក តេឡេក្រាម តិកតក់ក៏មានដែរ ប៉ុន្តែនៅពេលដែលពលរដ្ឋ ជ្រុលខ្លួននោះពួកគេនឹងអាចវណ្ឌក ដោយសារតែពួកគេមានការប្រាក់ខ្ពស់ ហើយលក្ខខណ្ឌទៀតសោត គឺមិនច្បាស់លាស់ ។
នៅក្នុងស្ថានភាពបែបនេះ លោកស្រី ជា សិរី បានព្រមានដល់ពលរដ្ឋប្រឆាំងនឹងការប្រើប្រាស់សេវាប្រាក់កម្ចីខុសច្បាប់ដោយសង្កត់ធ្ងន់លើសក្តានុពលនៃការបាត់បង់ហិរញ្ញវត្ថុ និងហានិភ័យផ្សេងៗ ។ លោកស្រី បានលើកឡើងពីគ្រោះថ្នាក់ដែលទាក់ទងនឹងការខ្ចីប្រាក់ពីអ្នកឱ្យខ្ចីដែលគ្មានអាជ្ញាប័ណ្ណដោយកត់សម្គាល់ថា ការអនុវត្តបែបនេះជារឿយៗពាក់ព័ន្ធនឹងអត្រាការប្រាក់ហួសហេតុ និងលក្ខខណ្ឌបោកប្រាស់ជាច្រើនដែលមានចរិតលាក់កំបាំង ។
លោកស្រីបាននិយាយថា កត្តាទាំងនេះអាចនាំឱ្យមានវដ្តនៃបំណុលដែលពិបាកក្នុងការគេចចេញដែលបណ្តាលឱ្យមានការលំបាកផ្នែកហិរញ្ញវត្ថុយ៉ាងច្រើន សម្រាប់ប្រជាពលរដ្ឋដែលត្រូវការហិរញ្ញវត្ថុ ។ លោកស្រីបាននិយាយថា ធនាគារជាតិនៃកម្ពុជាបានផ្តល់អនុសាសន៍ថា បុគ្គលម្នាក់ៗខ្ចីតែពីស្ថាប័នហិរញ្ញវត្ថុដែលមានអាជ្ញាប័ណ្ណ និងគ្រប់គ្រងត្រឹមត្រូវតែប៉ុណ្ណោះ ។
កន្លងមក កម្ចីដែលអនុវត្តដោយប្រតិបត្តិករឥណទាន ឬសេវាកម្មកម្ចីងាយៗ ក្រៅប្រព័ន្ធទាំងនេះដំបូង ច្រើនលួងពលរដ្ឋ ពោល គឺធ្វើដូចជា ពួកគេដឹងអំពីទុកលំបាករបស់ពលរដ្ឋនៅពេលជួបបញ្ហាខ្វះលុយសម្រួលជីវភាព ប៉ុន្តែនៅពេលដែលធ្លាក់នៅក្នុងអន្ទាក់ពួក គេ គឺពលរដ្ឋពិតជាពិបាក ដោយក្រៅពីពិបាកចិត្ត និងបំណុលសងមិនចេះអស់ហើយនោះ គឺនៅអាចរងហានិភ័យនៃការគំរា.មកំហែងសន្តិសុខក៏ដូចជាបញ្ហាកិត្តិយស និងការដាក់សំពាធផ្លូវចិត្តជាច្រើនទៀតផងដែរ ។
មកដល់ឆមាសទី១ នៃឆ្នាំ២០២៤ ទំហំឥណទានមិនដំណើរការនៅធនាគារ គឺមានអត្រាប្រមាណជា ៦,៨ភាគរយ ហើយគ្រឹះស្ថានមីក្រូហិរញ្ញវត្ថុមានអត្រា៨,៣ ភាគរយ ដែលជាអត្រាខ្ពស់បំផុតមិនធ្លាប់មាននៅកម្ពុជាទោះបីជាអ្នកជំនាញថា វានៅក្នុងកម្រិតអាចគ្រប់គ្រងបានក៏ដោយចុះ ។ ផ្អែកតាមស្ថានភាពនេះ ពលរដ្ឋដែលមានបំណុលជាមួយនឹងគ្រឹះស្ថានហិរញ្ញវត្ថុមួយចំនួន ដោយសារតែខ្មាស់គេ ខ្លាចគេរឹបអូសទ្រព្យបញ្ចាំ គឺបានប្រើប្រាស់មធ្យោបាយទៅយកបំណុលពីស្ថាប័នផ្សេងមកទូទាត់ បំណុលចាស់ ហើយ នៅពេលដែលពិបាក គឺរត់ទៅកម្ចីក្រៅប្រព័ន្ធ ជាពិសេស គឺក្រុមផ្តល់សេវាកម្មកម្ចីអនឡាញ ដែលនាំឲ្យរិតតែគ្រោះថ្នាក់ថែមទៀត ពោលគឺនៅក្នុងដំណាក់កាលបំណុលជាន់កបំណុល ។
សូមគិតគូរឡើងវិញ ហើយនៅពេលដែលធនាគារជាតិនៃកម្ពុជាប្រកាសអនុញ្ញាតឲ្យគ្រឹះស្ថានហិរញ្ញវត្ថុ អាចរៀបចំឥណទានឡើងវិញបែបនេះអ្នកដែលមានបញ្ហា សូមបើកចិត្តអោយទូលាយ កុំខ្មាស កុំខ្លាច មកពិភាក្សាដោយត្រង់ៗជាមួយនឹងគ្រឹះស្ថានផ្លូវការ ដោយយើងអាចទទួលការអនុគ្រោះតាមការពិនិត្យជាក់ស្តែងរបស់គ្រឹះស្ថាន ៕
ចែករំលែកព័តមាននេះ