រាជធានីភ្នំពេញ ៖ យុវជនជាជាងមាសម្នាក់ បានទុកម៉ូតូ១គ្រឿង នៅខាងមុខផ្ទះ ដោយមិនបានដកូនសោ ចេញពីម៉ូតូនោះទេ រួចក៏បានដើរយកសម្ភារៈ ទៅទុកនៅក្នុងផ្ទះ លុះរយៈពេលប្រមាណ១០នាទីក្រោយមក…
រាជធានីភ្នំពេញ ៖ យុវជនជាជាងមាសម្នាក់ បានទុកម៉ូតូ១គ្រឿង នៅខាងមុខផ្ទះ ដោយមិនបានដកូនសោ ចេញពីម៉ូតូនោះទេ រួចក៏បានដើរយកសម្ភារៈ ទៅទុកនៅក្នុងផ្ទះ លុះរយៈពេលប្រមាណ១០នាទីក្រោយមក ពេលដើរចេញពីក្នុងផ្ទះវិញ ស្រាប់តែចោរលួចយកម៉ូតូទៅបាត់ ។ បន្ទាប់មកក៏បានឆែកមើលកាមេរ៉ាសុវត្ថិភាព ឃើញចោរ មិនស្គាល់អត្តសញ្ញាណ ០២នាក់ ធ្វើសកម្មភាពលួចម៉ូតូរបស់ខ្លួន ទើបប្ដឹងនគរបាលឲ្យជួយអន្តរាគមន៍ ។ ក្រោយពីការស្រាវជ្រាវរយៈពេល៣ថ្ងៃ នគរបាលខណ្ឌដង្កោ ក៏ឈានដល់ការចាប់ខ្លួនចោរបាន២នាក់ និងដកហូតម៉ូតូនោះបានមកវិញផងដែរ ។
ហេតុការណ៍នេះបានកើតឡើង កាលពីវេលាម៉ោង២និង៥០នាទីរសៀលថ្ងៃទី០៦ ខែតុលា ឆ្នាំ២០២៤ នៅចំណុចមុខផ្ទះលេខ១៩៩E០ ផ្លូវលេខ៨B ភូមិម័ល សង្កាត់ដង្កោ ខណ្ឌដង្កោ រាជធានីភ្នំពេញ (ម៉ោងនៅក្នុងកាមេរ៉ាសុវត្ថិភាព) ។
យុវជនរងគ្រោះឈ្មោះ ណុន សារ៉ាន អាយុ២០ឆ្នាំ មុខរបរ ជាងមាស មានទីលំនៅផ្ទះកើតហេតុខាងលើ ។ ដោយឡែកជនសង្ស័យ ដែលត្រូវនគរបាលឃាត់ខ្លួន២នាក់នោះ ម្នាក់ឈ្មោះ នុយ ប៊ុនហេង អាយុ១៨ឆ្នាំ ស្នាក់នៅបន្ទប់ជួលភូមិខ្វា សង្កាត់ដង្កោ ខណ្ឌដង្កោ និងម្នាក់ទៀតឈ្មោះ ហេង ប៊ុនហៀង អាយុ១៤ឆ្នាំ ស្នាក់នៅបន្ទប់ជួល ភូមិសំបួរ សង្កាត់ដង្កោ ខណ្ឌដង្កោ ។
នគរបាលបានប្រាប់ថា នៅមុនពេលកើតហេតុយុវជនរងគ្រោះបានជិះម៉ូតូ ០១គ្រឿង ម៉ាក HONDA DREAM C១២៥ ស៊េរីឆ្នាំ២០២៣ ពណ៍ខ្មៅ ពាក់ស្លាកលេខ ភ្នំពេញ 1KH-2183 ចេញពីស្រុកកំណើតនៅខេត្តស្វាយរៀង មកផ្ទះលេខ១៩៩E០ ផ្លូវ៨B (បុរីលឹម ឈាងហាក់) នៅភូមិម័ល សង្កាត់ដង្កោ ខណ្ឌដង្កោ ។ លុះពេលមកដល់បានទុកម៉ូតូនៅខាងមុខផ្ទះ ដោយមិនបានដកូនសោចេញពីម៉ូតូឡើយ រួចក៏បានយកសម្ភារៈ ទៅទុកនៅក្នុង ហើយរយៈពេលប្រមាណ១០នាទីក្រោយមក ទើបដើរចេញពីក្នុងផ្ទះវិញ ក៏ស្រាប់តែចោរលួចម៉ូតូទៅបាត់ ។
