រាជធានីភ្នំពេញ ៖ រថយន្តសណ្ដោង ១គ្រឿង ដឹកជីកសិកម្ម ម៉ាកអ៊ុយរ៉េ (UREA) រាប់សិបបាវ ហើយខណៈពេលកំពុងបើកបរសុខៗ ដល់ត្រង់ចំណុចរង្វង់មូលមួយកន្លែង…
រាជធានីភ្នំពេញ ៖ រថយន្តសណ្ដោង ១គ្រឿង ដឹកជីកសិកម្ម ម៉ាកអ៊ុយរ៉េ (UREA) រាប់សិបបាវ ហើយខណៈពេលកំពុងបើកបរសុខៗ ដល់ត្រង់ចំណុចរង្វង់មូលមួយកន្លែង ស្រាប់តែបាក់ជញ្ជាំងទ្រុងម្ខាង បណ្ដាលឲ្យធ្លាក់ជីរាប់សិបបាវ រាយប៉ាយពេញផ្លូវ ប៉ុន្តែខណៈនោះ សំណាងខ្លាំងណាស់ ដែលពុំបានបណ្ដាលឲ្យសង្កត់លើអ្នកដំណើរតាមម៉ូតូ ឬម៉ូតូកង់បី និងរថយន្តធុនតូចជាដើម បង្កឲ្យមានគ្រោះថ្នាក់នោះឡើយ ។
ហេតុការនោះបានកើតឡើងកាលពីវេលាម៉ោង១និង៤០នាទីរសៀលថ្ងៃទី០២ ខែមិថុនា ឆ្នាំ២០២៥ នៅតាមមហាវិថីឈ្នះឈ្នះ ត្រង់ចំណុចរង្វង់មូលស្ពានអាកាសផ្លូវល្បឿនលឿនភ្នំពេញ-ព្រះសីហនុ ស្ថិតនៅក្នុងភូមិចែងម៉ែង សង្កាត់សំរោងក្រោម ខណ្ឌពោធិ៍សែនជ័យ រាជធានីភ្នំពេញ ។
រថយន្តខាងលើនោះក្បាលម៉ាក FUSO ពណ៍ស ឆ្នូតពណ៍ផ្ទៃមេឃពាក់ស្លាកលេខចង្កូតស្តាំ PSHN-0381 និងកន្ទុយរ៉ឺម៉កពណ៍ក្រហម ពាក់ស្លាកលេខ ភ្នំពេញ 4A-4532 បើកបរដោយបុរសម្នាក់មិនស្គាល់អត្តសញ្ញាណ ។
ប្រជាពលរដ្ឋបាននិយាយថា នៅមុនពេលកើតហេតុរថយន្តដឹកជីអ៊ុយរ៉េខាងលើនេះ បានបើកបរធ្វើដំណើរតាមមហាវិថីឈ្នះឈ្នះ ក្នុងទិសដៅពីត្បូងទៅជើង លុះពេលទៅដល់ត្រង់ចំណុចកើតហេតុ ដោយសារតែផ្ទុកធ្ងន់ពេក ក៏បានបាក់ជញ្ជាំងទ្រុងខាងស្តាំ។ បណ្តាលឲ្យធ្លាក់ជីរាប់សិបបាវ រាយប៉ាយពេពេញផ្លូវតែម្ដង ប៉ុន្តែជាសំណាងល្អ មិនបានសង្កត់លើអ្នកដំណើរតាមម៉ូតូ ឬម៉ូតូកង់បី និងរថយន្តធុនតូចជាដើម បង្កឲ្យមានគ្រោះថ្នាក់នោះឡើយ ។
ប្រជាពលរដ្ឋបាននិយាយបន្តទៀតថា ក្រោយកើតហេតុនគរបាលប៉ុស្តិ៍សំរោងក្រោម បានចុះទៅពិនិត្យមើល និងសម្រួលចរាចរណ៍ មិនឲ្យកកស្ទះ ចំណែកខាងបុគ្គលិកក្រុមហ៊ុនផ្លូវល្បឿនលឿន ក៏បានចុះទៅដែរ ហើយបានឲ្យខាងតំណាងរថយន្តលើជីដឹកចេញពីកន្លែងកើតហេតុ ។
បន្ទាប់មក តំណាងរថយន្តខាងលើក៏បានយករថយន្តធុនយក្ស ១គ្រឿងទៀត ម៉ាកហ៊ីយ៉ាន់ដាយ ពណ៍ស លាយខៀវពាក់ស្លាកលេខព្រះសីហនុ3A 6597 ទៅដឹកជីនោះយកទៅរក្សាទុកនៅក្នងឃ្លាំងស្តុករបស់ខ្លួនបន្តទៀត ៕
ចែករំលែកព័តមាននេះ