ខេត្តកំពត ៖ លើដងផ្លូវក្នុងស្រុកអង្គរជ័យគេប្រទះឃើញលោកយាយជរាម្នាក់រស់នៅឯកោគ្មានកូនចៅទីពឹង ត្រូវបានអ្នកភូមិធ្វើតូបឱ្យគាត់សំរាកនៅជាប់ផ្លូវលំនិងផ្លូវជាតិ ដើម្បីឱ្យគាត់មានលទ្ធភាពបានរស់ដោយការដាក់ទានពីអ្នកធ្វើដំណើរ ។ លោកយាយឈ្មោះសយ តែម អាយុ៧៥ឆ្នាំ នៅភូមិស្រែរោង ឃុំភ្នំកុង ស្រុកអង្គរជ័យ
ខេត្តកំពត ៖ លើដងផ្លូវក្នុងស្រុកអង្គរជ័យគេប្រទះឃើញលោកយាយជរាម្នាក់រស់នៅឯកោគ្មានកូនចៅទីពឹង ត្រូវបានអ្នកភូមិធ្វើតូបឱ្យគាត់សំរាកនៅជាប់ផ្លូវលំនិងផ្លូវជាតិ ដើម្បីឱ្យគាត់មានលទ្ធភាពបានរស់ដោយការដាក់ទានពីអ្នកធ្វើដំណើរ ។ លោកយាយឈ្មោះសយ តែម អាយុ៧៥ឆ្នាំ នៅភូមិស្រែរោង ឃុំភ្នំកុង ស្រុកអង្គរជ័យ។
លោកយាយសយ តែម និយាយបានតែមួយម៉ាត់ៗមិនអាចនិយាយហូរហែបានឡើយ ។ ប៉ុន្តែមានស្ត្រីចំណាស់ម្នាក់ឈ្មោះយ៉ែម សារឿន អាយុ៦៩ឆ្នាំ រស់នៅក្នុងភូមិស្រែរោងនោះដែរបាននិយាយប្រាប់ថា លោកយាយសយ តែមមានស្រុកកំណើតនៅភូមិស្រែរោងនេះ ប៉ុន្តែគាត់ធ្លាប់ទៅរស់នៅខេត្តកំពង់ចាម ក្រោយមកគាត់មករស់នៅភូមិកំណើតវិញ ហើយកាលដែលគាត់នៅមានកម្លាំងមាំមួន គាត់ធ្វើនំលក់ ។ ពេលនោះតូបរបស់គាត់គេសង់ឱ្យនៅជាប់ចិញ្ចើមផ្លូវលំ ការរស់នៅរបស់គាត់មិនមានអនាម័យត្រឹមត្រូវទេ ព្រោះគាត់រស់នៅក្បែរស្រះទឹកអ្នកភូមិប្រើប្រាស់ជាប្រចាំ ។ ក្រោយមកដោយលោកយាយកាន់តែមានសភាពវង្វេងក៏ត្រូវបានគេរុះរើតូបយកទៅដាក់ឱ្យឆ្ងាយពីអ្នកភូមិ ។
ស្ត្រីរូបនោះបានអះអាងថា លោកយាយសយ តែម ធ្លាប់បានទទួលអំណោយម្តងហើយកាលពី៣ឆ្នាំមុន ហើយពេលនេះលោកយាយ ស្ថិតក្នុងវ័យជរាមិនមានកូនចៅថែទាំទេ ។ ជាការពិតណាស់នៅក្នុងខ្ទមរបស់លោកយាយគេឃើញមានរបស់របរបន្តិចបន្តួចដាក់រាយប៉ាយស្ទើរតែគ្មានកន្លែងអង្គុយ ។ គេឃើញមាននំចំណីហូរហែនិងទឹកត្រូវបានអ្នកធ្វើដំណើរតាមផ្លូវថ្នល់ដាក់នៅលើគ្រែឱ្យហូប ព្រោះលោកយាយមិនអាចដាំបាយហូបខ្លួនឯងបានទៀតឡើយ ។
លោកងួន សារុន ប្រធានភូមិស្រែរោងបានប្រាប់ថា អ្នកភូមិគេទៅមើលលោកយាយ សយ តែម ហូរហែដែរ ប៉ុន្តែគ្មាននរណាម្នាក់ស្ម័គ្រចិត្តយកលោកយាយមកមើលថែដោយផ្ទាល់ដៃទេ ។ លោកប្រធានភូមិនិយាយថា មិនដឹងយកលោកយាយទៅទុកនៅកន្លែងណាឱ្យបានសមរម្យទេ ។ អ្នកភូមិម្នាក់ទៀតនិយាយថា លោកយាយតែមបើស្លាប់វិញគ្មានអ្នកណាដឹងទេ ដែលនេះជាជីវិតឯកោចុងក្រោយរបស់គាត់ ។ នេះជាបញ្ហាមួយដែលកំពុងកើតមានក្នុងសង្គមជាតិរបស់យើងដែលមិនទាន់មានមជ្ឈមណ្ឌលគាំពារមនុស្សចាស់ដោយសារគ្មានទីពឹងត្រូវឱ្យរស់តាមតែយថាកម្មប៉ុណ្ណោះ ។
នៅឃុំតានី ស្រុកអង្គរជ័យនេះដែរ តាមព័ត៌មានថា ក៏មានលោកយាយ២នាក់ដែរដែលរស់នៅឯកោ ហើយអ្នកភូមិបានសង់តូបឱ្យគាត់ស្នាក់នៅម្នាក់មួយជាប់នឹងផ្លូវជាតិលេខ៣ ។ លោកយាយទាំង២នាក់នេះ បើតាមមន្ត្រីក្រុមប្រឹក្សាឃុំតានីនិយាយថា យាយម្នាក់ពិការភ្នែកទាំង២ ឯយាយម្នាក់ទៀតភ្នែកភ្លឺជរាដូចគ្នាមិនមានកូនចៅអ្វីទេ ។ មន្ត្រីក្រុមប្រឹក្សាឃុំនិយាយថា លោកយាយជរាធ្លាប់បានទទួលអំណោយពីសប្បុរសជនកាលពីឆ្នាំ២០០៩ និងរស់ដោយសារអ្នកធ្វើដំណើរដាក់ទាន ៕
ចែករំលែកព័តមាននេះ