រាជធានីភ្នំពេញ ៖ ស្ត្រីម្នាក់បានស្លា.ប់បាត់បង់ជីវិតយ៉ាងអាណោចអាធ័ម និងមនុស្ស២នាក់ទៀតបានរងរបួសធ្ងន់នៅក្នុងហេតុការណ៍គ្រោះថ្នាក់ចរាចរណ៍ដ៏រន្ធត់មួយដែលបានកើតឡើងនៅលើកំណាត់ផ្លូវជាតិលេខ១ ស្ថិតនៅក្នុងភូមិសាស្ត្រសង្កាត់ក្បាលកោះ ខណ្ឌមានជ័យ កាលពីវេលាម៉ោង៧និង២០នាទីយប់ ថ្ងៃទី១៨ មិថុនា ឆ្នាំ២០១១
រាជធានីភ្នំពេញ ៖ ស្ត្រីម្នាក់បានស្លាប់បាត់បង់ជីវិតយ៉ាងអាណោចអាធ័ម និងមនុស្ស២នាក់ទៀតបានរងរបួសធ្ងន់នៅក្នុងហេតុការណ៍គ្រោះថ្នាក់ចរាចរណ៍ដ៏រន្ធត់មួយដែលបានកើតឡើងនៅលើកំណាត់ផ្លូវជាតិលេខ១ ស្ថិតនៅក្នុងភូមិសាស្ត្រសង្កាត់ក្បាលកោះ ខណ្ឌមានជ័យ កាលពីវេលាម៉ោង៧និង២០នាទីយប់ ថ្ងៃទី១៨ មិថុនា ឆ្នាំ២០១១ ។
ស្ត្រីរងគ្រោះក្នុងហេតុការណ៍ខាងលើនេះឈ្មោះឈុំ ប៊ុនធឿន អាយុ៣១ឆ្នាំ មានទីលំនៅស្រុកកៀនស្វាយ ខេត្តកណ្តាល។ មុនពេលកើតហេតុស្ត្រីរងគ្រោះបានជិះម៉ូតូម៉ាកវីវ៉ា ពណ៌ខ្មៅ ដោយប្តីជាអ្នកឌុបធ្វើដំណើរលើកំណាត់ផ្លូវជាតិលេខ១ ក្នុងទិសដៅពីលិចទៅកើត ស្របទិសគ្នាជាមួយនារីម្នាក់ដែលជិះម៉ូតូគុបជ្រុងពណ៌ទឹកប្រាក់ ។ លុះមកដល់ចំណុចកើតហេតុអ្នកជិះម៉ូតូម៉ាកគុបជ្រុងបត់ឆ្វេងចុះពីលើផ្លូវជាតិចូលលំនៅឋានរបស់ខ្លួន ធ្វើឱ្យអ្នកជិះម៉ូតូវីវ៉ាឌុបប្រពន្ធចាប់ហ្វ្រាំងមិនទាន់ក៏បានបុកយ៉ាងពេញទំហឹង បណ្តាលឱ្យម៉ូតូទាំង២ដួលព្រមគ្នា ហើយអ្នកជិះម៉ូតូទាំងអស់រងរបួសធ្ងន់។ ដោយឡែកស្ត្រីឈ្មោះឈុំ ប៊ុនធឿន ដែលជិះម៉ូតូរួមដំណើរជាមួយប្តីបានស្លាប់ភ្លាមៗនៅនឹងកន្លែងកើតហេតុ ដោយសារដួលបោកក្បាលទៅនឹងថ្នល់។
តាមប្រភពព័ត៌មាននៅកន្លែងកើតហេតុបានឱ្យដឹងថា មុនពេលកើតហេតុអ្នករងគ្រោះក្នុងហេតុការណ៍ខាងលើនេះទាំាំងអស់គ្នា បានជិះម៉ូតូត្រឡប់មកពីប្រកបរបររកស៊ីនៅក្នុងរាជធានី ភ្នំពេញ ឆ្ពោះទៅកាន់លំនៅឋានរៀងៗខ្លួនក្នុងល្បឿនលឿនដូចគ្នា លុះមកដល់កន្លែងកើតហេតុដោយខ្វះការប្រុងប្រយ័ត្ន ក៏ជួបគ្រោះថ្នាក់ដោយចៃដន្យបុកគ្នាស្លាប់ និងរបួសបែបនេះតែម្តងទៅ។ បច្ចុប្បន្នម៉ូតូបង្កហេតុទាំងសងខាងបានត្រូវសមត្ថកិច្ចនគរបាលខណ្ឌមានជ័យ វាស់វែងដកហូតយកមករក្សាទុកបណ្តោះអាសន្ននៅអធិការដ្ឋាននគរបាលខណ្ឌមានជ័យ ដើម្បីចាត់ការតាមផ្លូវច្បាប់៕
ចែករំលែកព័តមាននេះ