ទីក្រុងបេរូត៖ ក្រុមហេសបូឡាទោះបីជាបានបាត់បង់មេដឹកនាំកំពូលរបស់ខ្លួន និងទោះបីត្រូវអ៊ីស្រាអែលវាយប្រហារយ៉ាងណាក្ដី ក៏ពួកគេនៅតែតាំងចិត្តក្លាហាន និងឆ្លៀតបោះពាក្យបោះសម្ដីថែមទៀតថា «បើទុកជាអ៊ីស្រាអែលវាយចូលមូលដ្ឋានរបស់ខ្លួននៅប្រទេសលីបង់ដោយប្រើប្រាស់កងទ័ពជើងគោកក៏ដោយ ក៏ពួកគេមិនខ្លាចដែរ។ ពួកគេត្រៀមស្វាគមន៍ជានិច្ច»។
អ៊ីស្រាអែលព្រមានអ៊ីរ៉ង់ថានៅទូទាំងតំបន់មជ្ឈិមបូព៌ាគ្មានទីណាដែលថាខ្លួន (អ៊ីស្រាអែល) មិនអាចទៅដល់ទេ។ អ៊ីស្រាអែលថែមទាំងឱ្យតម្រុយថាមិនយូរទេខ្លួននឹងចាប់ផ្ដើមលើកកងទ័ពជើងគោកវាយលុកចូលប្រទេសលីបង់ហើយ។ នាយករដ្ឋមន្ត្រីអ៊ីស្រាអែល លោកណឺតាន់យ៉ាហ៊ូ ថ្លែងថាគ្មានឡើយពាក្យថាមិនការពារប្រជាជន និងប្រទេសជាតិរបស់យើង។
ការធ្វើឃាតមេដឹកនាំកំពូលរបស់ក្រុមហេសបូឡាឈ្មោះណាស្រាឡា (Nasrallah) កាលពីយប់ថ្ងៃសុក្រជាការទះ១កំផ្លៀងយ៉ាងដំណំទៅលើក្រុមនេះព្រោះគាត់ជាអ្នកដឹកនាំចលនាប្រដាប់អាវុធដ៏ធំជាងគេ១នេះរយៈពេល៣២ឆ្នាំមកហើយ។ មិនត្រឹមតែត្រូវ១កំផ្លៀងសម្រាប់ហេសបូឡាទេ សូម្បីតែអ៊ីរ៉ង់ដែលជាអ្នកជួយជ្រោមជ្រែងក្រុមហេសបូឡាក៏ខាតបង់មិនតិចដែរ។
បន្ទាប់ពីប្រើប្រាស់យុទ្ធវិធីវាយប្រហារជើងអាកាស២សប្ដាហ៍ដើម្បីកាត់ផ្ដាច់ប្រព័ន្ធទូរគមនាគមន៍ និងប្រព័ន្ធការពារដែនអាកាសរបស់ហេសបូឡា និងកម្ចាត់មេធំៗរបស់ហេសបូឡាម្ដងមួយៗរួចមក អ៊ីស្រាអែលបង្ហាញកាន់តែច្បាស់ថាខ្លួនត្រូវតែប្រើប្រាស់ទ័ពជើងគោកដើម្បីវាយចូលលីបង់។ ទ័ពអ៊ីស្រាអែលបានប្រមូលផ្ដុំគ្នានៅតាមព្រំដែន និងហ្វឹកហាត់ជារៀងរាល់ថ្ងៃ។
យោងតាមកាសែតវ៉ាស៊ីនតោនប៉ុស្តិ៍ រដ្ឋាភិបាលអ៊ីស្រាអែលបានជូនដំណឹងទៅវ៉ាស៊ីនតោនរួចហើយថាខ្លួននឹងបញ្ជូនកងទ័ពជើងគោកដើម្បីវាយលុកចូលប្រទេសលីបង់នៅក្នុងពេលឆាប់ៗនេះ។ ប៉ុន្តែការវាយប្រហារលើកនេះមានទ្រង់ទ្រាយតូចជាងឆ្នាំ២០០៦ព្រោះអ៊ីស្រាអែលគ្រាន់តែចង់ការពារសន្តិសុខជូនប្រជាជនរបស់ខ្លួនដែលវិលត្រឡប់ទៅរស់នៅតាមព្រំដែនវិញ។
បន្ទាប់ពីទទួលដំណឹងនេះ លោកបៃដិន (ដែលមិនទាន់អាចបញ្ចុះបញ្ចូលអ៊ីស្រាអែលឱ្យបន្ធូរដៃខ្លះ និងបិទបញ្ចប់យុទ្ធនាការរបស់ខ្លួននៅលីបង់) លោកបានអំពាវនាវជាថ្មីម្ដងទៀតឱ្យមានបទឈប់បាញ់។ លោកថ្លែងប្រាប់អ្នកសារព័ត៌មានថាលោកនៅតែមានជំនឿថាអ៊ីស្រាអែលនឹងបញ្ឈប់សកម្មភាពរបស់ខ្លួន។ ចំពោះសំណួរពាក់ព័ន្ធនឹងគម្រោងវាយលុកទ័ពជើងគោកនេះ អ្នកនាំពាក្យក្រសួងការពារជាតិអាមេរិក (មន្ទីរបញ្ចកោណ) សូមឱ្យសាកសួរអ៊ីស្រាអែលវិញទើបច្បាស់ជាង។
ហេសបូឡាប្រកាសថាបើអ៊ីស្រាអែលចង់វាយលុកទ័ពជើងគោក ខ្លួនត្រៀមកំដរជានិច្ច
នៅទីបំផុត បន្ទាប់ពីរក្សាភាពស្ងប់ស្ងាត់អស់ពីរបីថ្ងៃចាប់តាំងពីអ៊ីស្រាអែលទម្លាក់គ្រាប់បែកទៅលើទីជម្រកក្រោមដីរបស់មេដឹកនាំកំពូលហេសបូឡារួចមក អនុប្រធានរបស់ក្រុមនេះចេញមុខនិយាយជាលើកដំបូង។ លោកណាអ៊ីម កាសេម (Naim Qassem)ថ្លែងថាក្រុមយុទ្ធជនរបស់គាត់ត្រៀមខ្លួនរួចហើយដើម្បីវាយតទល់នឹងការវាយប្រហារជើងគោករបស់អ៊ីស្រាអែល។
គាត់ថ្លែងដូច្នេះចេញពីកន្លែងលាក់ខ្លួនសម្ងាត់។ ទន្ទឹមនឹងនោះ អ៊ីស្រាអែលបន្តវាយប្រហារតាមអាកាសទៅលើមូលដ្ឋានរបស់ហេសបូឡានៅទីក្រុងបេរូត និងទីកន្លែងដទៃទៀតទូទាំងប្រទេសលីបង់។ រហូតមកដល់ពេលនេះ ជនស៊ីវិលប្រហែលមួយពាន់នាក់បានស្លាប់ ខណៈដែលមួយលាននាក់ទៀតត្រូវរត់ចោលផ្ទះសម្បែងរបស់ខ្លួនដើម្បីគេចចេញពីសង្គ្រាម៕
ចែករំលែកព័តមាននេះ