រាជធានីភ្នំពេញ ៖ យុវជន២នាក់ បានជិះម៉ូតូម៉ាកហុងដាឌ្រីមសេ១២៥ មួយគ្រឿង ឌុបគ្នា បានបើកបោះពួយក្នុងល្បឿនលឿនជ្រុលបុកជាមួយម៉ូតូសណ្ដោងរទេះដឹកពងទា ១គ្រឿងទៀត ដែលកំពុងបើកបត់ឆ្លងផ្លូវ យ៉ាងពេញទំហឹង…
រាជធានីភ្នំពេញ ៖ យុវជន២នាក់ បានជិះម៉ូតូម៉ាកហុងដាឌ្រីមសេ១២៥ មួយគ្រឿង ឌុបគ្នា បានបើកបោះពួយក្នុងល្បឿនលឿនជ្រុលបុកជាមួយម៉ូតូសណ្ដោងរទេះដឹកពងទា ១គ្រឿងទៀត ដែលកំពុងបើកបត់ឆ្លងផ្លូវ យ៉ាងពេញទំហឹង បណ្ដាលឲ្យគាបជាប់គ្នារងការខូចខាត។ ខណៈនោះ ក៏បណ្ដាលឲ្យយុវជនទាំង២នាក់រងរបួសធ្ងន់ធ្ងរ ហើយត្រូវបានក្រុមសង្គ្រោះអង្គភាព៧១១ ដឹកបញ្ជូនទៅកាន់មន្ទីរពេទ្យព្រះកុសុមៈ ភ្លាមៗ ដោយឡែកបុរសអ្នកបើកបរម៉ូតូសណ្ដោងរទេះដឹកពងទា បានរងរបួសស្រាល ។
ឧប្បត្តិហេតុគ្រោះថ្នាក់ចរាចរណ៍នោះ បានកើតឡើងកាលពីវេលាម៉ោង២រសៀល ថ្ងៃទី០២ ខែមិថុនា ឆ្នាំ២០២៥ នៅលើផ្លូវជាតិលេខ៤ ត្រង់ចំណុចអតីតម៉ែ(ននោង) ស្ថិតនៅក្នុងភូមិត្រពាំងទួល សង្កាត់កំបូល ខណ្ឌកំបូល រាជធានីភ្នំពេញ ។
យុវជនដែលរងរបួសធ្ងន់២នាក់នោះ ៖
ទី១. ឈ្មោះ គឹម កុច អាយុ២២ឆ្នាំ រងរបួសបាក់ជើងខាងស្ដាំ និងទី២. ឈ្មោះ គឹម បឹម អាយុ២០ឆ្នាំ រងរបួសរលាត់ជើងខាងឆ្វេង អ្នកទាំង២មានទីលំនៅ ភូមិឈូករំដួល ឃុំទីពោ ស្រុកសន្ទុក ខេត្តកំពង់ធំ ។ ជិះម៉ូតូម៉ាកហុងដាឌ្រីមសេ១២៥ ពណ៍ខ្មៅ ១គ្រឿង ពាក់ស្លាកលេខ សៀមរាប1AN-4724 ។ ចំណែកឯម៉ូតូសណ្ដោងរទេះដឹកពងទា បើកបរដោយបុរសម្នាក់ឈ្មោះ វ៉ន ពិសិដ្ឋ អាយុ៣៣ឆ្នាំ រងរបួសស្រាល ។
ប្រជាពលរដ្ឋបាននិយាយថា នៅមុនពេលកើតហេតុ ម៉ូតូម៉ាកហុងដាឌ្រីមសេ១២៥ ជិះដោយយុវជន២នាក់ខាងលើ ធ្វើដំណើរក្នុងទិសដៅពីកើតទៅលិច ក្នុងល្បឿនលឿនគ្រាន់បើដែរ ។ លុះពេលទៅដល់ត្រង់ចំណុចកើតហេតុ បានវាក់ជាមួយម៉ូតូសណ្ដោងរទេះដឹកពងទា ដែលកំពុងបើកបរធ្វើដំណើរក្នុងទិសដៅពីលិចទៅកើត ហើយបត់ឆ្វេងឆ្លងផ្លូវ ។
ប្រភពដដែលបានឲ្យដឹងបន្តថា ពេលនោះ គេចអត់ទាន់ ក៏បានបុកគ្នាពេញទំហឹង ហើយម៉ូតូហុងដាឌ្រីម និងម៉ូតូសណ្ដោងរទេះដឹកពងទា គាបជាប់គ្នាបេះអត់ចេញ ចំណែកពងទា បានធ្លាក់រាយប៉ាយពេញផ្លូវ ។ ដោយឡែក យុវជនអ្នកជិះម៉ូតូហុងដាឌ្រីម២នាក់ រងរបួសធ្ងន់ បន្ទាប់មកត្រូវបានក្រុមសង្គ្រោះអង្គភាព៧១១ ដឹកយកទៅសង្គ្រោះនៅមន្ទីរពេទ្យព្រះកុសុមៈ រីឯបុរស ដែលជាអ្នកបើកម៉ូតូសណ្ដោងរទេះដឹកពងទា របួសស្រាល ។
ក្រោយពេលកើតហេតុនគរបាលខណ្ឌកំបូល បានចុះទៅវាស់វែង រួចនាំយកម៉ូតូ និងម៉ូតូសណ្ដោងរ៉ឺម៉ក ដឹកពងទា ទៅរក្សាទុករង់ចាំការដោះស្រាយគ្នានៅពេលក្រោយ ៕
ចែករំលែកព័តមាននេះ