នគរបាលបានប្រាប់ឲ្យដឹងបន្តទៀតថា ភ្លាមៗនោះយុវជនរងគ្រោះក៏បានឆែកមើលកាមេរ៉ាសុវត្ថិភាពនៅផ្ទះរបស់ខ្លួន ហើយបានឃើញចោរមិនស្គាល់អត្តសញ្ញាណ២នាក់ ជិះម៉ូតូ០១គ្រឿងម៉ាក HONDA SCOOPY ពណ៌ស មិនស្គាល់ស្លាកលេខទៅធ្វើសកម្មភាពលួចម៉ូតូរបស់ខ្លួន នៅវេលាម៉ោង២និង៥០នាទីរសៀលថ្ងៃនោះ ។ បន្ទាប់មកក៏បានទៅដាក់ពាក្យប្ដឹងនៅប៉ុស្តិ៍នគរបាលរដ្ឋបាលដង្កោ ហើយនគរបាលប៉ុស្តិ៍នេះរួមជាមួយនគរបាលខណ្ឌដង្កោ ដឹកនាំដោយលោកវរៈសេនីយ៍ឯកជឹម សុីថា អធិការនគរបាលខណ្ឌ ធ្វើការស្រាវជ្រាវ រហូតកំណត់បានមុខសញ្ញាចោរខាងលើបាន ។
នគរបាលបានបញ្ជាក់ប្រាប់បន្ថែមទៀតថា រហូតដល់វេលាម៉ោង១០ព្រឹកថ្ងៃទី០៩ ខែតុលា ឆ្នាំ២០២៤ គឺ៣ថ្ងៃក្រោយពីពេលកើតហេតុ ក៏បានឃាត់ខ្លួនចោរម្នាក់ឈ្មោះ នុយ ប៊ុនហេង នៅត្រង់ចំណុចតារាងបាល់ទះ ស្ថិតនៅតាមផ្លូវបេតុង ភូមិសំបួរ សង្កាត់ដង្កោ ខណ្ឌដង្កោ រួមនិងវត្ថុតាងម៉ូតូម៉ាកHONDA DREAM C១២៥ ស៊េរីឆ្នាំ២០២៣ ពណ៌ខ្មៅ ដែលជារបស់ជនរងគ្រោះ ។ ប៉ុន្តែត្រូវបានចោរដោះស្លាកលេខ ភ្នំពេញ1KH-2183ចេញពីម៉ូតូអស់ហើយ បន្ទាប់មកនៅវេលាម៉ោង១០និង៣០នាទីព្រឹកថ្ងៃខែឆ្នាំដដែល ក៏ឃាត់ខ្លួនបក្សពួកម្នាក់ទៀតឈ្មោះ ហេង ប៊ុនហៀង នៅត្រង់ចំណុចបន្ទប់ជួល ផ្លូវបេតុង ភូមិសំបួរ សង្កាត់ដង្កោ ខណ្ឌដង្កោ រួចនាំយកទៅធ្វើការសាកសួរនៅអធិការនគរបាលខណ្ឌដង្កោ ។
ក្រោយពីធ្វើការសាកសួរចោរ២នាក់នេះបានសារភាពថាពួកខ្លួនពិតជាបានធ្វើសកម្មភាពលួចម៉ូតូរបស់ជនរងគ្រោះ រួចបានដោះស្លាកលេខម៉ូតូចេញមែន ហើយការដោះស្លាកលេខចេញបែបនេះគឺដើម្បីទុកជិះធ្វើសកម្មភាពចេញដើរលួចនៅលើកក្រោយៗជាបន្តទៀតនិងកុំឲ្យម្ចាស់ចំណាំម៉ូតូបាន ៕
ចែករំលែកព័តមាននេះ